Luk 21 | NddSC | STEP | Si Jisɔs atab amar ayɛ atakpa anɛ akag nɛkɛ ka nokono ɛkagha akpugha.

Luke 21

Nɛkɛ ngɔn yi nnu akpɔ asighɛ

(Mak 12:41-44)

1 Si Jisɔs atab amar ayɛ atakpa anɛ akag nɛkɛ ka nokono ɛkagha akpugha. 2 Ka atama ayɛ nɛkɛ ngɔn yi nnu akpɔ asighɛ ya akagha akokomo akpugha eben aba. 3 Arag, “Kɛdɛdɛghɛ nɔngɔ ntɔ war, mkpak ngɔn yi nnu akpɔ asighɛ ama kag aga anɛ baga wɔɔ. 4 Ateb anɛ bafa wɔɔ akɛ nɛkɛ mbɔ sa akpe; ka yɛ ka ɔkpak ɛbɛ akɛ wɔɔ ji akpe ji ka akɔ anagha nɛnɛ.”

Jisɔs arag ateb ji ɛbagha kisi

(Mat 24:1,2; Mak 13:1,2)

5 Asɔgba Jisɔs bamɔng ajɔ arag ateb sa akɔ anɔbɔ atan ane nju Ɔsɔwɔ anɔb na nɛkɛ ni akɛ Ɔsɔwɔ. Ka Jisɔs arag, 6 “Ka mbe bifa bi ɛyɛ fa, ngara aragha bagha yi anɛ baujing atɛmmɛ atob, natan nani ɛsam ka njam a ntɛ.”

7 Abɔmmɔ, “Nkpekpene, bagha ngara yi mbe bi ɛwɛmɛ? Ka jɛ ɛjɔ ndenge yɛ ɛtɔngɔ si mbe bi ɛkpɛ wɛmɛ?”

8 Akpɛ: “Baba sɔng aki war wagha. Ateb ebe abagha ka mbeng ɛyaa, arag akɛ nimbɔ ‘Mmɛ nde Kras,’ ka, ‘Ngara ame kpere.’ Kimbɔ tɔɔngɔ. 9 Ka eyogna ntaa na abii ya alɔg mbɔmbɔ ɔbɔn eki war ne, ka mbe bi ɛgbɔghɔmba ɛwɛmɛ, ka nkannisi atɔɔngɔm naosunosu.”

10 Ka atɔ mbɔ: “Ɛka ɛlɔg na ɛka jintingi, ka atɛ alɔg na atɛ. 11 Nsisi anyɛghɛnyɛghɛ akɛba abrɛ, ɔgba na aya ka akpeghe afo, ka mbe ɔbɔn na arenge ya aru ka nobo.

12 “Ka sɔng mbe bifa wɔɔ ɛwɛmɛ, abɔb war ane war niyiri. Akɔghɔ war amo ka ɔkɔnɔ mfa Jus ama kag war ka mgbɔkɔbɔ, ka akɔ war amo ka mfo a aton atakpa anɛ, wɔɔ ateb mbeng ɛyaa. 13 Ka ɛjɔ ɛyagha ɛkɛ war ji ɛtɔ anɛ etebem. 14 Ka ba ne nkana ɛyɛrɛ ka ngara ekiwar fegheayɔ si ɛjɛn ɛkpɛ abɔmmɔ ya abɔmmɔ war. 15 Ka nkɛ war ano ɛwag sa anɛ baujing ɛbrɛ arighima aga war. 16 Bansɔjɛrɛ na bannajɛrɛ na abɔannajɛrɛ bunu na baka na atɛ brɛ na ɛbangannab ɛjɛrɛ, asighi war abɔ akɛ anɛ baujing ɛbrɛ, ka ayon bantingi yon. 17 Ɛsagga anɛ wɔɔ ateb mbeng ɛyaa. 18 Ka nunu isi ɛyɛrɛ ɛtanam 19 Yimi nkoro koro, ɔfɔ nekpen niˈnkankan.

20 “Ngara yi ɛmanna yɛ ɔsɔja, ɛgba asibi Jɛrusalɛm, gbɛrɛ si ngara nɔrɔbɔ ɛyɛ ame kpere. 21 Ka nɔngɔ anɛ ba are ka Judia abɛ ama bibi ka akonkon, ba are ka ɛjɛbɛ aru, ka ba arijɔ ka ɛjɛbɛ asaga. 22 Ka fa ngara yi Ɔsɔwɔ anumu anɛ si ayɛnɛ wɔɔ ka nwɛr Ɔsɔwɔ ɛwɛmɛ. 23 Ntakpa esiyiri ɛjɔ ɛkɛ abaka ba akpe ala na abaka ba akpe abɔ ka ɔbɔ ka afo yafa! Ka niyiri na ɛsaga nete Ɔsɔwɔ ɛjɔ ka nsisi. 24 Bantingi ayon mbɔ ka ɔkangkang akɔ baga sa ajo amo ka baka biga kpakpa. Bajɛntal agagha Jɛrusalɛm bata tɛtɛ ngara mbɔ akan.

25 “Ka ndenge ajɔ jɔ ka njon, mmɛ na adughandu. Ka eying, anɛ ajɔ na ɔbɔn, efegheayɔ na eburu nasi ebok ɛjɔ ene ka aya. 26 Ebe anɛ ajɔ na ɔbɔn ka mbe bi anɛ ayɛ bi ɛbagha ɛmɛwɛmɛ ka eying, nobo ɛjɔ ɛnyɛngɛnyɛngɛ. 27 Ka ofo bifa anɛ ayɛ Mmɔ a Munnu abagha ka ngualab na nsam na ntakpa negere. 28 Ngara yi ɛmanna yɛ mbe bi ɛmajam nɛwɛmɛ yimi nkoronkoro ka mba Ɔsɔwɔ, atebsi nanagha ɛnɛrɛ emekpere.”

29 Atob nagana atɔ mbɔ: “Sɛngɛ ekokonadu na nte yiga wɔɔ. 30 Ngara yi nte ɛmanna jam nɔdɔrɔ warafɔnɔ ɛgbɛrɛgbɛrɛ si ono emekpere. 31 Ɛkanɛkɛn ngara yi ɛmanna yɛ mbe bi ɛmajam nɛwɛmɛ, warafɔnɔ ɛgbɛrɛgbɛrɛ si oton Ɔsɔwɔ emekpere.

32 “Ntɔ war kɛdɛdɛghɛ, eying jifa ɛkpɔghɔm wɔɔ, tɛtɛ mbe bi ɛwɛmɛ. 33 Nobo na nsisi ɛfɔ nkannisi, ka ano ɛyaa nkannisi afɔm.

34 “Bababa nɛnɛrɛ, ekikɔ nte ɛyɛrɛ ekono ka mbe eying sɛ ɛnaa eyighi ɛfɔ mbe eyini Ɔsɔwɔ, ka ofo bifa ɛjɔ na ɔkɛbɛɔkɛbɛ nasi ɛkpɔgɔ ɛbɔb nnya. 35 Ka ɛjɔ na ɛkɛ anɛ wɔɔ ba are ka eying. 36 Bababa nɛnɛrɛ, ɛjɔ ka njɔ kpere ngara sɔng Ɔsɔwɔ akɛ war nsam eyimi ekigbɔ ateb mbe bi ɛbagha ɛmɛwɛmɛ, sɔng ɛma eyimi ka nibri Mmɔ a Munnu.”

37 Kpere ofo Jisɔs ajɔ akpene ka nju Ɔsɔwɔ, ka kpere nogo amogho ama ka ka Nkonkon a Olib, 38 ka anɛ wɔɔ ba ajɔ yongo atɔng akiɛ afofo ka efurusu aba ka nju Ɔsɔwɔ ama yogɛ.