Acts 4

Peturu na Johani aa pakiwa mu kamenga

1A Peturu na Johani o kwa ambaura nanu, kwa keyire mapurisita, thsitumi wakwakunyunga Tembere nAsaduki. 2Kuma a anthzipire pakuninga ci Peturu na Johani kuma a rongithsire anu ci mwa Yesu ko ku di kupinduka kwafu. 3Angire oto tunganda no ku tu paka mu kamenga katere diyuwa edi dya randireko pakuninga ci nedi runguro. 4Unone ongi wanu awa yuvire maywi a Peturu na Johani a tawire. Mwedyo diyuwa taro thzakwakutawa thza fotire ku kuma mu tukore to mutanu (5,000).

5Anaci mathsiku aendithsi o Majuda, akuru o mbunga narongithsi o murao a ciwanine mu Yerusalema. 6Anasi mupurisita shokuru pa ekarire, mofoci kengeyo no Kayafa, Johani, Alekisanda namweya apa mupurisita shokuru. 7A retire a Peturu na Johani mu kaciko no ku wepura ci: “Kokoro wadye nji mu dithzina dyadye na mu kwama eyi?”

8Ko ku yara Mupepo Oukenu, Peturu ngou a wa amberire ci: “Amwe mwaendithsi namwe mwakuru o mbunga! 9Ngeci eyi twipaweriwa rero po yekwama yoiwa eyi na i tendiwa ku thsikunga ci ngepi naa porithsiwa, 10amwe mwahe nanu wahe o mu Isiraele mu dimuke kenge ci ko dithzina dya Yesu Krisitu o ku Nazareta oyu mwambire pa mbinda, oyu a pindurire Nyambi kwafu, yo naa reta ci oyu mukwerume nemana pa rupara rwenu a pore. 11Yesu po yodiyo oyu variwa mu Mañoro kuninga ci:
“‘Diwe edi na mu kende amwe mwakwakuumba,
na di piruka diunthzi dyodikuru mu thsivaka mu mbango.’

12“Kuyoyithsiwa ka ku waniwire kwa wao, inene kwithsa dithzina dimweya muno mu kaye edi na di piwa munu ci tu roere ku yoyithsiwa kadyo.”

13Nthzango ou thza monine ondume wa Peturu na Johani no ku dimuka ci nedi anu o kukana ku cirongithsa, anu kawaye pohuma, thza komokire. A dimukire ci Peturu na Johani shime a ekaranga na Yesu. 14Unone ko ku mona oya mukwerume wa porithsiwire o ku nemanano, a pirire thso ku amba. 15Uno honi a tuminine ci a Peturu na Johani a tunde mu Nthzango, ngou honi a tatekire ku ciyongora mu kaciko. 16A ambire ci: “Ngepi tu wa tenda awa akwerume? Inene wahe awa a na tungu muno mu Yerusalema a na dimuka nawa ci a na kwama thsimonithso thso ku komokithsa, karo tumba tu twethsa ku thsi hamura. 17Uno honi ci eyi ya yuka, tu wa nomenithse ci a ku amba karo ku munu yupi nji yupi mu dithzina dya Yesu.” 18Ngou a wethserire mu Kuta karo no ku wa raerera nene ci katere a ku hukerepo ku amba nji ku rongithsa mu dithzina dya Yesu.

19Unone Peturu na Johani a tawire ci: “Mu rature yoyamwe mwathsinda, ethsi thsi na roera ne thsipi, ku yuvera amwe nji ku yuvera Nyambi? 20Eciko atwe po tumba tu twethsa ku thsia ku amba eyi na tu mono no ku yuva.”

21Ou a manine ku wa nomenithsa nene, a wa rukururire. Akwakuta a kwangire ku wana murandu o ku wa pera humbithso, inene anu wahe kuma shangarire Nyambi mukaci keyi ya tendaharire. 22Inene oya mukwerume wa porithsiwire ko thsimonithso po nedi wa myaka thzo ku piterera makumi ane (40).

Thsirombero thsakwakutawa

23Ou a rukururiwire, a Peturu na Johani a hukire kwaenthzo, no ku ka wa tongwera eyi a ka wa amberire akuru o mapurisita nakuru. 24Ou a yuvire eyo, akwakutawa a ciwanine no ku romba Nyambi ci: “Fumu, yowe wombire diwiru no kaye no mawate neyi i dimo yoihe. 25Wa ambire ko Mupepo Oukenu ko kanwa ka mupikoe mukwathsañuru wetu Davida ou aa ambire ci:
“‘Ine matunga eyi a na anthzipera?
Ine eyi a yongwera mambunga enu yo mbango?
26Mafumu o kaye a ciroithserire,
karo naendithsi nawo a ciwanine,
ku rwithsa Fumu na Mesiya wenthzi.’

27“Yoshemwa Heroda na Ponso Pilatu a ciwanine pofoci muno mu mbongi nAnukenge no Maisiraele ku rwithsa Yesu mupikoe o mukenu oyu wa wethsire. 28Yoihe eyi a kwamine, a i kwamine kokoro neshima yoe eci edi wa i pakire cimo. 29Fumu, o mone edi a tu kanya, karo o tu pe atwe twapikoe ku tongwera anu diywi dyoe kondume oukuru. 30O orore dyoko dyoe ku porithsa ekora, emonithso nekomokithsa i tendiwe ko dithzina dya mupikoe Yesu o Mukenu.”

31Ou a manine ku rombera, omo mu ndau ekarire thza ngangamine. Wahe a yarire Mupepo Oukenu, no ku tateka ku amba diywi dya Nyambi kondume.

Kucishima kwakwakutawa

32Wahe akwakutawa ekarire no mucima ofoci, neanekera yofoci pohuma, kwithsa oyu wa ningire ci rufumo oru ekarire naro po rwenthzi yofoci, unone kuma a i cierangire yoihe wahe mu kaciko. 33Kokoro oukuru, tunganda twa pire ombangi o kupinduka kwa Fumu Yesu kwafu, karo thsihemo thsa Nyambi thsothsikuru thsekarire kukwo wahe. 34Kwithsa oyu wa pirire thsinu mu kaciko, pakuninga ci awa ekarire no makanda nji manthzio a a urithsire no ku reta madi aa wanine pa miuro thzo. 35Kuma a retangire ku tunganda ao madi, awo aa erangerire munu no munu omu a foterire.

36Eci edi a tendire Josefa o Mulivi o ku diongo dya Sipera oyu wethsiwire ku tunganda ci Banabasi (kuninga ci Mwana Kutanarithsa). 37Wa urithsire dikanda dyenthzi no ku reta madi ku tunganda.