Acts 8

1Saule wa tawethzire kwipaiwa kwa Setefani.

Kereke thzaa nyandithsiwa no ku shandoka

Ku tunda edyo diyuwa, kereke thzo mu Yerusalema thza nyandithsiwire nene, akwakutawa wahe a panthzaanine ku thza mu matunga a Judea na Samaria, shime tunganda to twa thsiarire. 2Akwerume awa a cipakire kwa Nyambi a ka vumbekire Setefani no ku mu dira nene.

3Unone Saule wa tatekire ku hanyahanya kereke. Wa thzire mu nthzio no nthzio ku ka purututa akwakutawa wakwerume nambuyama no ku wa paka mu kamenga.

Filipu aa rongithsa mu Samaria

4Awo akwakutawa a panthzaanine kuma a thzire o honga diywi dya Nyambi kokuhe oku a thzire. 5Filipu wa urumukire ku thza mu mbongi thzo mu Samaria. Wa ka hongiremo ya Mesiya. 6Anu owangi a takamithsire ku teerera ku maywi a Filipu ou a yuvire no ku mona emonithso eyi a kwamine. 7Mipepo thzothzimango thza tundire kwanu owangi o ku thzi thza o kumba, karo anu wekunga nerema owangi a porithsiwire. 8Mweyo, kwekarire thsinyanyu thsothsikuru omo mu mbongi.

Simoni o masheno

9Uno honi kwekarire mukwerume o dithzina dyo Simoni omo mu mbongi oyu wa komokithsangire anu o mu Samaria ko masheno enthzi mu myaka thzothzingi. Kuma a cinunekangire ci munu o mukuru mu thsivaka. 10Anu wahe, akuru nanuke a mu twarerire nene maano, no ku amba ci: “Oyu mukwerume yodiyo okoro wa Nyambi ou u nethsiwa ci Oukuru.” 11A mu twarerire nene maano inene wa shimbire thsikati thsothsire o ku wa komokithsanga ko masheno enthzi.

12Uno honi anu ou a tawire Filipu ou a hongire yo Muthzimbu Ouwa o Kutumina kwa Nyambi no dithzina dya Yesu Krisitu, akwerume nambuyama a korovethziwire. 13Mane naye Simoni wa tawire no ku korovethziwa. Wekarangire pofoci na Filipu, karo wa komokangire emonithso nekomokithsa yoikuru eyi naa kwamanga.

14Tunganda to mu Yerusalema ou twa yuvire ci akwa Samaria a na tambura diywi dya Nyambi, a tumineko Peturu na Johani. 15Ou a ka kumineko a ka wa rombererire ci a tambure Mupepo Oukenu, 16inene Mupepo Oukenu o ku shime ku tura shaanga pa munu yofoci kukwo, unone kuma a korovethziwire pohuma mu dithzina dya Fumu Yesu. 17A Peturu na Johani ngou a wa kambekire moko o, awopo a tambura Mupepo Oukenu.

18Simoni ou a monine ci Mupepo wa piwire kwakwakutawa ko ku wa kambeka moko tunganda, wa wa pire madi ci a ure oo okoro. 19Wa ambire ci: “Name mu ni peko oku kukoro ci munu yomuhe oyu na ku kambeka moko ange a ku wane Mupepo Oukenu!”

20Peturu wa mu tawire ci: “O fe no madi oe, owe ne waa anekera ci thsipa thsa Nyambi kenge nga o thsi ura no madi! 21Ko piwa shaanga kacimbi mweyino ekwama, inene mucima woe kadi uwawa pa meho a Nyambi. 22O cere mwitenda yoe karo o rombere kwa Fumu, kuinashimi kenge a ku tetera mwianekera yo mucima woe. 23Inene naa mona ci o na yara ndurungera, karo o nangiwa kumango.”

24Simoni ngou a tawire ci: “Mu ni romberereko kwa Fumu yoyamwe ci eyi mu na amba katere i tendahare ku kwange.”

25Ou a manine ku pa ombangi no ku honga diywi dya Fumu, Peturu na Johani a hukire ku Yerusalema. A thzire o honga Muthzimbu Ouwa mu maumbo oangi a Samaria.

Filipu no nduna o Muetiopia

26Kangeru ka Fumu ngou ka amberire Filipu ci: “O katuke o thze ku mboera ku mukwakwa o mu dikunguthsitu ou u urumuka ku tunda ku Yerusalema ku thza ku Gaza.” 27Ngou a thzire, mu dikuñwa wa ciwanine no Muetiopia. Oyo mukwerume po nedi nduna o mukuru mu thsivaka, yodiyo wekarire mukwakunyunga rufumo rwa fumu o mbuyama Kandase o ditunga dya Etiopia. Kuma a tundire ku Yerusalema oku a thzire ku ka rombera. 28Apo honi o ku huka, o ku nekara mu ditemba dyenthzi o ku vara ko ku tanarithsa mu vuka thza mukwakukethza Isaya.

29Mupepo Oukenu wa amberire Filipu ci: “O henyene oko ku ditemba, o ka endere ku nyonga thzadyo.” 30Filipu ngou a cirerire oko ku ditemba no ku yuva oyu mukwerume o ku vara mu vuka thza mukwakukethza Isaya. Filipu wa mwipurire ci: “Ene waa i yuvithsithsa eyi o vara?”

31Wa tawire ci: “Ngepi nga ni i yuvithsithsa, shime ci munu a i ni tongwenene.” Ngou a rombire Filipu ci a thzine mu ditemba a kekare nenthzi.

32Eyi a varire omo mu Mañoro po eyi:
“Aa cipitura eci dingu edi di twariwa ku ka paiwa.
Karo aa cipitura eci dinguana dyo kukana ku dira o ku di keriwa,
ka a ambire thsimweya.
33Wa shwahuriwire karo wa tendiwire dipethso.
Edye nga tongonona yanahokenthzi?
Pakuninga ci mwoyo wenthzi wa shimbiwire pano pashi.”

34Oyo nduna wepurire Filipu ci: “O ni tongwere eyi a ambire mukwakukethza, ene yenthzi nji ya munu wao?” 35Filipu ngou a mu tongwenenine ku tatekera kao Mañoro ao, no ku mu tongwera yo Muthzimbu Ouwa wa Yesu.

36O kwa enda kengeyo omo mu mukwakwa a kumine apa kwekarire meyu. Oya nduna wa amberire Filipu ci: “O mone, meyu aa! Thsine thsi ni kwangithsa ku korovethziwa?” 37[Filipu wa tawire ci: “Kamona o tawa ko mucima woe ouhe waa twethsa ku korovethziwa.” Aye wa tawire ci: “Naa tawa ci Yesu Krisitu po Mwana Nyambi.”] ▼

▼Ka thzi di mu mañoro kutanga.

38Wa tuminine ci ditemba dimane. Filipu noyo nduna ngou a urumukire mu meyu momu widi wo, oyo nduna ayepo korovethziwa.

39Ou ombokire mu meyu, Mupepo wa Fumu wa twarire Filipu kwako, oya nduna ka a mu monine karo, unone wa shumunine mu ruendo rwenthzi o ku na nyanyuka nene. 40Unone Filipu wa ka ciwanine mu mbongi thza Azoto. Wa ka thzire o honga Muthzimbu Ouwa mu mambongi oahe mane shime ku ka kuma ku Sesarea.