Mar 13 | MkfSC | STEP | Yesu kwaya ta bawusa a Bali gyarya mana tiya gil, wɨtɨ a ɗe sɨba gyagiyakɨ niwasɨ du, “Basɨnakɨ nai takɨn zɨkɨyayau ma mbam ɨna nakɨn kam ba mbam!”

Mark 13

Yesu Bɨla Vare Vazakɨ Made Mara Balɨ Gyarya

(Matiyu 24:1-2; Luka 21:5-6)

1 Yesu kwaya ta bawusa a Bali gyarya mana tiya gil, wɨtɨ a ɗe sɨba gyagiyakɨ niwasɨ du, “Basɨnakɨ nai takɨn zɨkɨyayau ma mbam ɨna nakɨn kam ba mbam!”

2 Je gɨsa Yesu du, “Fa nesu nakɨn garu kamamo kɨnwa? Wiya zɨkɨ maiyu madabi sɨla ghama wiya vakiyazau ndyam avaza za vazau.”

Dzakwaka kaitɨ

3 Yesu de tsɨgɨ aghama ɗai na zaitun, ba tɨdɨ cɨr ɨna Bali gyarya mana tiya gil, ni Bitrus, a Yakubu, a Yahaya ɨna Andarawus je tsɨyusɨ ndɨ tlɨn du, 4 Bɨlama kwai, nikin kutau kɨna dzakwatlɨn ghaja? Miya naya wena alama ji misɨna tlɨnsata batlene dzakwa tlɨnaya?”

5 Yesu dɨ ɗɨnga tlɨna ndu, “Tsɨrika kalpɨ wi tabɨ mɨmenau. 6 Sɨbɨ casa bɨ buwatlɨna ngɨnɨwun, da ɗɨnga ndu, miji Yesu, tlɨna bi mɨmai sɨbɨ cas. 7 Nakwa dɨkaya ɗɨnga yaki, ɨna andu-andu wa ghama yaki ka, ta tlayana can nau. Dole ji nikya kutatauka dɨ ɗɨmatlɨn, ama mbahiya gwahi sɨla gan shɨɗɨ. 8 Taka mɨdzaya kaya ɨna taka mɨdzai, takɨn gwalfa tlai yaki dɨfa taka gwalfu, a ɗɨma zabakɨ ta mɨdzai ɗe wuri tuwahɨtuwahɨ, abi ɗɨma mai. Ama ndɨ dzakwaka kaitɨ jika, wokaci ɗɨmma gantau.

9 Ama kuli ɨna ghamana. Adama tlɨnabi baina bɨɗa sɨba gwalfu, dɨ ɗɨmana titɨ abali mana paa gham ta Yahudawa. Dɨbaina bɨɗa sɨba sharaʻa ɨna bɨɗa Malvo adama ngɨnuwɨn, adama wanka, na marsu darhɨ ba bɨla tlɨna ɗɨngɨ ma piyatɨ jika. 10 Ama dole ji dɨ bɨla ɗɨngɨ mapiyatɨ ɗe sɨbɨ ndyam, kafin duniya dɨ mbaza. 11 Kwabɨ kuyana dɨ baina bɨɗa sɨba Gwalfu ka, nata damana ndɨra hamba nadabɨ ɗɨngau, aha dɨma naja ɗɨngu. Aryuwan Ghɨnsɨ ji bɨlana hamba na dabi ɗɨngau. Adawanka na ɗɨnga ndyam hamba bɨlana Ryuwan Ghɨnsɨ.

12 Yasɨ sɨn ji tsa zhau yasɨ wasɨ, dɨ tusai, Bahɨ ji tsa zhau lai. Wutlɨmi dɨ nja ɗɨngɨ ta ni batlɨn, dɨ zai dɨ tatlɨnai. 13 Ndyam sɨba bɨ hiyana hiyau adamuwɨn. Ama ndyam badɨ tsɨrusa ta tsahiya gaskewatɨ tusɨka, ta mara bir.

Akaitɨ Gyarya

(Matiyu 24:15-28; Luka 21:20-24)

14 Nakwabɨ naya a arsu kacamba kutɨ hamba hiyaki ekwa mbɨna a arakɨ ka. (Batɨdata kɨnau ta sɨnsɨnau) Sɨba tlɨn dɨ ɗe mɨdzai ta Yahudiya ka, ta varai dɨ ghɨmatlɨn ɗe ɗai. 15 Batɨdɨ ɗe paldɨm ta dawuse kiya wihama kamu. 16 Batɨda vuwa shinka ta piya kam ekiya gwadau tusu. 17 Ama alulu sɨba vuu ɨna sɨba data lɨfu mukutaka. 18 Tiyiya gil nikya kutɨka tabɨ dzakwatlɨn wasɨmu. 19 A dama ɗenaka wokaci jena daabɨ buwaza awiya kaitɨ ma a ɗɨmma vareza wutu tɨn dage ɗɨma duniya a Ghɨnsɨ har nɨna. Dɨmana bɨ daɗa ɗɨmaka varaiza ewuyau.

20 Bammadu Bakam dɨ tɨma sɨnawa ɗahu, da wi vɨrkɨsɨm masɨlau. Ama adama sɨba dɨ paratlɨn je te tɨma sɨno kaya ɗahɨ. 21 To ɗe taka mukuka, tangan wa dɨ ɗɨngana ndu, “Naiyi, nai Almasihu sukɨnai!” Ko du, “Naiya yikaka, nata samanau. 22 Adama Almasihu sɨba wakɨ, ɨna Anabawa sɨba wakɨ jibi bawatlɨn, tlɨn da ɗɨma kutatau hamba ghɨrɨ, dama da mɨmai sɨbɨ, ndyam ɨna sɨba paratlɨn tansa ɗɨmazaka. 23 Ama tsɨrika ta giɗɨ, mɨn bɨlanasu ndyam kutatau kwaya buwaza taka muku ka.”

Piyakɨ ta Yesu wa Duniya

(Matiyu 24:29-31; Luka 21:25-28)

24 Ama ɗenaka wokacika, kwa ziraya taka kaitɨ ka,
dɨ shɨɗa dɨvinai nda ghama mukwa,
tir dɨmana tsau,
25 Ashuwashu dɨ vaza a dɨna,
da yayiha kutatau gyaruni sɨba iko niya lɨpɨna.

26 A ta taka muku ka sɨbɨ suɗa bɨ naya Vɨrkɨsɨm ata busɨ ɗe lɨpɨm ma ghɨnau ɨna iko fa ngɨlangɨl tusɨ. 27 Aɗika dɨ kafa ɗɨ malaʻiku niwasɨ dɨ paya ghama sɨba para tlɨna Ghɨnsɨ, a ɗe duniya ndyam.

Gyagiyaka wiham ata dɨna tafir

(Matiyu 24:32-35)

28 Na gyagiya wɨham a ta dɨna tyafɨr, nakwa naye dzakwa tɨfakɨka, na sɨnsu jika wasɨn su mbatlaɨ. 29 Gan ndɨ wanka, nakwa naya nɨkɨn kutatawa ta dzakwatlɨnka nasɨnsu jika wokaci su mbatlai. 30 Agashɨ mɨna ta bɨlana, sɨbɨ ni ɗe nakɨn gwahi kɨn tlɨmma miyatlɨnu, kwafa ndyan nikya kutatau ka ɗɨntlɨn. 31 Dɨna ɨna kwatla mbatlɨn mbai ama a ɗɨngɨ tuwun ma daɗa mbazau.

Wɨsɨmma muku ko wokacɨyu

(Matiyu 24:36-44; Luka 17:26-30, 34-36)

32 Ama aghama taka muku, ɨna wokacɨ ka, wi sɨmma gantau, tangan malaʻiku niya ghɨnsa, ko Lai, ama ndɨ Bahɨ wut dɨ sɨnau. 33 Ɗɨmɨ kɨɗa-kɨɗa! Na tsɨrana ta gahi! Aha na sɨmma ko kutɨka dzakwatlɨn ghajau. 34 Kutɨka dzɨga tlɨn ndɨ wan sɨm ba buse tivu: Dɨ zuwa kanwasa kɨn galughɨno niwasɨ da gaya, kowene ki ɨna can nusɨ, dɨ bɨla bana ga viya ndu fa tsɨrafa ta gahi.

35 “Adama wanka, tsɨgɨka sɨnakɨ nasɨmma mukwa da bɨ pɨya Bakamu, ko rɨdza, ko camaza garna, ko hacawuwa, ko tsuwai. 36 Tabi guwana ndɨ guradlai, dɨ ma sɨnakɨ tanau, dɨ marana na ɗaɗɨn kamau. 37 Hamba mɨne bɨlana kɨn, mɨna ta bɨla kowenekɨ, ta tsɨga ta-ta gahɨ!”