Luk 9 | MhoSC | STEP | Yesu wethsire tunganda twenthzi to dikumi na twidi, wa tu pire okoro o ku cithza mathzimu no ku porithsa ekora.

Luke 9

Yesu aa tuma tunganda to dikumi na twidi

(Mat 10.5-15; Mar 6.7-13)

1 Yesu wethsire tunganda twenthzi to dikumi na twidi, wa tu pire okoro o ku cithza mathzimu no ku porithsa ekora. 2 Karo wa wa tumine ku ka honga yo Kutumina kwa Nyambi no ku ka porithsa akwakukora. 3 Wa wa amberire ci: “Omu mu ruendo, mwa shimba muramu o ku endera, mukotana, ñuta thzedya nji thzo madi, nji ku shimba ekoveyo idi. 4 Mu mwanda momuhe omu mwa ku ka tamburiwa, mwa ku kekaremo shime ku ka kuma mu diyuwa edi mwa ku tundamo ku thza kumweya. 5 Omu a ku ka kana ku mi tambura momuhe mwa ku ka tunde mu diumbo dyo no ku kukumuna dikungu kwidyato yenu ci ikare ombangi ou wa ku wa wemeka.”

6 Tunganda twa thzire mu maumbo oahe o kwa thza o honga Muthzimbu Ouwa wa Nyambi karo a porithsire akwakukora kokuhe oku a thzire.

Heroda aa karupera

(Mat 14.1-12; Mar 6.14-29)

7 Heroda fumu o mu Galilea ou a yuvire yoihe eyi ya tendaharire wa karuperire, inene amweya kuma a ningire ci Johani na pinduka kwafu. 8 Amweya ci Eliya o na ka huka, amweya ci Mukwakukethza yumweya o kukare yo na pinduka kwafu. 9 Unone Heroda wa ningire ci: “Johani po na mu tetire mutwi, edye karo oyu ni yuva yenthzi?” Ngou a fotire ku mona Yesu.

Yesu aa pa edya anu o 5,000

(Mat 14.13-21; Mar 6.30-44; Joh 6.1-14)

10 Tunganda twa ka hukire no ku na tongawera Yesu eyi a ka kwamine yoihe. Wa wa shimbire no ku thzano wafoci mu diumbo dya Betisaida. 11 Unone anu wahe ou a dimukire kengeyo, a mu shupwerire. Yesu wa wa tamburire no ku wa rongithsa yo Kutumina kwa Nyambi no kuporithsa awa korire.

12 Diyuwa ou dya ombokire, erongwa yo dikumi na idi ya keyire kwa Yesu no ku na ninga ci: “O tongwere anu a cithzere mu maumbo no mu tuumboana a ka cifotere edya noku ko ku rara, inene muno tu di po mu murundu.”

13 Unone Yesu wa wa amberire ci: “Mu wa pe edya yo yamwe.”

Awo a tawire ci: “Ka tu di nedya shime makende o mutanu no thsi thzidi, nji waa fota ci tu wa urere edya wahe awa?” 14 Mwethzo mbunga mwekarire akwerume o ku fota ku kwana 5,000.

Yesu wa amberire erongwa yenthzi ci: “Mu wekarithse kekwata yanu o ku fota ku kwana makumi mutanu, thsikwata no thsikwata.” 15 Erongwa ya tendire kengeyo a wekarithsire wahe. 16 Yesu wa shimbire ao makende o mutanu nethzo thsi thzidi, wa diamenine ku wiru no ku kanderera, wa i kuyaurire no ku i pa erongwa yenthzi ci i ere mbunga. 17 Wahe a dire no kwikuta. Erongwa ya yarithsire mayongo o dikumi na edi omwamwaethzi ou wa thsiarirepo.

Peturu aa amba ci Yesu po yodiyo Mesiya

(Mat 16.13-19; Mar 8.27-29)

18 Thsikati thsimweya Yesu ou a romberire ko kumengi, wekarire pohuma nerongwa yenthzi. Wa ipurire ci: “Ene anu ne aa ninga ci yame nodye?”

19 Ya mu tawire ci: “Amweya aa ninga ci Johani Mukwakukorovethza, amweya ci Eliya, amweya karo ci o yumweya wakwakukethza o kukare oyu na pinduka kwafu.”

20 Wa ipurire ci: “Amwe ne mwaa ninga ci yame nodye?”

Peturu wa tawire ci: “Yowe o Mesiya wa Nyambi.”

Yesu aa amba yo kufa no kupinduka kwenthzi kwafu

(Mat 16.20-28; Mar 8.30—9.1)

21 Yesu wa i koñomekire ci katere i i tongwere munu. 22 Wa ambire ci: “Mwana Munu aa roera ku nyandithsiwa nene no ku kaniwa kwaendithsi o mbunga, akuru o mapurisita narongithsi o murao. Karo aa roera ku paiwa no ku pinduka kwafu mu diyuwa dyo muthsihatu.”

23 Wa ambire ku mbunga ci: “Munu o ku fota kwikara thsirongwa thsange, a shuve mwoyo wenthzi, a shimbe mbinda thzenthzi diyuwa no diyuwa no ku ni shupwera. 24 Inene ngeci owepo fota nene mwoyo woe, kenge wa ku u yawa. Unone yoihe o shuva mwoyo woe mukaci kange, kenge wa ku u yoyithsa. 25 Owa wine o ku fuma kaye kokahe, unone waa yawa mwoyo nji owe kwipithsiwa? 26 O ku fera honyi ame no maywi ange, Mwana Munu naye kenge mba a mu fera honyi ou mba a ka huka mu kutethzima kwenthzi no mu kutethzima kwa Tata noku ko tungeru totukenu. 27 Naa mi tongwera yoshemwa ci amweya awa a di pano ka ku fa o kwa shime ku mona Kutumina kwa Nyambi.”

Yesu aa piruka no ku monahara kutethzima

(Mat 17.1-8; Mar 9.2-8)

28 Munyima thzo mayuwa o mutanu na ahatu, Yesu wa shimbire Peturu, Johani na Jakovo ku thzano pa mukinya ku ka rombera. 29 O ku rombera kengeyo, mumonaharero o rupara rwenthzi wa pirukire, nevata yenthzi ya monaharire kuvyakima. 30 Popo akwerume aidi, Eliya na Mushe a monaharire no ku tateka ku ambaura nenthzi. 31 A monaharire mu kutethzima no ku tateka ku ambaura yo ku thza kwenthzi ku kufa oku kwekarire po pepi no ku citombora mu Yerusalema.

32 Peturu nowa ekarireno a thzire pa turo. Ou a pindukire, a monine kutethzima kwa Yesu nakwerume aidi o kwa nemana nenthzi. 33 Awo anu aidi o kwa thza, Peturu wa amberire Yesu ci: “Ñathsire wange, i na roo eyi tu di kuno, tu kwame matunu ahatu, dimweya dyoe, dimweya dya Mushe, dimweya dya Eliya.” Ka a dimukire eyi a ambire.

34 O ku amba kengeyo kwa keyire divui no ku wa thsika, a yapire ou engenine omo mu divui.

35 Diywi dya tundire mu divui ku amba ci: “Oyu po Mwanange oyu na ni hangura, mu mu yuvere.” 36 Ou dya manine ku amba edyo diywi, Yesu wa thsiarire yofoci. Erongwa ya thzindire eyi, ka ya tongwerire munu mo aya mayuwa eyi ya monine.

Yesu aa porithsa mukwerumeana o mupepo oumango

(Mat 17.14-18; Mar 9.14-27)

37 Diyuwa edi dya randireko, Yesu nerongwa yenthzi ihatu o kwa na ka tunda pa mukinya, mbunga thzothzikuru thza mu shambawerire. 38 Popo mukwerume mu kaci ko mbunga wa kumbire ci: “Murongithsi, naa ku romba o yuvere ñeke mwanange o mukwerumeana, yodiyo mwanange yofoci pakamutwa. 39 Mupepo oumango waa mwingenanga no ku mu karumukithsa no ku mu withseranga pashi eci wa thsinyonya. Karo waa mu tupurithsanga kafuthzi no ku mu hanyahanyithsa. Waa mu nyandithsanga, karo ka u mu thsiangire wangu. 40 Ni na rombo erongwa yoe ci i u cithze, unone i na u kwanga.”

41 Yesu wa mu tawire ci: “Amwe mwanu o kupira thsitawo nanu wetenda yoimango, kenge na kwikara nenu thsikati thso ku kuma kupi ci ni mi kunde? O rete mwanoe kuno.”

42 Oyo mukwerumeana o ku keya, mupepo oumango wa mu huwerire pashi no ku mu hanyahanyithsa nene. Unone Yesu wa u kutururire no ku mu porithsa, no ku mu huthsa kwa tata wenthzi. 43 Anu wahe ou a monine eyo, a komokire okoro wa Nyambi.

Yesu aa amba ro muthsidi yo kufa kwenthzi

(Mat 17.22-23; Mar 9.30-32)

Anu wahe o kwa komoka enu yoihe eyi a kwamine Yesu, aye wa amberire erongwa yenthzi ci: 44 “Mu teerere nawa eyi ni mi tongwera pano! Mwana Munu tamba ku piwa mu moko akwethzimbo yenthzi.” 45 Unone ayo ka ya yuvithsithsire eyi a ambire, inene ya horekiwire ku kwayo ci ya i yuvithsithsa, unone ya yapire ku i mwipura.

O mukuru ne edye?

(Mat 18.1-5; Mar 9.33-37)

46 Kwekarire dikanyi mu kaci kerongwa kuninga ci, o mukuru mu kaciko ne edye. 47 Yesu wa dimukire eanekera yo, waa shimbire kanuke no ku na kemeka ku nyonga thzenthzi. 48 Wa wa amberire ci: “Munu yomuhe o ku tambura aka kanuke mu dithzina dyange, yame a na tambura. Noyu o ku ni tambura aa tambura oyu naa ni tumu. Yomuhe o ku cihuthsa kushi ku kwenu mwahe yodiyo o mukuru.”

O kukana ku mi rwithsa aa mimanena

(Mar 9.38-40)

49 Johani wa ambire ci: “Ñathsire wange, tu na mono mukwerume o ku cithza mupepo oumango mu dithzina dyoe, o tu na mu kanithsa, inene kadi wa mu thsipani thsetu.”

50 Yesu wa mu tawire ci: “Mwa mu kanithsa, inene o kukana ku mi rwithsa aa mi manena.”

Anu o mu diumbo dyo mu Samaria aa kana Yesu

51 Mayuwa enthzi o ku huka ku wiru ou a henyenine po showipi, Yesu wa manenenine eanekera yenthzi yo ku thza ku Yerusalema. 52 Wa tumine tunganda ku rupara rwenthzi, awa thzire mu diumbo dyo mu Samaria ci a ka mu roithsere enu yoihe. 53 Unone omo mu diumbo ka ka mu tamburire, pakuninga ci kuma a thzire ku Yerusalema. 54 Erongwa yenthzi a Jakovo na Johani ou a i monine, a ambire ci: “Fumu, ene tu tumine mudiro u tunde ku wiru u keye na u wa ñotore?” 55 Yesu wa cithsetukire no ku i wa kuturura. 56 Mweyo, a tuturukerire mu diumbo dimweya.

Dyo ku shupwera Yesu

(Mat 8.19-22)

57 O kwa enda kengeyo mu mukwakwa, munu yumweya wa mu amberire ci: “Kenge ni thza noe kokuhe oku o thza.”

58 Yesu wa mu tawire ci: “Mbwawa thzi di no mateke, nenyunyi i di no mataratara, uno honi Mwana Munu aye ka a di no nthzio thzo ku rara.”

59 Wa amberire mukwerume yumweya ci: “O ni shupwere.”

Aye wa mu tawire ci: “Fumu, o ni tawethze ni thze tango ni ka vumbeke tata.”

60 Yesu ngou a mu amberire ci: “O thsie afu a vumbeke aenthzo afu. Uno honi owe po o thze no ku honga yo Kutumina kwa Nyambi.”

61 Yumweya karo wa mu amberire ci: “Fumu, naa fota ku thza noe, unone o ni tawethze tango ni ka rae ku diumbo.”

62 Yesu wa mu amberire ci: “Kwithsa munu o ku cithsetukanga o ku purura o ku roera mu Kutumina kwa Nyambi.”