Mark 16

Tlahɨ ta Yesu aɗe sɨba miyatlɨn

(Matiyu 28:1-10; Luka 24:1-12; Yuhanna 20:1-10)

1Daga zira ya muku ma sawakɨ, Maryamu Magadaliya, ɨna Maryamu ma Yakubu ɨna Yusufu, ɨna salomi, dɨ kɨna turari adama dɨ batlɨn faka Yesu. 2Mukwa ladi, wato ji muku ta vɨnahɨ ɗe sɨno matsɨr, ndɨ tsuwai dɨ ba tlina tayan ka. 3Tlɨn data ɗɨngaya tsafaya tlɨna ndu, “Wa ji bi zukuta zɨkɨ kɨnaya ata viya yan kɨna?”

4Daga ba tiya tlɨn, anaya a zɨkutɨsu zɨkɨ kai ata viya yan kai, zɨkɨka gyarya . 5Nda zahɨya tlɨn ɗe yan ka, anaya wi bandzɨhɨ e tsɨgɨ a dara te’ai, a kabɨ pyoya petl dɨ shɨɗa tlɨn lakaka yuwai.

6Je ɗɨnga tlɨna ndu, “Nata laka yuwu, hɨna ta dona Yesu na nazaret, badɨ gɨnusa ta ngye wa. Atlata sai, tɨmanan ɗikɨnu. Na nai ge tlɨne arusɨ kɨn. 7Conakɨn nabana nabi bɨla siba gyagiyakɨ niwasɨ ndyan ɨna Bitrus, ta bi cagana caga yika Galili yai. Hɨnabi nayusɨ yika, wane tiye bɨlana.”

8Je tlɨne bawa tlinaya ta yan ka, dɨ kɨrma mirayai, tuwa-tuwa tlɨn da zabazabau aha ghɨrɨ, abɨlama wuya ndu wihamu a dama lakaka yu.

Yesu gɨr Ghamusa tira Maryamu Magadaliya

(Yuhanna 20:11-18)

9[Daga tlusa Yesu a rayi ndɨ tsuwai ata muku ta vɨnahɨ ɗe sɨno matsir, dɨ dzakwa bawahɨyusa tira Maryamu Magadaliya ma dɨ bawayatla tɨmbɨzɨm matsɨr a ɗeza. 10Nji kuma dɨ baza dɨbi bɨla sɨba tlɨn dɨ mbatlɨ ashiyi dɨfa ti, dɨmaraltin ndata ɗuwau da pa rau. 11Dage tlɨne dɨkaya ndu tɨga rayi, har du anaiya gan, a asantlɨma ɨna ɗɨngɨ tazau.

Yesu dɨmɨna bawusa tira sɨba gyagiyakɨ tsir

(Luka 24:13-35)

12Yesu dimɨna bawusa vare wiya tuwatu atira niwi sɨbɨ tsir, tlinata batlina dara shina. 13Je tlɨne piyai dɨbi bɨla bɨrɨm tɨratlɨn, tlɨmma a santlɨmma ɨna ɗɨngɨ ta nikya sɨbɨ tsɨreni kau.

A can ba dɨ tsa bahɨn wuteni a Yesu

(Matiyu 28:16-20; Luka 24:36-49; Yuhanna 20:19-23; ACY 1:6-8)

14Adɨnamau dɨ mɨna bawusa tira ndyan tlɨn bahɨm wutɨka, wokaci ba tlindata ta hambatau. Je te dabatlɨn a ghama kwahiya gɨsaka ɗɨngɨ ɨna kwakumai tatlɨn, adama a gɨsɨma ɗɨngɨ ta sɨba nayusu, a e tlusa ɗe sɨba miyatlɨn.

15Je te ɗɨnga tlin du, “Tika koyi kweki ɗe duniya, na bɨla ko wena vɨrkɨsɨm aɗɨngɨ ma piyatɨ. 16Ndyam ba dɨ tsagaskewatɨ dɨ ɗɨmaya Baptisima ka ta mara bir, ama ndyam ba dɨ nja tsahiya gaskewate ka tɨma mara biru. 17Anaya nikin kutato kɨna tira sɨba tsa gaskewetɨ ɗe ngɨnuwun, A ngɨnuwɨn jena dabɨ bawai tɨmbɨzɨm, Tlɨna ɗɨnga-ɗɨnga a wi shɨnakɨ ba dɨma natlɨnu. 18Tlɨna kuya hamba mbasakako a kɨn tlɨn, ta sagan gubɨ mana ze miyau, wi han ma mara tlɨnu, tlɨna ara kɨntlɨna ghama sɨba vɨzhɨ dɨ lai tlɨnai.”

Bahɨ ta Yesu dɨna

(Luka 24:50-53; ACY 1:9-11)

19Daga mba ɗɨnga a Yesu dɨfa tlɨn, dɨ kiyusɨ dɨ baiya dɨnai, dɨ tsɨgusa teʻeya kɨn Ghɨnsɨ. 20Tlɨn kuma dɨ batlɨnai, tlɨnda bɨla ɗɨngɨ ma piyatɨ koyikweki, Bakam dɨ ɗɨma can ɨna tlɨn, tɨda ɗɨma hamba ghɨri, dama gɨra ndu a ɗɨngɨ matlɨn data ɗɨnga ka katsɨ-katsɨ.]