Luke 20

Yesu aepuriwa pokoro wenthzi

(Mat 21.23-27; Mar 11.27-33)

1Diyuwa dimweya Yesu o ku rongithsa mu Tembere no ku tongwera anu Muthzimbu Ouwa o Kutumina kwa Nyambi, akuru o mapurisita, arongithsi o murao nakuru, a keyire ku kwenthzi. 2A ambire ci: “O tu tongwere, eyi o kwama ne wa i kwama kokoro wa dye? Edye naa ku pa oo okoro?”

3Wa tawire ci: “Tango ni mipure ngudi, 4ene okoro wa Johani o ku korovethza ne waa tunda ku wiru nji kwanu?”

5A ciyongorire mu kaciko no ku amba ci: “Ngeci o tu ninge ci ‘Waa tunda ku wiru,’ kenge a twipura ci: ‘Ine eyi na mu kana ku tawa yenthzi?’ 6Karo ngeci o tu ninge ci ‘Waa tunda kwanu,’ anu wahe kenge a tu povaura no mawe, inene awopo aa rakwa ci Johani po mukwakukethza.”

7Mweyo, a tawire ci: “Ka tu dimukire oku wa tundire.”

8Yesu wa ambire ci: “Name ka ni mi tongwera oku u tunderera ou okoro ni kwamithsa eyi enu.”

Kathsimo kakwakunyunga dikanda owamango

(Mat 21.33-46; Mar 12.1-12)

9Yesu wa terire anu aka kathsimo ci: “Mukwerume yumweya wa dimine dikanda dyo veine, wa di pire mu moko anjimi amweya no ku thza ku ditunga dyo kure oku a kekarire myaka thzothzingi.” 10Pa thsikati thso ku koyora veine wa tumineko mupikenthzi ko waya anjimi ci a ka mu shimbereko ku veine oyu na koyora muya mu dikanda. Unone awo anjimi a ka mu furire no ku mu huthsa mokomoko. 11Wa tumineko mupikenthzi yumweya, unone naye karo a ka mu furire no ku mu kwama omango no ku mu huthsa mokomoko. 12Wa tumineko o muthsihatu, awopo a ka mu kurura no ku mu cithzacithza ku mu tundithsa mu dikanda.

13Unone thsinda thsa dikanda wa cipurire ci: “Ngepi na ku tenda? Kenge na ku tumako mwanange pakamutwa oyu na shima nene, kuinashimi kenge a ku ka mu remeka.”

14Unone awo anjimi ou a mu monine, a ciyongorire ci: “Na kumu shwana, tu mwipaenu twa ku shwane dikanda dyo veine.” 15A mu tundithsire mu dikanda dyo veine no ku mwipaera ku nganga thzo dikanda.

“Thsine a ku kwama oya thsinda thsa dikanda dyo veine ko waya anjimi? 16Naa mi ambera ci kenge a ku keya no ku na wepaa waya anjimi no ku shimba dikanda dyo veine ku di paka mu moko anjimi amweya.” Anu ou a i yuvire a ambire ci: “Mbera ya tendahara.”

17Yesu wa wa tanekerire no ku amba ci: “Eyi i na ñoriwa ne yaa tongora ine yo ku amba ci:
“Diwe edi na kende akwakuumba,
di na piruka diunthzi dyo nthzio.” ^a

18Munu yomuhe o ku werapo kenge a ku cinathzoka tupinthzipinthzi, oyu dya ku wera kenge dya ku mwororora.

Anu aepura yo ku tera mutero kwa Sesare

(Mat 22.15-22; Mar 12.13-17)

19Arongithsi o murao nakuru o mapurisita a fotire dyo kwanga Yesu wanguwangu, inene a dimukire ci ako kathsimo po ka shembo thzo ku thsangera ku kwo, unone a yapire anu.

20A fotire thsikati thso ku kwata Yesu, aendithsi ngou a tumine matikitivi kwa Yesu awa a cimonaharithsire eci awawa. Kuma a mu tire pa rudimi ci a ka mu kwatithse kwa nguvuru o muroma.

21Aa matikitivi a mwipurire ci: “Murongithsi, tu na dimuka ci waa ambanga no ku rongithsa yoshemwa. Karo tu na dimuka ci ko wa wana mavwevwe, unone waa rongithsanga ko shemwa dikuñwa dya Nyambi. 22O tu tongwere, ene yaa tawethziwa ci atwe tu tere mutero kwa Sesare nji ngepi?”

23Unone Yesu wa dimukire dinyanyamena dyo, ngou a wa amberire ci: 24“Mu ni monithse muwayawaya. Ethsi thsikupuro nodi dithzina i dipo ne yadye?”

A mu tawire ci: “Ya Sesare.”

25Yesu wa wa huthsire ci: “I na roo, mu pe Sesare ya Sesare, no Nyambi mu mu pe ya Nyambi.”

26A kwangire ku mu kwata ko mangudi komu a wa tawerire pa meho anu. A komokire edi a wa tawire, awopo a tutwara.

Asaduki aepura yo kupinduka kwafu

(Mat 22.23-33; Mar 12.18-27)

27Asaduki, anu o kukana ku tawa ci ko ku di kupinduka kwafu, a keyire kwa Yesu ku na mwipura. A ambire ci: 28“Murongithsi, Mushe wa tu pire murao o kenge ci: ‘Ngeci mukwerume aa fa ku thsia munuwenthzi ko kupira ana, mukurwe nji minenthzi aa roera ku mu yeka ci erekere minenthzi nji mukurwe ana.’ 29Unone honi kwekarire ana munu yofoci o mutanu naidi wakwerume. O kutanga wa yekire mbuyama no ku fa o ku shime ku wana nenthzi ana. 30O muthsidi 31noyu o muthsihatu wahe a mu yekire mane wahe mu dira dyo akwa mutanu naidi a mu yekire no ku fa, unone kwithsa shaanga yofoci oyu wa wanine nenthzi ana. 32Kuhura naye mbuyama wa fire. 33O tu tongwere, oya mbuyama mu diyuwa dyo kupinduka kwafu ne kenge a kwikara munu wadye, inene wahe akwa mutanu naidi a mu yekire?”

34Yesu wa tawire ci: “Anu o kano kaye aa ciyeka. 35Unone anu o kaye aka ka keya, awa na roera ku pinduka kwafu mbera ka yeke nji ku yekithsiwa. 36Mbera ka fu karo, inene kenge mbekara eci tungeru. Awopo ana Nyambi, inene kenge mba pindukera mwoyo. 37Kokuthza keyi yo kupinduka kwafu, no Mushe aa monithsa nawanawa mwiambaura yo thsipukumuna o ku thsi yuuma. Aethsa Fumu ci Nyambi wa Aburahama, Nyambi wa Isaka no Nyambi wa Jakovo. ^b 38Eyi yaa monithsa ci aye po kadi Nyambi wa afu, unone Nyambi wayumi, inene ku kwenthzi wahe ayumi.”

39Arongithsi o murao amweya a ambire ci: “O na amba nawa murongithsi.” 40Ku tunda apo karo kwithsa oyu wa keshukire ku mwipura mangudi amweya.

Mesiya ne mwana edye?

(Mat 22.41-46; Mar 12.35-37)

41Yesu wepurire ci: “Ine eyi a na ambangera ci Mesiya po Mwana Davida?” 42Davida yothsinda wa ñorire mu vuka thzo Membo ci:
“Fumu wa amberire Fumu wange ci:
‘O wikare ku dyoko dyange dyo rudyo.
43Ku ka kuma mu diyuwa
edi na ku pirura akwethzimbo yoe thsipura thso mauru oe.’ ^c

44“Ngeci Davida aethsa Mesiya ci Fumu wenthzi, ngepi karo edi nga ekara mwane.”

Yesu aa shomorora arongithsi o murao

(Mat 23.1-36; Mar 12.38-40)

45Anu wahe o kwa teerera, Yesu wa thsiurukerire kwirongwa yenthzi no ku amba ci: 46“Mu mamere arongithsi o murao, aa thzimbanga ku endaura mu makuñwa o kwa na vata evata yoire no ku fota ku vumeneniwa ko direma mu maurithsero. Aa cihangweranga epura yo direma mu masinagoge no kwikara mu mandau o direma pedika. 47Aa pupirikanga mafakathzi no ku wethzera mu manthzio o ko mahetaheta o ku wa tenderanga erombero yoire. Humbithso thzo kenge thza kwikara thzothzikuru.”