‏ Job 31

UJobe Uqhubeka Ekhuluma

1“Ngasenza isivumelwano lamehlo ami
ukuthi angakhangeli intombi ayihawukele.
2Siyini isabelo somuntu asabelwe nguNkulunkulu ophezulu na,
ilifa lakhe elivela kuSomandla phezulu?
3Akusikubhujiswa kwababi
lokutshabalaliswa kwalabo abenza okubi na?
4Kanti kaziboni yini izindlela zami
abale zonke izinyathelo zami?

5Nxa ngike ngahamba ngokwamanga
loba unyawo lwami lwakhuthalela inkohliso
6uNkulunkulu akangikale esikalini sakhe esiqotho
ukuze abone ukuthi angilasici,
7nxa izinyathelo zami zike zaphambuka endleleni,
nxa inhliziyo yami ikhokhelwe ngamehlo ami,
noma kumbe izandla zami zike zangcoliswa,
8lapho-ke abanye kabazidlele lokho engikuhlanyeleyo,
njalo amabele ami kawasitshunwe.

9Nxa inhliziyo yami ike yakhangwa ngowesifazane,
kumbe nxa ngike ngacathama ngasemnyango kamakhelwane,
10lapho-ke owami umfazi kacholele enye indoda,
njalo amanye amadoda kawalale laye.
11Ngoba lokho bekuzakuba lihlazo,
isono esifanele ukwahlulelwa.
12Kungumlilo otshisayo onguMaqothula;
ngabe kwasiphuna isivuno sami.

13Nxa ngingaphathanga kuhle izisebenzi zami,
esesilisa lesesifazane
nxa kukhona abakusolayo kimi,
14ngizakuthini lapho uNkulunkulu esengibuza ngakho na?
Ngizaphendula ngithini nxa sekumele ngichaze na?
15Yena lowo owangenzayo esibelethweni kabenzanga labo na?
Kasuye yini yena kanye owasenzayo sonke
phakathi kwezisu zabomama na?

16Nxa ngilahlele eceleni izifiso zabayanga
loba ngayekela amehlo omfelokazi edinwa yizinyembezi,
17nxa ngizidlele ngedwa isinkwa sami,
ngingasabelani lezintandane,
18kodwa ebutsheni bami ngabondla njengaboyise,
njalo kusukela ekuzalweni kwami ngamkhokhela umfelokazi,
19nxa ngike ngabona umuntu esifa ngokuswela izigqoko,
loba umuntu oswelayo engelasivunulo,
20njalo inhliziyo yakhe ayingibusisanga
ngokumfudumeza ngoboya bezimvu zami,
21nxa ngike ngaphakamisa isandla sami phezu kwentandane,
kodwa mina ngikwazi ukuthi bayangilalela emthethwandaba,
22nxa kunjalo kayikhumuke ingalo yami kusukela ehlombe,
kayephulwe endololwaneni.
23Ngoba ngesaba ukubhubhisa kukaNkulunkulu,
kwathi ngokwesaba inkazimulo yakhe,
ngayekela ukwenza izinto ezinjalo.

24Nxa ngifake ithemba lami phezu kwegolide,
loba ngathi kulo igolide elicolekileyo, ‘Ulithemba lami,’
25nxa bengithokoziswa yinotho yami enengi,
lenzuzo evele ngezandla zami,
26nxa ngilikhangele ilanga libenyezela
loba inyanga ihamba ngenkazimulo,
27yaze yayengeka inhliziyo yami ngaphakathi
nganga isandla sami ukuzikhonza,
28lezi lazo yizono ebezifanele ukwahlulelwa,
ngoba bengizabe ngingathembekanga kuNkulunkulu ophezulu.

29Nxa ngike ngathokoza ngomnyama owehlele isitha sami
kumbe ngagqabhaza ngohlupho olumehleleyo,
30kangivumelanga umlomo wami ukuba wenze isono
ngokuqalekisa ukuphila kwakhe,
31nxa abantu bendlu yami bengakaze bathi,
‘Ngubani ongazange azitike ngenyama kaJobe na?’
32kodwa kakulasihambi esake salala emgwaqweni,
ngoba umnyango wami wawuhlala uvulelwe izihambi
33nxa ngisithukuzile isono sami njengokwenziwa ngabantu,
ngokufihla umlandu wami enhliziyweni yami
34ngoba ngisesaba abantu
ngithuthunyeliswa yikweyiswa ngabosendo
ngazithulela ngaze ngala lokuphumela phandle.

35(Oh, kube ukhona ongizwayo!
Sengisayina incwadi yokuzivikela kwami,
uSomandla kangiphendule;
ongimangalelayo kabhale phansi
icala angethesa lona.
36Leyoncwadi ngingayithwala ehlombe lami,
ngingayithwala ekhanda njengomqhele.
37Bengingamchazela ngokugcweleyo
ngazozonke izinyathelo zami;
ngisondele kuye njengenkosana.)

38Nxa ilizwe lakithi lingiphika
lemifolo yalo imanzi ngezinyembezi,
39nxa ngike ngadla izithelo zalo angaze ngabhadala
loba ngephula imimoya yabanikazi,
40nxa kunjalo kakumile ameva esikhundleni sengqoloyi,
lokhula esikhundleni sebhali.”
Aphela lapha amazwi kaJobe.