Luke 15

Kathsimo ko dingu dyokuyonga

(Mat 18.12-14)

1Diyuwa dimweya, aterithsi nanu wevi a henyenine wahe kwa Yesu ku na mu teerera. 2Afarithsi narongithsi o murao a tatekire ku shonaura ci: “Oyu munu aa tamburanga anu wevi no ku dyano.”

3Unone Yesu wa wa terire kathsimo ci: 4“Ngeci ku kwenu kwaa di oyu di no mangu o makumi dikumi, apopo pa yonga dyofoci, ene nga ka a thsii ao o 99 mu murundu no ku ka fota edyo di na yongopo? 5O ku na ka di wana, kenge a di cikambeka pa mapee enthzi, ko thsinyanyu, 6no ku thza ku diumbo. Yoihe a ka kuma, aethsa ambushenthzi nowa a na cihatano, no ku amba ci: ‘Mu ni nyanyukithseko, inene ni na wana diya dingu dyange na di yongo.’ 7Naa mi tongwera ci kenge kwa kwikara thsinyanyu mu wiru pa munu o thsivi yofoci o ku cera, kupita anu o 99 owawawa, awa a na kana ku roera ku cera.

Kathsimo ko muwayawaya o kuyonga

8“Nji mbuyama o ku di no madi o dikumi o muwayawaya o silivera ci pa yonge muwayawaya ofoci ne, ene nga ka a muneka kambarambara no ku komba mu nthzio ku di fotafota shime ku di wana? 9Yoihe a di wana aethsa ambushenthzi nowa a na cihatano, no ku amba ci: ‘Mu ni nyanyukithseko, inene aya madi ange naa ni yongo ni na a wana.’ 10Mweyo, naa mi tongwera ci Nyambi no tungeru twenthzi aa nyanyuka munu o thsivi o ku na cera.”

Kathsimo ko mwana o kuyonga

11Yesu wa shumunine ko ku wa tera kathsimo ci: “Kwekarire munu yumweya oyu wekarire nana aidi. 12Minamunu wa amberire tata wenthzi ci: ‘Tata, o ni ere ku rufumo rwoe oru nga mba ni erako ku rupara.’ Tata wenthzi wa tawire no ku wa era etere momu widi wo.

13“Munyima thzo mayuwa oapu, mwane shoonye wa urithsire oro rufumo a mu pire no ku shimba madi ku thza ku ditunga dyo kure, oku a ka pethsapethserire madi enthzi ko kayoyero kokamango. 14Madi enthzi ou a pwire, kwekarire ndombo muya mu ditunga a thzire, wa tatekire ku nyanda. 15Wa thzire kwa munu yumweya omo mu ditunga ci a ka fote ko ekwama, aye wa mu twarire ku makanda ci a ka mu futithserange nguru thzenthzi. 16Wa cikumbwethzire ku dya namurungu oyu a pangire nguru, unone kwithsa o ku u mu pa.

17“Ku hura wa cikupurire ci: ‘Ku diumbo apika tata wahe aa dya yoihe eyi a na foto shime ku i thsiangapo, uno honi ame kuno naa fa ku nthzara. 18Kenge na ku huka kwa tata, wangu na ku ka mu ambere ci: “Tata, na ni pithsera Nyambi no kwipithsera owe. 19Ka ni roerire kwithsiwa ci no mwanoe, o ni pirure pohuma mupikoe.”’ 20Popo wa katukire no ku huka kwa tata wenthzi.

“O ku endera kokure kamanana no diumbo, tata wenthzi wa mu monine no ku mu yuvera ñekeñeke, wa mu cirerire no ku ka mu wera mu thsimbando no ku mu yamwa. 21Mwane wa mu amberire ci: ‘Tata, na ni pithsera Nyambi no kwipithsera owe. Ka ni roerire kwithsiwa ci mwanoe.’

22“Unone tata wenthzi wa amberire apikenthzi ci: ‘Mu yokorore! Mu rete evata yoiwa nene mu mu vateke. Mu mu shupeke kanthzea ku munwe no ku mu vateka mashangu kwidyato. 23Mu rete pohoana o mununu mu mu kañare tu tende dishambirera. 24Inene oyu mwanange shime aa fa, unone honi aa yoya. Shime aa yonga, unone honi na waniwa.’ Popo dishambirera dya tatekire.

25“Kethsiya thsikati mwanenthzi shokuru o ku ka di ku dikanda. Ou a ka hukire o ku kokera ku diumbo, wa yuvire anu o kwemba no ku shika maoma, o kwa kina. 26Wepurire yumweya kwapika ci: ‘Ine eyi i tendahara kuno?’ 27Aye wa mu tawire ci: ‘Minoe na ka huka, tata woe o na mwipaera pohoana o mununu, inene mwanenthzi na ka mu hukera no kafunda ko mwoyo.’

28“Mukurwamunu wa anthzipire nene, wa kanine no ku henyena oku dya tendaharerire dishambirera. Tata wenthzi wa punenineko ku ka mu hengawethza ci a thze ku dishambirera. 29Unone aye wa amberire tata wenthzi ci: ‘O na mono! Na ni ku kwamena myaka thzothzingi eci mupika, karo ka na kana ku yuvera thsiraerera thsoe. Unone ame wa diyerire o ni pa shaanga kamembeana ci ni cishambirere nambushange. 30Rero pano oyu mwanoe na a ka pethsapethsa rufumo rwoe mu ruthziho, uno a na ka huka o na mu paera pohoana o mununu.’

31“Tata wenthzi wa mu tawire ci: ‘Mwanange, owepo noe ni nekaranga myaka thzothzihe, yoihe eyi ni di nayo po yoe nowe. 32Twaa roera ku tenda dishambirera no ku nyanyuka, inene minoe shime aa fa, unone mu yumi. Karo shime aa yonga, unone na waniwa.’”