Mat 1 | NSN | STEP | Gine teka uakekene pe me ro bubunguna Iesu Kristo. Inggono ke la tur toso bunguna Debit. Debit ke la tur toso bunguna Abraham.

a 1.1Uak 22.18; 1OUTT 17.11

b 1.3Uak 38.29-30; Rut 4.18-22

c 1.5Rut 4.13-17

d 1.62Sa 12.24

e 1.112To 22—24; 2OUTT 36.10; Jer 27.20

f 1.12Esr 3.2

h 1.18 Luk 1.27,35

i 1.21 Luk 1.31; 2.21

jAisaia 7.14; 8.8,10

k 1.25 Luk 2.21

‏ Matthew 1

Matiu ke ueluatata tasir tamatang Ju toso bunguna Iesu Kristo

1 ^aGine teka uakekene pe me ro bubunguna Iesu Kristo. Inggono ke la tur toso bunguna Debit. Debit ke la tur toso bunguna Abraham.

2

Abraham te tamana Aisak.
Aisak a tamana Jekop.
Jekop te tamana Juda meso bung tahin.

^bJuda te tamas Peres me Sera ara tinas tang Temar.

Peres te tamana Hesron.

Hesron a tamana Ram.

Ram te tamana Abinadab.

Abinadab a tamana Nason.

Nason te tamana Salmon.

^cSalmon a tamana Boas, doh Boas tinana tang Rehab.

Boas a tamana Obed ge tinana tang Rut.

Obed te tamana Jesi.

^dJesi a tamana Toia Debit.

Debit te tamana Solomon.

Solomon tang tinana na kuaha baka uoum Uraia.

Solomon te tamana Rehoboam. Rehoboam te tamana Abia.

Abia a tamana Asa.

Asa te tamana Jehosopat.

Jehosopat te tamana Jehoram.

Jehoram a tamana Usaia.

Usaia te tamana Jotam.

Jotam a tamana Ahes.

Ahes te tamana Hesekaia.

Hesekaia a tamana Manase.

Manase te tamana Amon.

Amon a tamana Josaia.

^eJosaia te tamana Jehoiakin meso bung tahin. Tar binakonene o tamata ka keip liu turis i Israel ka la i Babilon.

^fI muduhia tar binaka ka keip liu turisir Israel ka la i Babilon.

Jehoiakin te tamana Sealtiel.

Sealtiel a tamana Serubabel.

Serubabel te tamana Abiub.

Abiub a tamana Eliakim.

Eliakim te tamana Asor.

Asor a tamana Sadok.

Sadok te tamana Akim.

Akim a tamana Eliud.

Eliud a tamana Eleasar.

Eleasar te tamana Matan.

Matan a tamana Jekop.

Jekop a tamana Josep.

Josep na bulout Maria,

doh Maria te tinana Iesu gera kilain Kristo. ^{▼▼1.16A tengkanar puhene “Kristo” e kula pare, “A tang siokor tamatar nikedang ke uamatotoin God tar me uelkarus tasir tamat.”}

17 A siokor hangaul, doha toueitinguampe ro bubunguna ko uakekene tur pe tang Abraham ko me lame tang Debit. Doha siokor hangaul doha tang toueit ponompe ro bunguna tang Debit e tuka ka keip liu tur peisir tamat i Israel ka la i Babilon. Doh tar binakonene ka keipisisin i Babilon, a siokor hangaul doho toueit ponompe ro bunguna tamat e tuka ka poho pein Kristo.

Tar binaka ka pohoin Iesu Kristo

18 ^hGine te hape ke kotpokoso pe Iesu Kristo. Maria tinanon a niuamatoto tar le tang Josep. Bo tar binaka puk halana rasina tura le, Maria ka ate manasain pare, ke balakoso to tena nitampopokohor Iabena Dedeil. 19 Teene kompe a tamata uaia pe na bulout Maria, Josep, maeit ke marang hiliu uanomo kompe tatanon. 20 Tar binaka re namana Josep tar ineteninanine na anggelour Tamata Noman ke kotpokoso tatanono toro borborian. Ke kular anggelou pare, “Josep, Ingga ter bunguna Debit, ahik paho sokoro tar kale tang Maria pare, nang kuah, ge a keketik pe e la tatanon e la tur tar Iabena Dedeil. 21 ⁱInggon e turung poho tar keketik bulout, doh ingga o turung uelkila tatanono tang Iesu, teene inggon e turung uelkarus tur tasir tamata tenas niguata uasa.” 22 A mamang inetelikininanine ke kotpokoso sira tun tar uakalahara tar haua ke kulameigir Tamata Noman tasir propet,

23 “Ualongor! A kuah ahik pah ke uangoul keip me bulout e turung balakos,
kare turung poho tar keketik bulout,
kara turung uelkilain tang Emanuel.” ^j
A puhon e kula pare, “God e uangoul tagu tagigeig.”

24 Binaka ke gulete Josep, ke guata sira manasampe ke kula pe na anggelour Tamata Noman, kare kale tang Maria pare, na kuah. 25 ^kBo inggono puk ke uangoul uadedeil keip tatanon e tuka ke la poho peono tar keketik bulout. Doh Josep ke uelkila tatanono tang Iesu.