Luke 18

Kathsimo ko mukwakuratura no difakathzi

1Diyuwa dimweya Yesu wa terire erongwa yenthzi kathsimo ku wa rongithsa ci aa roera ku romberanga thsikati thsothsihe ko kukana ku huka munyima. 2Wa ambire ci: “Mu mbongi thzimweya kwekarire mukwakuratura oyu wa kanine ku yapa Nyambi nji ku remeka anu. 3Omo mu mbongi karo kwekarire mbuyama o difakathzi oyu wa keyangire ku kwenthzi ku na rombanga ci: ‘O ni tende nawa, o ni kengere thsiamba thsange noyu na ni thzekithsa.’

4“Wa shimbire thsikati thsothsire kadi wa ku tenda kengeyo, unone wa anekerire ci: ‘Ka ni yapire Nyambi nji ku remeka anu, 5uno honi pakuninga ci oyu difakathzi aa ni shupa, kenge na ku mu tenda nawa ci katere a ni tenderange muyoyo!’”

6Unone Fumu wa ambire ci: “Mu na yuvu eyi a na amba oyu mukwakuratura omumango? 7Ene Nyambi ne nga ka a tende nawa anuenthzi awa naa hangura awa a direrera ku kwenthzi mutenya nothsiku nji? Ene kenge a ku katapa ku wa kwathsa nji? 8Naa mi tongwera, kenge a ku yokorora ku wa tenda nawa. Unone ou a ku keya Mwana Munu ne kenge a ku na wana thsitawo mu kaye nji?”

Kathsimo ko Mufarithsi no muterithsi

9Yesu wa terire aka kathsimo anu amweya awa a cishimbire ci awawa no ku shwahura amweya: 10“Akwerume aidi a thzire ku Tembere ku ka rombera, yumweya nedi Mufarithsi yumweya nedi Muterithsi. 11Mufarithsi wemanine no ku ciromberera ci: ‘Nyambi, naa kanderera ku koe ci ame ka ni cishokire nanu amweya akwamakupakupa, wamango, nakwamirembe nji eci oyu Muterithsi. 12Naa cikanganga no nthzara miendo thzidi mu sunda, naa panga thsimweya thso mudikumi kweyi ni na wananga yoihe.’

13“Unone muterithsi aye wemanine kokure wa yapire shaanga ku kengerera ku wiru, wa cipamarire pa mbando no ku amba ci: ‘Nyambi, o ni yuvere ñeke ame no munu o thsivi.’

14“Naa mi ambera ci oyu munu wa hukire ku diumbo o ku di o muwawa pa meho a Nyambi kupita oya o kutanga. Yoshemwa munu o ku cithzineka kenge a ku huthsiwa kushi, o ku cihuthsa kushi kenge a ku thzinekiwa.”

Yesu a fiyawera twanuke

(Mat 19.13-15; Mar 10.13-16)

15Anu a retire karo tumbu kwa Yesu ci na a tu kambeke moko. Erongwa ou ya i monine ya wa kutururire. 16Unone Yesu wa wethserire ku kwenthzi no ku amba ci: “Mu thsie twanuke tu keye ku kwange, mwa tu kanithsa, inene Kutumina kwa Nyambi po kwanu o kwikara eci awo. 17Naa mi tongwera yoshemwa ci munu yomuhe oyu wa ku kana ku tambura Kutumina kwa Nyambi eci kanuke ka a ku kengenamo.”

Mukwerume o fumanyi

(Mat 19.16-30; Mar 10.17-31)

18Nduna yumweya wa mwipurire ci: “Murongithsi o muwa, ine ni na roera ku kwama ci ni wane mwoyo o diyere?”

19Yesu wa mu tawire ci: “Ine eyi o nithsera o muwa? Kwithsa o muwa shaanga yofoci shime Nyambi yofoci. 20O na dimuka eraerera yo kuninga ci: ‘Kadi o mukwa ku rembeka, kadi o mukwa kwipaa, kadi o mukwa kwithza, wa pa ombangi o kwithsa, o remeke tata woe no mama woe.’” ^a

21Wa tawire ci: “Thzothzihe ethzo na thzi hengeka ku tundera ku wanuke wange.”

22Yesu ou a yuvire eyi wa mu amberire ci: “Ku na thsiara thsinu thsofoci ethsi o na roera ku kwama. O urithse rufumo rwoe roruhe ao madi wangu o a pe ahepwe. Wangu wa kwikare no rufumo mu wiru, ku tunda apo o ni shupwere.”

23Oya fumanyi ou a i yuvire eyi, wa cinyengire nene pakuninga ci kuma a fumine nene. 24Yesu ou a monine ci kuma a cinyengire nene wa ambire ci: “Kukaru nene ci fumanyi engene mu Kutumina kwa Nyambi! 25Kenge nga iotopa ci kamere engene mu dithziho dyo thsonga kupita ci fumanyi engene mu Kutumina kwa Nyambi.”

26Awa a yuvire eyi epurire ci: “Edye ne honi mbo yoyithsiwa?”

27Yesu wa tawire ci: “Yo kukana ku tawa kwanu kwa Nyambi po yaa tawa.”

28Peturu wa mu amberire ci: “O mone atwe tu na thsii yetu yoihe no ku ku shupwera.”

29Yesu wa tawire ci: “Naa mi tongwera yoshemwa ci munu yomuhe o ku thsia diumbo dyenthzi, nji munuwenthzi, nji apenthzi, nji ashemienthzi, nji anenthzi mukaci ko Kutumina kwa Nyambi, 30kenge a ku tambura yoingi mo uno mwoyo no mwoyo o diyere mu kaye aka ka keya.”

Yesu aa amba karo yo kufa kwenthzi

(Mat 20.17-19; Mar 10.32-34)

31Yesu wa shimbire erongwa yenthzi yo dikumi na idi no ku thza nayo ko kumengi no ku i ambera ci: “Mu teerere, twaa thza honi ku Yerusalema oku ya ku ka tendaharera yoihe eyi a ñorire akwakukethza keyi ya Mwana Munu. 32Kenge a ku ka piwa mu moko anukenge, awa a ku ka mu teurura, ku mu tuka no ku mu thsipera mate. 33Kenge a ku ka mu mwashura no ku mwipaa, unone kenge a ku pinduka mu diyuwa dyo muthsihatu.”

34Tunganda ka twa yuvithsithsire eyi yaa ambiwire, inene ya horekiwire kukwo. Ka twa dimukire eyi a ambire Yesu.

Yesu aa porithsa kapuputwa mu Jeriko

(Mat 20.29-34; Mar 10.46-52)

35Yesu ou a kokerire ku Jeriko, ku mbadi thzo dikuñwa kwekarire munu o kapuputwa oyu wa kumberangire anu. 36Ou a yuvire anu owangi o kwa pita, wepurire ethsi thsa tendaharire. 37A mu tongwerire ci: “Yesu wa Nazareta oyu pita.”

38Wa kumbire ci: “Yesu, Mwana Davida o ni yuvere ñeke.”

39Awa a tangerire ku rupara a mu kutururire no ku mu ambera ci a tutware, unone aye wa kuererire nene kupita pa kutanga ci: “Mwana Davida, o ni yuvere ñeke.”

40Yesu wemanine no ku tumina ci a u mu retere. Ou a henyenine po pepi, Yesu wa mwipurire ci: 41“Waa fota ci ni ku kwamene ine?”

Wa tawire ci: “Fumu, naa fota ku mona karo.”

42Yesu wa mu amberire ci: “O mone karo, thsitawo thsoe thsi na ku porithsa.” 43Popo mwene wa monine, wa mu shupwerire no ku shangara Nyambi. Mbunga thzothzihe ou thza monine eyo nathzo thza shangarire Nyambi.