Luke 19

Yesu na Zakiya

1Yesu ou engenine mu Jeriko wa cinakanine mbongi. 2Omo kwekarire mukwerume o dithzina dyo Zakiya nduna waterithsi o fumanyi. 3Wa fotire ku mona Yesu ci munu o ngepi, unone wa kwangire mukaci kongi anu no wipi wenthzi. 4Mweyo, wa cirerire ku rupara no ku ka thzina ku thsitondo thsokuyu ci a mone Yesu ou a pita, inene modiyo dya piterire dikuñwa.

5Yesu ou a kumine mwimi thzathso, wa kengire ku wiru oku a thzinine Zakiya no ku mwithsa pa dithzina dyenthzi ci: “Zakiya, o yokorore o shiruke, naa fota ku kekara mu nthzio thzoe rero.” 6Zakiya wa shirukire ko wanguwangu no ku tambura Yesu ko thsinyanyu.

7Anu wahe awa i monine a tatekire ku shonaura ci: “Oyu munu ne, o na thzi ku kekara mwenda wa munu o thsivi.”

8Zakiya wemanine no ku tongwera Fumu ci: “Fumu, o mone, kenge ni tepa pa kaci rufumo rwange, rumweya kenge na ku ru pa ahepwe. Ngeci ko a di oyu na ni shimbera madi ko makupakupa, kenge ni a mu huthseramo rune.”

9Yesu wa mu amberire ci: “Thzi na tambura kuyoyithsa thzino nthzio rero, pakuninga ci oyu munu naye mwana wa Aburahama. 10Inene Mwana Munu kuma naa keyera ku na fota no ku yoyithsa awa na yongo.”

Kathsimo kapika o dikumi

(Mat 25.14-30)

11Anu wahe o kwa teerera eyo o kwa kokera ku Yerusalema, Yesu wa shumunine ku wa tera kathsimo ku wa thsiurura kwianekera yo yo kuninga ci Yesu yoihe a ka kuma pohuma mu Yerusalema Kutumina kwa Nyambi kwaa keya popo. 12Wa wa amberire ci: “Munu yumweya o ku mukuta o thsifumu wa thzire ku ditunga dyo kure ku ka mu tungithsa pofumu no ku ka huka. 13O ku shime ku thza wethsire tango angambenthzi o dikumi no ku pa munu no munu madi o mihorero thzihatu. ▼

▼Mu Thsigerike po minasi thzi dipo.

No ku wa ambera ci: ‘Mu a kwamithse a ku vure, kenge na ku na a wana, ou na ku ka huka.’

14“Unone anu o mu ditunga dyenthzi a mu thzimbire, a tumine tunganda munyima thzenthzi ku ka amba ci: ‘Ka tu fotire oyu munu ku tu tumina.’

15“Ou a ka pwire ku ka tungithsiwa pofumu, wa ka hukire ku diumbo. Wethsire angambenthzi waya a pire madi ci a mone ci vungashi naa wanenapo munu no munu.

16“O kutanga wa keyire no ku na amba ci: ‘Ñathsire wange, pa madi oe na ni wanenapo dikumi.’

17“Ñathsire wenthzi wa mu amberire ci: ‘No kwama nawa, owe o ngamba o muwawa! Pakuninga ci no rurama mwinu yoipu, naa ku pa kwikara nokoro peuru thzo maumbo o dikumi.’

18“O muthsidi naye wa keyire no ku na amba ci: ‘Ñathsire wange, pa madi oe na ni wanenapo mutanu.’

19“Oyu naye ñathsire wenthzi wa mu amberire ci: ‘Nowe naa ku pa ku endithsa mambongi mutanu.’

20“Ngamba yumweya karo wa keyire no ku na amba ci: ‘Ñathsire wange, madi oe aa, mu katauro na ni a angerera. 21Na ni ku yapa pakuninga ci o munu o mukaru, waa shimbanga enu eyi i na ningi ci kadi yoe no ku cora omu no ka na ku kuna.’

22“Fumu wa mu amberire ci: ‘Owe o ngamba o mumango, kenge ni ku ratura keyi o na amba. Ngeci no dimuka ci no munu o mukaru oyu na shimbanga enu eyi i ninga ci kadi yange no ku cora omu na ni kana ku kuna, 23ine eyi no kana ku ka a paka aa madi ange mu panga? Uno ni na ka huka nga ni na wanenapo ko peuru.’

24“Wa amberire awa emanine apo ci: ‘Mu a mu nyange, mu a pe oya naa wanenapo madi o peuru o dikumi.’

25“Awo a mu tawire ci: ‘Ñathsire wetu, oyu po o di noa o dikumi kare.’

26“Wa wa tawire ci: ‘Munu yomuhe oyu di neyi yoingi kenge a ku vungithsiwerapo. Unone oyu na piri kenge a ku nyangiwa noka kokapu a di nako. 27Uno honi naa ambera awa akwethzimbo yange, waya na kana ku fota ci nga ni nekara fumu, mu wa rete kuno mu wepaere pa meho ange o ku ni na wa tanekera.’”

Fumu Yesu aengena mu Yerusalema

(Mat 21.1-11; Mar 11.1-11; Joh 12.12-19)

28Yesu ou a manine ku amba eyi, wa wa tangererire ku thza ku Yerusalema. 29O ku kokera mu Betifage na Betania, pa mukinya ou u nethsiwa Mukinya wEtondo yo Miywera, wa tumine anu aidi perongwa yenthzi. Wa wa amberire ci: 30“Mu citangethze muya mu diumbo dyo ku rupara, ou mu kengena mu diumbo kenge mu ka wana thsindongiana ethsi thsi na fungereriwa, ethsi a kana ku pahama munu, wangu mu ka thsi puture, mu ka thsi rete kuno. 31Yomuhe oyu ka mipura ci: ‘Ine eyi mu thsi putwera?’ Mu ka mu ambere ci: ‘Aa thsi fota Fumu.’”

32Awa a tumiwire a ka wanine enu yoihe eci edi a i ambire Yesu. 33O kwa putura thsindongiana athsinda wathso a wepurire ci: “Ine eyi mu thsi putwera?” 34Awo a tawire ci: “Aa thsi fota Fumu.” 35Erongwa ya twarire ethso thsindongiana kwa Yesu. A ka yarirepo ekoveyo yo no ku shimba Yesu ku mu pahamithsapo. 36O ku tateka ku enda, anu a yarire ekoveyo yo mu dikuñwa ku rupara.

37Yesu o ku kokera ku Yerusalema apa dya tatekera dikuñwa ku urumuka ku tunda pa Mukinya wEtondo yo Miywera, erongwa yenthzi yoihe ya tatekire ku tenda muyoyo ko thsinyanyu no ku shangara Nyambi mukaci kekomokithsa yoikuru eyi ya monine ci:
38“Wa thsiyauthzi Fumu oyu keya mu dithzina dya Nyambi, ^b
thsiyaro thsikare mu diwiru no kutethzima kwikare kwa Nyambi.”

39Afarithsi awa ekarire mukaci ko mbunga a amberire Yesu ci: “Murongithsi, o kuturure erongwa yoe i tutware.”

40Aye wa wa amberire ci: “Shaanga o i tutware, aa mawe kenge a kuerera.”

Yesu aa direrera Yerusalema

41Yesu ou a kokerire mu Yerusalema no ku mona mbongi, wa thzi dirererire ci: 42“Mayuwane owe kwanu wahe, nga o na dimuka rero pano eyi nga ya ku ku retera thsiyaro! Unone honi i na horekiwa ku meho oe. 43Mwao mayuwa akwethzimbo yoe kenge a ku keya ku na ku thzinguruka ku ku paka mu thsipaka, ku ku paka mu kaci ku ku yanthzera kokuhe. 44Kenge a ku ku umburura no kwipaa anoe awa di mu kaci koe. Kwithsa diwe edi dya ku thsiara o ku di di peuru thzo diwe dimweya, inene ko no nangura thsiya thsikati naa keya Nyambi ku koe, ku na ku yoyithsa.”

Yesu aa thza ku Tembere

(Mat 21.12-17; Mar 11.15-19; Joh 2.13-22)

45Yesu ou engenine mu Tembere wa cithzacithzire awa a urithseriremo. 46Wa wa amberire ci: “Ku na ñoriwa kenge ci: ‘Nthzio thzange po nthzio thzerombero,’ ^c uno honi amwe mwaa thzi pirura macihoreko ethzi.” ^d

47Yesu wekarangire mu Tembere diyuwa no diyuwa o ku rongithsa. Akuru o mapurisita narongithsi o murao nakuru o mbunga a fotire ku mwipaa. 48Unone ka wanine thsikati nawa, inene mbunga kuma thza koñomekire ku mu teerera.