Luke 16

Kathsimo ko muendithsi o rufumo o mumango

1Yesu wa terire kathsimo erongwa yenthzi ci: “Kwekarire fumanyi oyu wekarire no muendithsi o rufumo rwenthzi. Diyuwa dimweya wa yuvire ci oyu muendithsi o rufumo rwenthzi po aa rwipithsa. 2Ñathsire oya munu wa mwithsire ci engene no ku mwipura ci: ‘Ine eyi ni yuva keyi yo muendithsero woe? Ni monithse enu yoihe, inene ko wa kwikara karo muendithsi o rufumo rwange.’

3“Oyu muendithsi o rufumo wa cipurire ci: ‘Ngepi ni tenda? Ñathsire wange aa ni tundithsa pekwama. Ka ni di nokoro o ku dima dikanda, karo ku kumbera kenge ya ku ni fithsa honyi. 4Ni na dimuka ethsi na ku tenda ci anu a ku ni tambure mu myanda thzo ou na ku tundithsiwa pekwama.’

5“Wethsire munu no munu oyu wa shimbire makongo kwa ñathsire wenthzi. Wepurire o kutanga ci: ‘Vungashi no korotera ñathsire wange?’

6“Wa mu tawire ci: ‘Makumi o dikumi o tuhupa to maathzi.’ Muendithsi o rufumo wa mu amberire ci: ‘O shimbe diñoro dyoe dyo makongo, ko wanguwangu o ñorepo makumi mutanu pohuma.’

7“Wepurire o muthsidi ci: ‘Owe ne vungashi no korotera ñathsire wange?’

“Wa tawire ci: ‘Mathsaka o makumi o dikumi o vuroto.’

“Wa mu amberire ci: ‘O shimbe diñoro dyo makongo, o ñorepo makumi mutanu na ahatu pohuma.’

8“Ñathsire oya muendithsi o kukana ku rurama wa mu shangarire nene, pakuninga ci kuma a kwamine konyanyami. Anu o muno mu kaye a di nonyanyami kupita anu o mu mwethzi komu a tendera enu mu kaciko.” 9Yesu wa shumunine ku amba ci: “Mu cifotere ambusha ko rufumo ro kaye ci shaanga apa mbo ru pwa mba mi tambure mu maumbo o diyere.”

10“Munu yomuhe o ku rurama keyi yoipu, kenge a ku rurama shaanga keyi yoingi, o kukana ku rurama keyi yoionye tumba a rurama shaanga keyi yoikuru. 11Ngeci ka mu ruramine ko rufumo ro kaye ne, ngepi mwa ku rurama ko rufumo roshemwa ro ku wiru? 12Ngeci ka na mu rurama keyi yanu amweya, oyu wa ku mi pa yo ku mi thsa ci yenu ne edye?

13“Kwithsa ngamba o ku kwamena añathsire aidi. Inene kenge a thzimbapo yofoci no ku shima yumweya, nji ku remekapo yumweya no ku shwahura yumweya. Tumba mu twethsa ku kwamena Nyambi no ku kwamena madi.”

Erongithsa imweya

(Mat 11.12-13; 5.31-32; Mar 10.11-12)

14Afarithsi awa shimine nene madi ou a yuvire eyo, a mu teururire. 15Yesu wa wa amberire ci: “Yamwe mu na cimonithsanga pa meho anu ci mwawawa, unone Nyambi po na dimuka micima thzenu. Ethsi a na remeka anu, pa meho a Nyambi po aa thsi mona ci omango o kupiterera.

16“Murao wa Mushe neyi a ambire akwakukethza na i kwama, shime ku na kuma mu thsikati thsa Johani Mukwakukorovethza. Ku tunda apo, Muthzimbu Ouwa o Kutumina kwa Nyambi waa hongiwa, anu wahe aa ootera ci engene mu Kutumina kwa Nyambi. 17Kenge nga iotopa ci diwiru no kaye i pwe kupita ku tundithsa ku murao wa Nyambi.”

18“Mukwerume yomuhe o ku rukurura munuwenthzi no ku yeka wao na rembeka, o ku yeka mbuyama oyu naa rukururiwa na rembeka.

Fumanyi na Lazaro

19“Yesu wa ambire ci, kwekarire mukwerume o fumanyi oyu naa vatanga evata yo muvara o muhombohombo yo ku tura nene, wa yoyire nawa mayuwa oahe. 20Pa thsero thzenthzi na retangapo hepwe o dithzina dyo Lazaro oyu wa korire eronda. 21Wa kuruperangire ci kenge na a dya kumwamwauthzi ou u wa ku tafure thza fumanyi. No mbwa thza keyangire ku na mu rathsa peronda yenthzi.”

22“Oya hepwe ou a fire, tungeru twa keyire ku na mu shimba, ku kekara ku nyonga thza Aburahama. Oya fumanyi naye wa fire, ayepo vumbekiwa. 23Oya fumanyi o ku di mu ndau thzafu ▼

▼Dihere, Hadesi.

kengeyo, wa nyandire nene. Wa monine Lazaro o ku di ku nyonga thza Aburahama o kwa di kokure. 24Fumanyi wa ambire ko ku kumba ci: ‘Tata Aburahama, o ni fere ñeke, o tume Lazaro ci a cimbeke munwe wenthzi mu meyu, naa ni hoyithsere pa rudimi, inene naa yuva nene kukora muno mu mirengi!’

25“Unone Aburahama wa mutawire ci: ‘Mwanange, o anekere thsiya thsikati o ku yoya nawa, shime waa piwa yoingi yoiwa, unone Lazaro aye po wekarire mu dikando. Thsino po thsikati thsenthzi naye thso ku yoya nawa kuno, uno honi nowe waa nyanda. 26Ku tundapo ko u di mutapo oukuru outhzungi mu kaci ketu namwe, ci awa fota ku keya mu thsambwedyo a pire ko ku pitera, nowa a fota ku keya mu thsambwadino nawo a pire ko ku pitera.’

27“Fumanyi wa tawire ci: ‘Mbecipo dyo i di kengeyo, naa ku adikanena tata, o tume Lazaro ku nthzio thza tata, 28inene kwa di aminange nakurwange o mutanu wakwerume, a ka wa nomenithse ci katere a ku keye muno mu ndau thzo makando ni di.’

29“Aburahama wa tawire ci: ‘Mushe nakwakukethza na nomenithsa awo aminoe nakurwoe, a wa teerere.’

30“Fumanyi wa tawire ci: ‘Dyombo, tata Aburahama! Tumba i cishoko no mufu o ku na pinduka ku ka wa tongwera. Kenge a ka mu yuva no ku cera ekwama yo yoimango no ku thsiurukera kwa Nyambi.’

31“Unone Aburahama wa mu amberire ci: ‘Ngeci po kadi akwa ku yuva ya Mushe nakwakukethza, shaanga mufu nga pinduka tumba nga ka rakwa.’”