Luke 22

Kayongo ko kwipaa Yesu

(Mat 26.1-5; Mar 14.1-2; Joh 11.45-53)

1Thsidika thso Makende o kupira Mamene ethsi thsi nethsiwa ci Paseka o ku thsi di po pepi no ku tendahara, 2akuru o mapurisita narongithsi o murao a cekire dyo kwipaa Yesu, unone kuma a yapire anu.

Judasi aa tawa ku omba Yesu

(Mat 26.14-16; Mar 14.10-11)

3Satana wa tumaurire Judasi Isikariota yumweya o tunganda twa Yesu to dikumi na twidi. 4Judasi ngou a thzire kwakuru o mapurisita no kwitumi yakwakunyunga Tembere ku ka cekano edi nga a twethsa ku omba Yesu. 5Judasi wa wa nyanyukithsire nene shime a mu kumbwethza ku mu pa madi. 6Judasi wa tawire ngou a fotire thsikati thsothsiwa thso ku omba Yesu oku ku na piri mbunga.

Murarero o mahurerero

(Mat 26.17-25; Mar 14.12-21; Joh 13.21-30)

7Ou dya kumine diyuwa dyo Paseka dyo Makende o kupira Mamene, apa paerangire dinguana dyo thsiyambero, 8Yesu wa tumine a Peturu na Johani ku rupara rwenthzi no ku wa ambera ci: “Mu thze mu ka roithse murarero wetu o Paseka”.

9A mwipurire ci: “Kupi oku o na foto ci tu ka u roithsereko?”

10Wa wa tawire ci: “Ou mwingena mu Yerusalema kenge a ka mi shambawera mukwerume oyu na shimbi kafuma ko meyu, mu ka mu shupwere mu kengene mu nthzio omu a kengena. 11Mu ka ambere thsinda thsa nthzio ci: ‘Murongithsi aepura ci: Kupi oku ka di kapingwethzi kenda oku nga a dyera thsidika thso Paseka nerongwa yenthzi?’ 12Kenge a ka mi twara ku koroi thzothzikuru oku ku di yo ku cikwathsithsa yoihe, kodiyo mu ka kwamena murarero wetu.”

13A thzire no ku ka wana enu yoihe eci edi a i wa tongwerire Yesu. A kwamine murarero o Paseka.

Murarero wa Fumu

(Mat 26.26-30; Mar 14.22-26; 1 Kor 11.23-25)

14 Thsikati ou thsa kumine Yesu wa keyire ku nekara ku tafure no tunganda twenthzi. 15Wa ambire ci: “Kuma na ni foto nenenene ku dya nenu uno murarero o Paseka o ku ni shime ku nyanda. 16Naa mi tongwera ci ka na ku dya nenu karo uno murarero shime ou ya ku tenda ku citombora mu Kutumina kwa Nyambi.”

17Yesu wa shimbire nganja thzo waine no ku kanderera kwa Nyambi, ayepo amba ci: “Mu shimbe mu humburangemo mwahe. 18Naa mi tongwera ci ka na ku nwa waine karo shime Kutumina kwa Nyambi ou kwa ku keya.”

19Wa shimbire dikende no ku kanderera kwa Nyambi, wa di kuyaurire no ku di pa erongwa yenthzi, no ku amba ci: “Eyi po erama yange eyi i piwa mukaci kenu, mu tendange kengeyo ci mu ni vurukerangepo.”

20Mofoci, munyima thzo murarero wa shimbire nganja thzo waine, wa ambire ci: “Ethsi po thsiyuvano thsothsipe ethsi thsi na angiwa konyinga wange ou wa ku mwaarera amwe. 21Uno honi mu mone, pano pa tafure tu di pa a di oyu wa ku ni omba. 22Ii, Mwana Munu kenge a ku fa eci edi a i raire Nyambi, unone o di nothsimo oyu wa ku mu omba.” 23Erongwa ya tatekire ku cipura mu kaci kayo ci edye honi oyu wa ku tenda eyi?

Dikanyi dyo kuninga ci o mukuru mu kaciko ne edye

24Kwa katukire dikanyi dyo ku ninga ci edye o mukuru mu kaciko. 25Yesu wa wa amberire ci: “Mafumu Anukenge a di nokoro peuru thzanu, naendithsi a ethsiwa ambusha anu. 26Ku kwenu po ka ku di kengeyo, o mukuru ku kwenu a cipiture noyu o muonye, muendithsi apwe eci mupika. 27O mukuru ne yupi, noyu di ku tafure ku dya noyu reta edya ku tafure? Kadi oyu di ku tafure? Unone ame po naekara mu kaci kenu ko kwikara oyu na mi kwamena. 28Amwe po na mwikara nange mwiereka yange yoihe. 29Dyodi naa ni pa Tata Kutumina, name kenge na ku mi pa okoro 30o ku dya no ku nwa nange pa tafure thzange mu Kutumina kwange. Karo kenge mwa kwikara mu mangunja ku ratura mikuta thzo dikumi na thzidi thza Isiraele.

Yesu aa ambera Peturu ci kenge a mu hamura

(Mat 26.31-35; Mar 14.27-31; Joh 13.36-38)

31“Simoni, Simoni, o teerere! Satana na rombo ku mi ereka mwaheno ci a mi yererekethze eci vuroto. 32Unone ni na ku romberera Simoni ci thsitawo thsoe katere thsi pwe. Uno no cera no ku huka ku kwange o koropithse nowe aenthzoe.”

33Peturu wa tawire ci: “Fumu, ni na ciroithsera kwingena mu kamenga no ku fa noe.”

34Yesu wa mu tawire ci: “Peturu, naa ku tongwera ci ñombwe o ku shime kwiya o ku na ni hamura ruhatu.”

35Yesu wa ipurire ci: “Uya na mi tumine ko kupira thsipaupau, mukotana nji mashangu ne shime mwaa ka pira thsimweya nji?” Ya tawire ci: “Kwithsa ethsi twa ka pirire.”

36Wa i amberire ci: “Pano honi oyu di no thsipaupau nji mukotana a shimbe, oyu na piri mwere a urithse thsikoveyo thsenthzi a ure mwere. 37Naa mi tongwera ci yoihe eyi ya ñoriwire keyi yange shime ou ya ku tendahara, yo kuninga ci: ‘O na variwera kwikeremi.’ ^a Ii, yoihe yange eyi a ñorire akwakukethza shime ou ya kwikara yoshemwa.”

38Erongwa ya ambire ci: “Fumu, o na mono tu di no myere thzidi.”

Aye wa i tawire ci: “Ku na kwana.”

Yesu aa rombera pa Mukinya wEtondo yo Miywera

(Mat 26.36-46; Mar 14.32-42)

39Eci edi a kwamangire, Yesu wa tundire mu mbongi nerongwa yenthzi ku thza ku Mukinya wEtondo yo Miywera. 40Ou a ka kumineko, Yesu wa amberire erongwa yenthzi ci: “Mu rombere ci katere mwingene mwiereka.” 41Wa i thsiire kamanana no ku ka tongama ku manwi no ku rombera ci: 42“Tata, ngeci o na i shimi o tundithse ethzi nganja thzo makando ku kwange. Unone shaanga kengeyo o tende omu o na shimena owe kadi omu ni na shimena ame.” 43Ngou kwa keyire kangeru ko ku tunda ku wiru ku na mu tanarithsa. 44Omo mu dikarara dyodikuru, wa romberire nene no ku yuywera diyuywa dyo ku pitura eci onyinga edi dya hoyerire pashi.

45Ou a manine ku rombera wa katukire no ku huka kwirongwa yenthzi, no ku ka i wana o ku i na rara, mukaci ko ku aya no mathsiwa oakuru. 46Yesu wa i amberire ci: “Ine eyi mu na rarera, mu pinduke mu rombere ci katere mwingene mu thsitumaura.”

Yesu aa kwatiwa

(Mat 26.47-56; Mar 14.43-50; Joh 18.3-11)

47O ku amba eyi, mbunga thzanu thza kumine ethzi a tangererire Judasi thsimweya thserongwa ya Yesu yo dikumi naidi, Judasi wa thzerererire kwa Yesu no ku ka mu vumenena ko ku mu yamwa. 48Unone Yesu wa mu amberire ci: “Judasi, ene waa omba Mwana Munu ko ku mu yamwa nji?”

49Erongwa eyi yekarire na Yesu ou ya monine eyi ya fotire ku tendahara ya ambire ci: “Fumu, ene tu rwe ko myere thzetu?” 50Yumweya werongwa wa tetire ditwi dyo ku rudyo dya mupika mupurisita shokuru.

51Unone Yesu wa ambire ci: “Mu thsie eyo!” Wa kwatire ku ditwi dyoya munu no ku mu porithsa.

52Yesu wa amberire akuru o mapurisita netumi yakwakunyunga Tembere nakuru awa keyire ku na mu kwata ci: “Ine eyi mu na keyera no myere no miramu eci no mwithzi? 53Ine na mu kana ku ni kwatera mu Tembere muya na nikaranga nenu diyuwa no diyuwa, unone honi thsino po thsikati thsenu no thsikati thsokoro o mirema.”

Peturu aa hamura Yesu

(Mat 26.57-58,69-75; Mar 14.53-54,66-72; Joh 18.12-18,25-27)

54A kwatire Yesu no ku mu twara ku nthzio thza mupurisita shokuru. Peturu wa shupwerire Yesu o ku enderanga kokure nenthzi. 55Pa kaci ko dirapa kuma a fakarirepo mudiro no kwikara ku u thzinguruka, Peturu naye wa keyire no ku nekarano. 56Ngamba yumweya o mbuyamaana wa mu monine o ku nekara ku diyeye dyo mudiro, wa mu kengererire thsithzui no ku amba ci: “Oyu naye kuma naa endanga na Yesu.”

57Unone Peturu wa tawire ci: “Mama, ka ni mu dimuka ame.”

58Munyima thzo thsikati thsothsipu, munu yumweya wa mu monine, wa amberire ci: “Nowe o mukwa thsipani thsoyu munu oyu.”

Unone Peturu wa tawire ci: “Kadi no mukwa thsipani thsenthzi ame.”

59Ou kwa pitire thsitunde, munu yumweya karo mu kaci wa ooterire nene Peturu ci: “Yoshemwa oyu munu oyu shime a ekaranga na Yesu, inene naye oyu Mugalilea.”

60Napo karo Peturu wa kanine no ku amba ci: “Owe mukwerume, ka ni dimuka eyo amba ci ine. Popa a ambire kengeyo ñombwe weyire.” 61Fumu wa cithsetukire no ku kenga Peturu. Popo Peturu wa vurukire maywi a Fumu Yesu aa a mu amberire o ku ninga ci: “Rero ñombwe o ku shime kwiya owe o ku o na ni hamura miendo thzihatu.” 62Peturu wa punine pora no ku ka cithziurura ku dira.

Yesu aa teururiwa no ku furiwa

(Mat 26.67-68; Mar 14.65)

63Anu awa a nyungire Yesu a tatekire ku mu teurura no ku mu fura. 64A mu angire pa meho no ku mwipura ci: “O ukethze! Edye oya ku fura?” 65Anu a ambire maywi oangi o ku mu yengwera.

Yesu aa mwipura aendithsi o Majuda

(Mat 26.59-66; Mar 14.55-64; Joh 18.19-24)

66Anaci mathsiku, akuru o mbunga, akuru o mapurisita narongithsi o murao a ciwanine pofoci, Yesu a mu retire mu Nthzango thzo. 67A mwipurire ci: “O tu tongwere, ene yowe o Mesiya nji?”

Yesu wa wa tawire ci: “Shaanga o ni mi tongwere ci yame ka mu tawa. 68Karo shaanga o ni mipure ka mu ni tawa. 69Unone honi ku tunda pano Mwana Munu kenge a kwikara ku dyoko dyo rudyo dya Nyambi shokoro.”

70A mwipurire wahe ci: “Ene yowe o Mwana Nyambi nji?”

Aye wa wa tawire ci: “Ii, dyodi mu na amba yame.”

71A ambire ci: “Ombangi wine ou tu fota karo? Tu na ciyuvera twahe mu kanwa kenthzi o ku amba.”