Heb 10 | NdeBEN | STEP | Umthetho uyisithunzi nje sezinto ezinhle ezizayo kodwa hatshi lokho okuyikho uqobo. Ngenxa yemihlatshelo efanayo ephindwaphindwa kokuphela iminyaka leminyaka ayingeke ibenze baphelele labo abasondela ekukhonzeni.

‏ Hebrews 10

Umhlatshelo KaKhristu Kanye Kuphela

1 Umthetho uyisithunzi nje sezinto ezinhle ezizayo kodwa hatshi lokho okuyikho uqobo. Ngenxa yemihlatshelo efanayo ephindwaphindwa kokuphela iminyaka leminyaka ayingeke ibenze baphelele labo abasondela ekukhonzeni. 2 Aluba wawusanelisa, imihlatshelo yayingayikuyekelwa ukunikelwa na? Ngoba abakhonzayo babezahlanjululwa kube kanye kuphela, njalo babengasayikuzizwa belecala lezono zabo. 3 Kodwa imihlatshelo iyisikhumbuzo sezono zeminyaka yonke, 4 ngoba akwenzakali ukuba igazi lenkunzi lelembuzi lisuse izono.

5 Ngakho-ke, uKhristu esefikile emhlabeni wathi:

“Umhlatshelo lomnikelo kawukufunanga,
kodwa wena wangilungisela umzimba;
6 kawuthokozanga
ngeminikelo yokutshiswa leminikelo yesono.
7 Ngasengisithi, ‘Ngilapha,
kulotshiwe ngami emqulwini,
ngilande ukuzokwenza intando yakho,
Oh Nkulunkulu.’ ^{▼▼AmaHubo 40.6-8}”
8 Kuqala wathi, “Imihlatshelo leminikelo, iminikelo yokutshiswa kanye leminikelo yesono kawuyifunanga, njalo kayikuthokozisanga” (lanxa umthetho usithi kayenziwe). 9 Wabuya wathi, “Ngilapha, ngilande ukuzokwenza intando yakho.” Ususa okokuqala ukuze amise okwesibili. 10 Njalo ngaleyontando senziwe saba ngcwele ngomhlatshelo womzimba kaJesu Khristu kanye kuphela.

11 Insuku zonke umphristi uyema enze imisebenzi yakhe yenkonzo, anikele njalonjalo imihlatshelo minye, engeke isuse izono. 12 Kodwa kwathi umphristi lo esenikelele izikhathi zonke umhlatshelo owodwa wezono, wahlala phansi esandleni sokunene sikaNkulunkulu. 13 Kusukela ngalesosikhathi ulindele izitha zakhe ukuba zibe yisenabelo sakhe, 14 ngoba ngomhlatshelo owodwa usephelelise nini lanini labo abenziwayo ukuba ngcwele.

15 LoMoya oNgcwele uyafakaza kithi ngalokho. Kuqala uthi:

16 “Lesi yisivumelwano engizasenza labo
emva kwalesosikhathi, kutsho iNkosi.
Ngizafaka imithetho yami ezinhliziyweni zabo
ngiyilobe lasezingqondweni zabo.” ^{▼▼UJeremiya 31.33}
17 Wabuya wengeza wathi:

“Izono zabo lezenzo zokungabi lomthetho,
angiyikukhumbula futhi.” ^{▼▼UJeremiya 31.34}
18 Nxa lezi sezithethelelwe, kawusekho umhlatshelo wesono.

Inkuthazo Yokubekezela

19 Ngakho-ke, bazalwane, njengoba silethemba lokungena eNdaweni eNgcwelengcwele ngegazi likaJesu, 20 ngendlela entsha ephilayo, esiyivulelwe ekhethenini, okuyikuthi umzimba wakhe, 21 njalo njengoba silomphristi omkhulu ophethe indlu kaNkulunkulu, 22 kasisondeleni kuNkulunkulu ngezinhliziyo eziqotho ngethemba elipheleleyo lokholo; sibe lezinhliziyo ezicheliweyo ukuba sihlanjululwe isazela secala lemizimba yethu igeziswe ngamanzi ahlanzekileyo. 23 Kasibambeleleni ngokuqina kulo ithemba esilikholwayo, ngoba lowo owathembisayo uthembekile. 24 Njalo kasicabangeni ukuba singakhuthazana njani ethandweni lasezenzweni ezinhle. 25 Kasingakudeli ukuhlangana, njengalokhu abanye abajayele ukukwenza kodwa kasikhuthazaneni ikakhulu njengoba sibona uSuku lusondela.

26 Nxa siqhubeka sisenza izono ngabomu emva kokuba iqiniso sesilazi, kawusekho umhlatshelo wezono, 27 kodwa umlindelo owesabekayo wokwahlulelwa kuphela kanye lomlilo ovuthayo ozaqothula izitha zikaNkulunkulu. 28 Owawalayo umthetho kaMosi wafa kungela sihawu ngobufakazi babafakazi ababili kumbe abathathu. 29 Pho licabanga ukuthi ufanele ukujeziswa kakhulu kangakanani umuntu owanyathela iNdodana kaNkulunkulu ngaphansi konyawo, ophathe igazi lesivumelwano elamenza waba ngcwele njengento engangcwele, lohlambaza uMoya womusa na? 30 Ngoba thina siyamazi lowo owathi, “Ukuphindisela ngokwami; ngizabuyisela,” ^{▼▼UDutheronomi 32.35} njalo wathi, “INkosi izakwahlulela abantu bayo.” ^{▼▼UDutheronomi 32.36; AmaHubo 135.14} 31 Kuyinto eyesabekayo ukuwela ezandleni zikaNkulunkulu ophilayo.

32 Khumbulani insuku zakuqala leziyana emva kokuba selamukele ukukhanya, lapho elaqinisela khona ebunzimeni obukhulu phakathi kokuhlupheka. 33 Ngezinye izikhathi lenziwa umbukiso wokuhlanjazwa lokuhlukuluzwa; kwathi ngezinye izikhathi lamanyana lalabo ababephathwa kanjalo. 34 Laba lozwelo kulabo ababesentolongweni, lamukela ngentokozo ukuthunjwa kwempahla yenu, ngoba lalikwazi ukuthi lina lilempahla engcono engapheliyo. 35 Ngakho lingalilahli ithemba lenu; lizavuzwa ngokunengi.

36 Kuyadingeka ukuba libekezele ukuze kuthi lapho seliyenzile intando kaNkulunkulu, lamukele lokho akuthembisayo. 37 Ngoba,

“Ngesikhatshana nje,
lowo ozayo uzafika
njalo kasoze aphuze.”
38 Kodwa,

“Olungileyo wami uzaphila ngokukholwa.
Angahlehlela emuva,
kangiyikuthokoza ngaye.” ^{▼▼UHabhakhukhi 2.3-4}
39 Kodwa thina kasisibo balabo abahlehlela emuva babhujiswe, kodwa labo abakholwayo basindiswe.