Luke 21

Nupu thza difakathzi

(Mar 12.41-44)

1Yesu o ku di mu Tembere wa tanekerire afumanyi o kwa konthzera nupu thzo mu kakoño. 2Karo wa monine difakathzi o hepwe o ku konthzeramo tuwayawaya twidi totuonye. 3Yesu wa ambire ci: “Naa mi tongwera yoshemwa ci oyu difakathzi o hepwe nupu thzenthzi thzi na piti thzanu wahe. 4Inene wahe po kuma a na pa ekunda yo ku tundithsa poyi yoshongi a di nayo, uno honi aye muhepwe wenthzi na pakamo kokahe apa a na roera ku yoyera.”

Kwipa ko Tembere nekati yo mahurerero

(Mat 24.1-2; Mar 13.1-2)

5Erongwa imweya kuma ya ambaurire yo Tembere, edi thza yengiwire ko mawe oawa no nupu ethzi thza piwire Nyambi. Yesu wa ambire ci: 6“Yoihe eyi mu mona thsikati thsaa keya apa ya ku shandathzokera, kwithsa diwe edi dya kwikara peuru thzedi dimweya.”

Dikarara no kunyandithsiwa

(Mat 24.3-14; Mar 13.3-13)

7Ya mwipurire ci: “Murongithsi, eyo ne diyuwa dipi ya ku tendahara? Thsine thsa kwikara thsimonithso ci pepi i di no ku tendahara?”

8Yesu wa i tawire ci: “Mu mamere ci mwa kwangeriwa, inene owangi kenge a ku keya mu dithzina dyange no ku amba ci: ‘Yame no Mesiya!’ karo ‘no thsikati thsi na kumu!’ Unone mwa ku wa shupwera. 9Mwa ku yapa ou mwa ku yuva yo mandwa netaraka. Inene eyo yaa roera ku tanga ku tendahara, uno honi kupwa ko kaye ka kwa ku keya popo.”

10Wa shumunine ku amba ci: “Ditunga kenge dya ku cirwithsa no ditunga dimweya, no kutumina kenge kwa ku cirwithsa no kutumina kumweya.” 11Kungangama kokukuru ko kaye, ndombo nekora yo kwipaa yo ku yambukera kenge ya kwikara mu mandau oangi, yo ku yapithsa nemonithso yo ku wiru kenge ya kwikarako.

12O ku i shime ku keya yoihe eyo kenge a ku mi kwata no ku mi nyandithsa mu masinagoge no ku mi paka mu tumenga. Kenge a ku mi twara ku mafumu naendithsi mukaci kange. 13Ethso thsodiyo thsikati thsothsiwa ethsi mwa ku twethsa ku pa ombangi o dithzina dyange. 14Mweyo, mu ture micima, mwa cithzekera cimo edi mwa ku amba ko ku ciamwena mwathsinda. 15Inene ame kenge na ku mi pa maywi nonyanyami ci kwa kupire shaanga yofoci kwakwethzimbo yenu oyu wa ku twethsa ku mi kanana nji ku hamura eyi mwa ku amba. 16Kenge a ku mi omba ashemienu, akuruenu naminenu, apenu nambushenu, karo kenge a kwipaako amweya ku kwenu. 17Anu wahe kenge a ku mi thzimba mukaci kange. 18Unone shaanga kengeyo kwithsa dihuki shaanga dyofoci dyo ku mitwi thzenu edi dya ku yongako. 19Kothzui wenu kenge mwa ku yoyithsa myoyo thzenu.

Yesu aa amba yo ku shandoka kwa Yerusalema

(Mat 24.15-21; Mar 13.14-19)

20“Apa mbo mu mona Yerusalema o ku na thzingurukiwa ku mashwarare oangi mu dimuke ci kwipa kwenthzi pepi ku di. 21Popo awa di mu Judea a ku cirere ku mikinya, awa di mu Yerusalema a ku tundemo, awa kwikara mu murundu katere a ku ka huke ku diumbo. 22Ao po odiyo mayuwa a Nyambi o ditoto, ci i citombore yoihe eyi ya ñoriwire. 23Mayuwane othsimo wambuyama awa kwikara poremu nowa ku yamwithsa mwao mayuwa, inene pa kaye kenge pa kwikara dikarara karo Nyambi kenge a ku anthzipera nene anu. 24Kenge a kwipaiwa ko myere, matunga oahe a ku wa kupare, karo anukenge a ku dyaterere Yerusalema shime thsikati thso ou thsa ku pwa.

Kukeya kwa Mwana Munu

(Mat 24.29-31; Mar 13.24-27)

25“Emonithso kenge ya kwikara pa diyuwa, pa ngonda no pa matungwethzi, matunga pa kaye kenge a ku cithzekera no ku yapa muvumo no mañithsingi o diwate. 26Anu kenge a ku pwerera muñupe ko wowa o ku anekera eyi ya ku keya pa kaye, inene yoshokoro yo mu wiruwiru kenge ya ku ngangamithsiwa. 27Mwethso thsikati anu wahe kenge a ku mona Mwana Munu o ku keya mu divui kokoro no kutethzima kokukuru. 28Ou ya ku tateka ku tendahara yoihe eyi mwa kwimane no ku diamena ku wiru, inene kupaturiwa kwenu pepi ku di.”

Erongithsa yo thsitondo thsokuyu

(Mat 24.32-35; Mar 13.28-31)

29Yesu wa wa tererire kathsimo ci: “Mu mone thsitondo thsokuyu netondo yoihe. 30Kamona i mena mamuna yoyamwe mwathsinda mwaa dimuka ci mvura pepi a di. 31Mofoci, ou mwa ku mona yoihe eyi o ku i tendahara mu dimuke ci Kutumina kwa Nyambi pepi ku di.

32“Naa mi tongwera yoshemwa ci awa yoya thsino thsikati ka ku fererera wahe eyi enu o ku i shime ku tendahara. 33Diwiru no kaye kenge ya ku pwa uno honi diywi dyange adyo mbera ka di pu.”

Mu mamere

34“Mu mamere micima thzenu ci katere thzi anekere pohuma yedika no mawarwa necoyoka yo mwoyo, ci edi diyuwa katere dya ku mi wane ko thsiundumukera. 35Inene edi diyuwa kenge dya ku wera anu o kano kaye eci thsimbande. 36Mu taterere o ku mu rombera thsikati thsothsihe ci mwa ku wane okoro o ku para kweyi ya ku keya yoihe no ku kemana pa rupara rwa Mwana Munu.”

37Ao mayuwa ao Yesu kuma a rongithsangerire mu Tembere mutenya, othsiku kuma ekarangire pa Mukinya wEtondo yo Miywera. 38Anu wahe kuma a menekerangire ku Tembere ku ka teerera ku kwenthzi.