Luke 8

Ambuyama awa na endauranga na Yesu

1Munyima thzeyo, Yesu wa thzire o pita mu mambongi no mu maumbo o ku thza o honga anu Muthzimbu Ouwa o Kutumina kwa Nyambi. Wa thzire no tunganda twenthzi to dikumi na twidi, 2nambuyama amweya awa porithsiwire ku mathzimu nekora. Awo ambuyama po nedi Madiya Magadalena oyu wa tundithsiwire mathzimu o mutanu na edi, 3Joana munu wa Kuza muendithsi o rufumo rwa Heroda, no Susana nambuyama amweya owangi awa na kwathsanga Yesu nerongwa yenthzi keyi nekaranga nayo.

Kathsimo ko mukwakukuna

(Mat 13.1-9; Mar 4.1-9)

4Mbunga thzothzikuru thza keyire kwa Yesu, anu awa tundire mu diumbo no diumbo. Wa wa terire kathsimo ko mukwakukuna ci: 5“Njimi wa thzire ku ka kuna mbuto thzenthzi. O ku kuhera mbuto mu dikanda, thzimweya thza wererire mu dikuñwa, omu thza dyatadyatiwerire kwanu no ku diwa kwinyunyi. 6Thzimweya athzopo thzi wera pa muve o mawe. Thza menine no ku kura, unone thza rerire, inene ka pekarire oshuwi nawa. 7Mbuto thzimweya thza wererire mu makona, unone makona ou a kurire a fithsire ekuniwa dinthzombwe. 8Thzimweya karo thza wererire pa muve o wiro. Thza menine, dimbuto no dimbuto dyemine ima yo makumi o dikumi kupita eyi ya kuniwire.”

Ou a manine ku amba eyi, wa ambire ci: “Oyu di no matwi o ku yuvithsa, a yuve.”

Eyi na a kwamithseranga tuthsimo Yesu

(Mat 13.10-17; Mar 4.10-12)

9Erongwa yenthzi ya mwipurire eyi ka na amba ako kathsimo. 10Wa wa tawire ci: “Amwe po mu na piwa ku yuvithsithsa diano dyo Kutumina kwa Nyambi. Unone naa cikwathsithsanga tuthsimo ku rongithsa amweya ci i citombore no Mañoro o ku amba ci:
“‘Tuhu a mona, kadi akwa ku monithsithsa,
tuhu a yuva, kadi akwa ku yuvithsithsa.’ ^a

Yesu aa tongonona kathsimo ko mukwakukuna

(Mat 13.18-23; Mar 4.13-20)

11“Eyi po yodiyo ka na amba aka kathsimo, Mbuto po diywi dya Nyambi! 12Mbuto ethzi thza wererire mu dikuñwa thzaa cipitura eci anu awa a na yuvu diywi dya Nyambi, unone shamaonga aa keya ku na di wa tundithsa mu micima thzo no ku wa kwangithsa ku tawa no ku yoyithsiwa. 13Mbuto ethzi thza wererire pa muve o mawe, thzaa cipitura eci anu awa a na yuvu diywi dya Nyambi no ku di tambura ko thsinyanyu, unone ka di no mithzithzi. Aa tawa thsikati thsothsipu, unone mwikati yeereka aa wa. 14Mbuto ethzi thza wererire mu makona thzaa cipitura eci awaya a na yuvu diywi dya Nyambi, unone kecoyoka, no ku fota nene rufumo necikora yo kaye, diywi dyaa fa oku di shime kwima. 15Unone mbuto ethzi thza wererire pa muve o wiro thzaa cipitura eci anushemwa akwa micima thzo thziwa, aa yuva diywi dya Nyambi no ku di tanarithsa, karo kothzui wo aema ima yoingi.

Kathsimo ko kambarambara

(Mar 4.21-25)

16“Kwithsa munu o ku muneka kambarambara no ku ka furumeka kafuma nji ku ka paka mushi thzodidi. Unone aa ka paka pa thsimeko ci awa engena a mone mwethzi. 17Kwithsa ethsi thsi na horekiwa ethsi mbo thsi kana ku hokoriwa, nji ethsi thsi na thzindiwa ethsi mbo thsi kana ku dimukiwa no ku retiwa mu mwethzi. 18Mu teerere nawa ko i mu yuva, inene oyu di nethsi thsimweya kenge a ku piwa, unone oyu na piri kenge a ku nyangiwa nethsi a na anekera ci o di nathso.”

Mama wa Yesu namina Yesu wakwerume

(Mat 12.46-50; Mar 3.31-35)

19Mama wa Yesu namina Yesu a keyire ci na mu mone, unone a kwangire ku kuma ku kwenthzi mukaci ko mbunga. 20Munu yumweya wa mu tongwerire ci: “Njinoe naminoe pora a di aa fota ku ku mona.”

21Yesu wa tawire ci: “Mama wange naminange po anu awa a yuva diywi dya Nyambi no ku di hengeka.”

Yesu aa tutwarithsa dyungu

(Mat 8.23-27; Mar 4.35-41)

22Diyuwa dimweya Yesu wa amberire erongwa yenthzi ci: “Tu yavukerenu mu thsambwadiya thzo diviya.” A yomamine mu wato no ku hunyuna. 23O kwa vua kengeyo, Yesu wa thzire pa turo. Kwa keyire dyungu dyodikuru o kwa di omo mu diviya, ekarire mukaru o ku fota ku rowera, inene mañithsingi a yarithsire meyu mu wato.

24Erongwa ya keyire kwa Yesu no ku mu pindura ci: “Ñathsire wetu, Ñathsire wetu, twaa fa!” Wa pindukire no ku kuturura mupepo no mañithsingi. Ko wanguwangu dyungu dya pwire akopo ku onga. 25Wepurire erongwa ci: “Thsitawo thsenu ne kupi thsi di?” Erongwa ya yapire nene no ku komoka no ku cipaura ci: “Oyu munu ne munu o ngepi? Aa tumina mipepo no meyu, karo yaa mu yuvera.”

Yesu aa porithsa mukwerume o mathzimu

(Mat 8.28-34; Mar 5.1-20)

26A ka thsekerire mu ditunga dya Geraseni oshungashunga na Galilea. 27Yesu ou a shamukerire pa dikambo, wa mu hanganyekire mukwerume oyu wa tundire mu diumbo oyu wekarire no mathzimu. Wa shimbire thsikati thsothsire kadi wa ku vata evata, karo ka na ekaranga mu nthzio shime ku mararo.

28Ou a monine Yesu, wa tetumukire no ku na wera ku rupara rwenthzi, no ku karumuka ko diywi dyodikuru ci: “Ine eyi fota ku kwange owe o Mwana Nyambi, aye o Kuthzinama Nene? Naa ku romba wa ni nyandithsa!” 29Wa ambire kengeyo, inene Yesu wa tuminine uya mupepo oumango ci u tunde ku kwenthzi. Ou mupepo oumango wa mu shimbire kare karo shaanga ou a mu nyungangire ko ku mwanganga no madyenge no mawaya ku mauru, wa i cinunangire, mupepo oumango no ku mu twara mu dikunguthsitu.

30Yesu wa mwipurire ci: “Yowe odye dithzina dyoe?”

Aye wa tawire ci: “Yame no Mungi.” Wa ambire kengeyo inene wekarire no mathzimu oangi. 31Mathzimu a hukahukerire ku adikanena Yesu ci a a cithzera mu dikwina dyo kupira ondanda.

32Kwekarire mutanga oukuru o nguru ou wa dyererire pa mukinya. Ao mathzimu a adikanenine Yesu ci a a tawethze ku kengena mwethzo nguru. Yesu wa a tawethzire. 33Mathzimu a tundire koya munu no ku kengena mwethzo nguru, mutanga ouhe wa rundumukire pa muurumuko ku cirera mu diviya no ku ka feramo ku meyu.

34Awa thzi futithsire ou a monine eyi ya tendaharire, a cirire no ku ka tongaura mu mbongi no mu mandau amweya. 35Anu a thzire ku ka cimonena eyi ya tendaharire. A keyire kwa Yesu no ku na wana oya munu a tundithsire mathzimu o ku nekara ku mauru a Yesu, o ku na vata nawa no maano o ku a di nawa. A yapire nene, 36awa a i monine a wa tongawerire edi a porithsiwire oya mukwerume o mathzimu. 37Anu wahe o mu ditunga dya Geraseni a rombire Yesu ci a tunde mu ditunga dyo, inene eyi a kwamine ya wa tutukwithsire. Yesu wa yomamine mu wato ku huka oku a tundire.

38Oya munu a tundithsire mathzimu wa rombire ci a thze naye na Yesu. Unone Yesu wa mu kanithsire ci: 39“O thze ku diumbo dyoe kwapoe o ka wa tongwere enu yoshokuru eyi a na ku kwamena Nyambi.” Oyo mukwerume wa thzire mu maumbo oahe ku ka tongaura enu yoikuru eyi a mu kwamenine Yesu.

Yesu aa porithsa anu ko thsitawo thso

(Mat 9.18-26; Mar 5.21-43)

40Yesu ou a ka tundire mu thsambwadiya thzo diviya, thza na mu tamburire mbunga thzothzikuru, inene wahe kuma a mu tatererire. 41Mukwerume o dithzina dyo Jairosi wa kumine naye, oyu wekarire muendithsi o sinagoge. Wa na wererire ku mauru a Yesu no ku mu romba ci a thze ku nthzio thzenthzi. 42Wekarire no mwanenthzi yofoci pakamutwa o mbuyamaana, o myaka thzo dikumi na thzidi, oyu wa kokangerire.

Yesu o ku di mu dikuñwa dyo ku thzako, mbunga thzothzikuru thza mu thsindakanithsire. 43Kwekarire mbuyama oyu wa korire diropa myaka thzo dikumi na thzidi, enu yenthzi yoihe ya shandukire kwakwakupanga owangi, unone kwithsa oyu wa twethsire ku mu porithsa kweyo ekora yenthzi. 44Wa keyire ku muongo wa Yesu no ku na kwata ku munganja o thsikoveyo thsenthzi. Mwethso thsikati, diropa dyenthzi dyemanine.

45Yesu wepurire ci: “Edye na ni kwata?”

Wahe a hamurire, unone Peturu wa ambire ci: “Ñathsire wange, mu kaci ko mbunga o di, ka piri ku ku kunyuna.”

46Yesu wa ambire ci: “Kwaa di oyu na ni kwata, inene ni na yuvu okoro wange o ku porithsa o ku u ni tunda.”

47Oya mbuyama ou a monine ci ka i tawa ku cihoreka, wa keyire o tutuma no ku na tongama ku mauru a Yesu no ku na tongaura thsitonwameho ku mbunga eyi a kwaterire ku thsikoveyo thsa Yesu nedi a porire wanguwangu. 48Yesu wa mu amberire ci: “Mwanange thsitawo thsoe thsi na ku porithsa, o thze mu thsiyaro.”

49Ou a ambire yoyihe eyo, munu oyu wa tundire ku nthzio thza Jairosi muendithsi o sinagoge wa na kumine no ku na mu tongwera ci: “Mwanoe o na nyanda, kwithsa eyi o cakanithsera murongithsi karo.”

50Unone Yesu wa i yuvire o ku i ambera Jairosi. Wa mu amberire ci: “Jairosi wa yapa, o tawe pohuma, mwanoe kenge a pora.”

51Ou a ka kumine kuya ku nthzio wa ka kanithsire anu wahe kwingena nenthzi mu nthzio shime Peturu, Johani na Jakovo no tata wa mwanuke no mama wa mwanuke. 52Anu wahe o kwa dira makuano, Yesu wa wa amberire ci: “Mwa dira, oyu mwanuke ka a fire aa rara pohuma.”

53Anu a teururire Yesu awo pa ku dimuka ci o na fu shemwa. 54Yesu wa kwatire ku dyoko dyoya mwanuke no ku amba ko diywi dyodikuru ci: “Owe mwanuke, o pinduke.” 55Wa pwethzumukire no ku pinduka wangu. Yesu wa wa amberire ci: “Mu mu pe edya a dye.” 56Ashemienthzi a komokire nene, unone Yesu wa wa koñomekire ci a tongwera munu shaanga yofoci eyi i na tendahara.