Luke 17

Thsivi

(Mat 18.6-7,21-22; Mar 9.42)

1Yesu wa amberire erongwa yenthzi ci: “Enu eyi ya ku huwa anu no ku wa retera ci a tende thsivi i na roera ku keya. Uno honi o di nothsimo munu oyu wa ku i reta. 2Ku di nawa ci nga a angereriwa diwe dyodiremu mu thsingo no ku konthzeriwa mu diwate, kupita ci a withse awo owaonye. 3Mweyo mu cinyunge!

“Ngeci muenthzoe ayepo kwipithsera, o mu kuturure, ngeci ayepo cera, o mu kwatere. 4Shaanga ci aa kwipithsera miendo thzo mutanu na thzidi mu diyuwa, o ku keyanga ku na amba ci: ‘Ni na cera,’ o mu kwatere.”

5Tunganda twa amberire Fumu ci: “O tu vungithsere ku thsitawo thsetu!”

6Fumu wa tawire ci: “Nga mu di no thsitawo shaanga thso ku kuma pa dinanda dyotata kenge nga mu twethsa ku ambera ethsi thsitondo thsokuyu ci: ‘O thzuruke o ka cishishe mu diwate!’ Kenge nga thsi mi yuvera.

7“Tu fekithse kenge ci ku kwenu kwaa di oyu di no ngamba o ku mu dimena dikanda dyenthzi nji ku ka mu futithsera mangu. Yoihe a ka huka ku dikanda, ene kenge nga a mu ambera ci: ‘O keye no dye’? 8Dyombo, kenge a mu ambera ci: ‘O ni kwamene murarero karo o ciroithse no ni pe edya ni dye no ku nwa. Ou ni mana ku dya nowe mbeci honi o dye no ku nwa.’ 9Ene oya ñathsire oya ngamba ne kenge a kanderera koya ngamba pakuninga ci o na kwama yoihe eyi a na mu tumina nji? 10Namwe dyo mu di kengeyo, o ku mu na kwama enu yoihe eyi mu na tongweriwa ku kwama mwaa roera ku amba ci: ‘Atwe po twangamba pohuma, twaa kwama eyi tu na roera ku kwama.’”

Yesu aa porithsa akwengondwe o dikumi

11Yesu o ku thza ku Yerusalema wa pitire mu kaci ka Samaria na Galilea. 12O ku wingena mu diumbo akwerume o dikumi wengondwe a mu hanganine. Emanine kokure nenthzi. 13A kuererire ko diywi dyodikuru ci: “Yesu, Ñathsire wetu! O tu fere ñeke.”

14Ou a wa monine wa wa amberire ci: “Mu thze ku mapurisita a ka mi mone.” O kwa ka thza kengeyo, wahe a porire.

15Yumweya kukwo ou a monine ci na poro, wa hukire kwa Yesu o ku shangara Nyambi ko diywi dyodikuru. 16Wa na wererire ku mauru a Yesu no ku kanderera ku kwenthzi, karo oyu mukwerume po Musamaria.

17Yesu wepurire ci: “Ene kadi akwa dikumi waya a na porithsiwa? Awaya amweya o mutanu nane ne kupi a di? 18Ene kwithsa shaanga yofoci kukwo oyu na ka huka ku na shangara Nyambi shime oyu mutundakure?” 19Wa mu amberire ci: “O katuke o thze, thsitawo thsoe thsi na ku porithsa.”

Yo kukeya ko Kutumina kwa Nyambi

(Mat 24.23-28,37-41)

20Diyuwa dimweya, Afarithsi epurire Yesu ci: Diyuwa dipi kwa ku keya Kutumina kwa Nyambi? Aye wa wa tawire ci: “Kutumina kwa Nyambi po ka kwa ku keya ko thsimonithso thso ku twethsa ku moniwa ko meho, 21nji anu ku amba ci: ‘Kuno ku di kuno’ nji ‘kuya ku di kuya,’ Inene Kutumina kwa Nyambi po mu kaci kenu ku di.”

22Wa amberire erongwa yenthzi ci: “Thsikati thsaa keya ethsi mwa ku fota ku mona Mwana Munu mu diyuwa edi a ku ka huka, unone ka mwa ku di mona.” 23Anu kenge a ku mi tongwera ci: “Mwana Munu oya di kuya, nji ci ono di kuno! Unone mwa ku thzako nji ku wa shupwera. 24Eci kwethsa ko mvura edi ku nethsanga ku wiru ku tunda ku hura thzimweya ku thza ku hura thzimweya, dyo kwa kwikara no mu diyuwa edi a ku keya Mwana Munu. 25Unone Mwana Munu aa roera ku nyandithsiwa tango no ku kaniwa kwanu o rerodino.”

26“Dyodi yekarire mu thsikati thsa Nuwe dyo ya kwikara no mu thsikati thsa Mwana Munu. 27Anu shime aa dya, aa nwa, ku yeka no ku yekithsiwa shime ku na kuma mu diyuwa edi engenine Nuwe mu areka. Dimina dyodikuru dya paire anu wahe.

28“Dyo yekarire no mu thsikati thsa Lota, anu shime aa dya, aa nwa, aa ura no ku urithsa karo shime aa kuna no ku umba, 29shime ku na kuma mathsikuthsiku o diyuwa edi a tundire Lota mu Sodoma, kwa rokire mudiro no sulufura ku wiru no ku na wa thzirithsa wahe.

30“Dyo ya kwikara no mu diyuwa edi a ku hokoriwa Mwana Munu. 31Mwedyo diyuwa munu oyu di pa thsituwa thso nthzio ka a roerire ku shiruka ci a ka shimbe etere mu nthzio thzenthzi. Noyu ka di ku dikanda ka a roerire ku ka huka ku diumbo. 32Mu vuruke eyi ya tendaharire kwa munu wa Lota! 33Munu yomuhe o ku shima nene mwoyo wenthzi kenge a ku u yawa. Unone o ku shuva mwoyo wenthzi kenge a ku u yoyithsa. 34Naa mi tongwera, mo uya othsiku kwanu aidi awa a na rara podidi ofoci, yumweya kenge a ku shimbiwa yumweya kenge a ku thsiiwa. 35Ambuyama aidi awa a twa mu kakunthzu kofoci, yumweya kenge a ku shimbiwa yumweya a ku thsiiwe. 36[Anu aidi awa di ku dikanda yumweya kenge a ku shimbiwa yumweya a ku thsiiwe.]”

37Erongwa yenthzi ya mwipurire ci: “Fumu, ene kupi ya ku tendaharera eyi?”

Yesu wa i tawire ci: “Oku ku di thsinu thso kufa kodiyo a ciwanawanena makwi.”