Luke 22

Anama sa ayon Jisɔs

(Mat 26:1-5; Mak 14:1,2; Jɔn 11:45-53)

164 Munu ka ngara Eyighi Brɛk yi arikag yist, ya abeng si Eyighi Sing sighi, ekpere, 2ka nton a Baɛjɔ Ɔsɔwɔ na bekpena ejighi ajɔ asɛb mba sa ayon Jisɔs ka ajɔ abɛ ji anɛ ane mbɔ. 3Ka Nnam anam Judas, ya abengɛ si Iskariot, nnɛ wiwi ka ɛbɔngɔ asɔgba wobo na aba. 4Ka Judas amo ama kɔrɔ nton a Baɛjɔ Ɔsɔwɔ na anɛ bisi ba ababa nju Ɔsɔwɔ anama sa ajɛn agoro Jisɔs akɛ mbɔ. 5Ka mbɔ ayighi atama sa akiɛ akpugha. 6Ka Judas ajɔ ababa ofo ba anɛ arijɔ sa asighi Jisɔs abɔ akɛ mbɔ.

Etonga biji eyighi Sing sighi

(Mat 26:17-25; Mak 14:12-21; Jɔn 13:21-30)

7Ka ofo esi bi Eyighi Brɛk yi arikag yist yi ayon njɔ ajɔ eyighi Sing sighi. 8Ka Jisɔs ato Fita na Jɔn sa amo ka Jɛrusalɛm, atɔ mbɔ, “Ba sɔng etongo mfo ɛnɔngɔ bi ɛnɛghɛ eyighi Sing sighi.”

9Abɔmmɛ, “Fang yɔ ɔsɛb si etongo?”

10Jisɔs akpɛ, “Sɛ ɛnam ka ɛjɛbɛ, munnu ya asɔn nsɛ alab akɔrɔ war, ba tɔɔngɛ sɔng ka nju ya anama, 11ɛtɔ mfɔnɔ nju, ‘Nkpekpene asi ɛbɔmma: Nkɛbɛ ajɛnanɛ ma, yi ajɔ anɛ eyighi Sing sighi na asɔgba ɛyɛ?’ 12Atɔngɔ war ntakpa nkɛbɛ ka bɔsɔ ɛnyɔng, kpere ejo ji ɛsɛbɛ erefa. Ba tongo mbe wɔɔ fa.”

13Mbɔ amo ama yɛ mbe ɛkanɛkan si Jisɔs atɔ mbɔ. Ka atongo mbe eyighi Sing sighi fa.

14Si ngara asi, Jisɔs na afɔsil ɛbɛ ajɔ nji ka okpokoro. 15Ka atɔ mbɔ, “Ɛkɔrɔm ntakpantakpa si nnɛ eyighi Sing sighi jifa nanɛrɛ ka niyiri ɛnaa ɛjam. 16Ka ntɔ war, mkpɛmmɛ nɛ eyighi Sing sighi tɛtɛ ɛwɛmɛ ka oton Ɔsɔwɔ.”

17Jisɔs atab mkpogho, akag Ɔsɔwɔ same arag, atɔ afɔsil ɛbɛ, “Ma kɔ ɛbanga ɛkɛ nɛnɛrɛ. 18Ka ntɔ war, mkpɛmmɛ wɔ alab a greb tɛtɛ oton Ɔsɔwɔ ɛba.”

19Ka Jisɔs akɔ brɛk, akag Ɔsɔwɔ same ka akɛbbɛ akɛ mbɔ, ka arag, “Nnya biji ɛyaa yina yi nkɛ nteb war; ma nena sɔng ɛjɔ a ɛgbɔmnter.”

20Ɛkanɛkan ngara yi eyighi ɛkanna Jisɔs atab mkpogho, ka arag, “Mkpogho yifa ayim ka ntama mfɛmfɛ ka anɔng ɛyaa ya nwuru kisi ɛjɛrɛ. 21Ka nnɛ ya agorom are fa ka okpokoro nanaa. 22Mmɔ a Munnu amogho si Ɔsɔwɔ agara. Ka esiyiri ɛjɔ ɛkɛ nnɛ yɔ ya agorɛ!” 23Asɔgba Jisɔs ajam nɔbɔmmɔ nimbɔ, yɛnnɛ yɔ ka ɛbɔngɔ mbɔ ya ane na.

24Ka asɔgba ajam nafaba atɛ yɛnnɛ yɔ ka ɛbɔngɔ mbɔ ya ga yar. 25Ka Jisɔs atɔ mbɔ, aton a Bajɛntal afe anɛ a mbɔ ka akora abɔ anɛ bisi ba ane anɛ baga ayɛ niyiri abeng nimbɔ bɛnanagha. 26Ka war ma kijɔ na. Nɔngɔ nnɛ ya aga yar ka ɛbɔngɔ ɛjɛrɛ ajɔ nasi mmɛnsɛ, ka nnɛ a isi ajɔ nasi nrɔghanoto. 27Ka yɛnnɛ aga yar, nnɛ ya ajig ka okpokoro fasɛ nrɔghanoto? Nnɛ ya ajig ka okpokoro sang? Ka nde ka ɛbɔngɔ ɛjɛrɛ nasi nrɔghanoto. 28War ba ere anɛ ba ayim nanaa ka ngara nagara ɛnaa. 29Ka mma war kɛ nɔyɔ si efe oton nasi Nsɔjaa akɛm, 30sɔng ɛnɛ ɛwɔ ka okpokoro ɛbaa ka oton ɛbaa ɛjɔ nji ka ntenji aton ekpe banaa ka bɛjɛbɛ Isɛrɛl wobo na baba.

31“Simɔn, Simɔn, Nnam amɔbɔɔ nɔyɔ sa ajak war wɔɔ nasi nnɛ ya ajak wit sɔng ayighi akpanfab. 32Ka Mma kag njɔ nkɛ war, Simɔn, sɔng erighigbɔ ka ntama ɛyɛrɛ. Ka ɔmanna fɛnɛ njam ka ntama ɛya kag abɔannaja ekoro biji.”

33Ka akpɛ, “Ntaa, mmotongo biji si ntɔnga mmo mgbɔkɔbɔ nfɛnɛ mkpɔ nana.”

34Jisɔs akpɛ, Fita, “Nɔngɔ mmɛ ntɔa, sɔng nnu nkɔk akok ɛnɛji, ɔtɛnɛm mkpɛ ɛsa.”

35Ka Jisɔs abɔmmɔ mbɔ, “Ngara yi nto war si ɛmɛ rag ano Ɔsɔwɔ eki ton ɛba ɛkagha akpugha, ɛba nɛjɛn si akpaghata mbe ɛran war ran?”

“Jaji,” mbɔ akpɛ.

36Jisɔs atɔ mbɔ, “Ka munu okpena ɛba ɛkagha akpugha, na ɛba nɛjɛn ton, ka orinafɔ ɔkangkang, goro ɛkpagha ɛnɛmɛ ɛja ogo jiji. 37Ayɛnɛ ka nwɛr Ɔsɔwɔ si ‘Afanɛ akag ka ɛbɔngɔ bene a abibi afɛ’ ka nɔngɔ ntɔ war ji ayɛnɛ atebem ɛwɛmɛwɛmɛ.”

38Asɔgba ɛyɛ atɔɛ, “Ntaa yɛ, akangkang aba.”

Ka Jisɔs akpɛ, “Eme benge.”

Jisɔs Akag njɔ ka Nkonkon a Olib

(Mat 26:36-46; Mak 14:32-42)

39Ka Jisɔs aru ya Jɛrusalɛm amogho ka nkonkon a olib si eyoghoyogho, ka asɔgba ɛyɛ atɔɔngɛ. 40Si asi ka mfo fɔnɔ, atɔ mbɔ, “Ma kag njɔ sɔng ekigbɔ ka nagara.” 41Jisɔs ajɛrɛ amo ka nkɔ kperekpere asighi mbɔ, akɛmɛ agba akag njɔ, 42“Nsɛ, ɛkɔrana yighim niyiri nifa; sɛ ɛkɔrɔm sang, ka nɔngɔ ɛjɔ si ɛkɔra.” 43Ka ɛnjɛl aru ya bɔsɔ asɛnɛ ama akiɛ ekoro biji. 44Ka Jisɔs ajɔ ka ntakpa esiyiri, ka akag njɔ nkoronkoro ka nete ɛnɛ, ka noyobo eruɛ ka biji ɛtɔngngɔ ka nsisi nasi anɔng.

45Ngara yi Jisɔs atam ka njɔ, afɛnɛ amakɔrɔ asɔgba ɛyɛ anannan, yi biji ɛmimbɔ rɛ ateb niyiri. 46“Yɛ ɛnan jɛ?” Abɔmmɔ mbɔ. “Tam yimi ɛkag njɔ sɔng nagara ɛmannaba erigbɔ.”

Abɔb Jisɔs

(Mat 26:47-56; Mak 14:43-50; Jɔn 18:3-11)

47Si Jisɔs akpagha ragha na asɔgba ɛyɛ ebe abunu aba ama yimi, munnu ya abengɛ si Judas, nnɛ wiwi ka ɛbɔngɔ asɔgba ɛyɛ wobo na aba, ya agbɔ mba. Amakɔrɔ Jisɔs sa asɔrɛ ka akpɔghɔ si ndenge, 48ka Jisɔs abɔmmɛ, “Judas wɔ ofe ɛsɔra akpɔghɔ ogoro Mmɔ a Munnu?”

49Ngara yi asɔgba Jisɔs ayɛ ji ɛkpɛ ɛwɛmɛ, arag, “Ntaa, ɛkɔ akangkang ɛyɛrɛɛ ɛlɔg na mbɔ?” 50Ka nsɔgba Jisɔs wiwi akɛbɛ mmɔanju a ntakpa nton a njɔ Ɔsɔwɔ ɔtɔng ɔbɔ bunu.

51Ka Jisɔs atɔ mbɔ, “kine na!” Ka akɔmɔ munnu yɔ ka ɔtɔng ka ɔtɔng ɛnɔb.

52Ka Jisɔs atɔ nton a baɛjɔ Ɔsɔwɔ, ba ɛbaba nju Ɔsɔwɔ, na abokogho, ba aba sa ama bɔbɛ, “Mmɛ nde nnyaju yɛ ɛbagha na akangkang na akpono ɛmɛ bɔbɔm? 53Kpere ofo yinjɔ nanɛrɛ ka nnetek a nju Ɔsɔwɔ, ka war abɔ erim kɔmɔ. Ka ngara ɛyɛrɛ yi, yi nnɛ a ujing afɔ nɔyɔ.”

Fita atɛn si yɛ Jisɔs anyim

(Mat 26:57,58,69-75; Mak 14:53,54,66-72; Jɔn 18:12-18,25-27)

54Ka ba ɛbaba nju Ɔsɔwɔ abɔb Jisɔs amo nanɛ ka nju a ntakpa nton a njɔ Ɔsɔwɔ. Fita ajɔ afana atɔɔngɔ mbɔ daghadagha. 55Ka ngara yi bamɔng ama fogho ngon ka etingting nnetek a nju Ɔsɔwɔ ka mbɔ wɔɔ ajɔ nji, Fita ajɔ nji fa na mbɔ. 56Mmɔanju yɔka ayiɛ sa ajig fa ka nkɔa ngon. Asɛngɛ nnɔbɔnnɔbɔ ka atɔ mbɔ, “Munnu yɔfa ajɔ na Jisɔs.”

57Ka Fita agɛbbɛ. Arag, “Manka yɛ nnyim.”

58Ka ma nkokomo ngara nnɛ yɔntingi ayiɛ ka arag, “Wɔ titi ɔtam ore nsɔgba Jisɔs.”

Fita akpɛ, “Munnu mmɛ sang!”

59Si awa yiyi asighi nnɛ yɔntingi arag ekorokoro, “Ɛdɛdɛghɛ, munnu yɔfa ajɔ na Jisɔs, ateb atama re nnɛ a Galilian.”

60Ka Fita akpɛ, “Munnu, mmɛ nnyim ji yɔragha oteb!” Si Fita ajɔ arag, nnu a nkɔk akok. 61Ntaa amanga abri Fita sɔngsɔng. Ka Fita agbɔnter a nono ni Ntaa atɔɛ: “Sɔng nnu a nkɔk akok ɛnɛji, ɔtɛnɛm mkpɛ ɛsa.” 62Ka Fita aru kifi ama nan ɛsagɛsag.

Baɛbaba mfo ajɔ akana Jisɔs

(Mat 26:67,68; Mak 14:65)

63Abunu ba ajɔ ababa Jisɔs ajamɛ nakana ka amɔbɛ. 64Abɔbɛ mbɔ́ ka amar ka abɔmmɛ, “Tɔngɔ si ore Mbono Ɔsɔwɔ! Tɔ war nnɛ ya abon na?” 65Ka arag ebe abibi ano a nsɔn akiɛ.

Aba na Jisɔs ka nkɔn aton

(Mat 26:59-66; Mak 14:55-64; Jɔn 18:19-24)

66Ka efurusu nkɔn a abokogho a Jus, nton a baɛjɔ Ɔsɔwɔ na bekpena ejighi, aba amakɔn, ka akɔ Jisɔs aba nanɛ ka mfo a mbɔ. 67Ka mbɔ arag, “Tɔ war, Orena Kras.”

Jisɔs akpɛ, “Ntɔ na war, ɛtamam ɛkɛm, 68ka mbɔmmɔ na war mbɔmmɔ, mɛkpɛm. 69Ka jam munu sɔng isi, Mmɔ a Munnu ajɔ nji ka ɔbɔ bunu Ɔsɔwɔ bi ɛgagaga.”

70Ka mbɔ wɔɔ abɔmmɔ Jisɔs, “Wɔyɔ ore Mmɔ a Ɔsɔwɔ?”

Jisɔs akpɛ mbɔ, “Si war ɛrag si nde.”

71Ka mbɔ arag, “Nang ka ɛkpɛsɛb njɔayɛ? Emoyog ka nnyɔ ɛbɛ yɛfɔnɔ.”