‏ Job 6

Impendulo KaJobe

1Wasephendula uJobe wathi:

2“Nxa ubuhlungu bami bungalinganiswa
lokuhlupheka kwami konke kufakwe esikalini!
3Ngempela bungasinda ukwedlula itshebetshebe yolwandle,
akungamangalisi ukuthi amazwi ami abhede kanje.
4Imitshoko kaSomandla iphakathi kwami,
umoya wami unatha itshefu yayo;
inhlupho zokuhlukuluza zikaNkulunkulu ziqondiswe kimi.
5Kambe ubabhemi weganga uyakhala yini utshani bukhona,
loba inkabi ikhonye yona ukudla ilakho?
6Ukudla okuduma kuyadleka na kungelatswayi,
kumbe okumhlophe kweqanda kuyanambitheka yini?
7Ngiyala ukukuthinta;
ukudla okunjalo kubuyisa inhliziyo yami.

8Oh, aluba ngingazuza isicelo sami,
uNkulunkulu angiphe lokho engikufisayo,
9ukuthi uNkulunkulu avume ukungichoboza,
ekele nje isandla sakhe singiqede!
10Lalapho ngizabe ngilokhu ngilale induduzo
intokozo yami ebuhlungwini obungadediyo,
ukuthi bengingawaphikanga amazwi akhe oNgcwele.

11Ngilamandla bani okuthi ngibe lokhu ngithemba?
Ngisamelelwe yini ukuba ngibe ngilokhu ngibekezela?
12Ngilamandla elitshe yini?
Inyama yami ilithusi na?
13Ngilawo yini amandla okuzisiza,
manje njengoba sengemukwe impumelelo?

14Iloba ngubani ogodla umusa kumkhula wakhe
udela ukwesaba uSomandla.
15Kodwa abafowethu kabathenjwa
njengemifula egeleza icitsha,
njengemifula echithayo
16ileliqhwa eselincibilika,
njalo igcwele ngongqwaqwane osencibilikile,
17kodwa ikhawule ukugeleza ngesikhathi sokoma,
kuthi sekutshisa amanzi anyamalale ezindleleni zawo.
18Indwendwe zamakamela ziyaphambuka ezindleleni zazo;
zintule enkangala zifele khona.
19Indwendwe zamakamela aseThema zidinga amanzi,
abathengisi baseShebha balinde bethembile.
20Bayadana ngoba bebekade bethembile;
bayafika khonale bafike badane.
21Lani selitshengise ukuthi kalilancedo;
libona into eyesabekayo beselisesaba.
22Sengake ngatsho yini ukuthi, ‘Ake lingihlawulele lokhu,
ngihlengani ngempahla yenu,
23ngikhululani esandleni sesitha,
ngihlengani ekufithizelweni ngabalesihluku’?

24Ngifundisani, ngizathula;
ake lingitshengise lapho engiphambanise khona.
25Abuhlungu kanganani amazwi eqiniso!
Kodwa ukuphikisa kwenu kutshengisani?
26Lizama ukuqondisa engikutshoyo,
amazwi omuntu oselahlekelwe lithemba liwathethe njengomoya nje na?
27Lina lingenza inkatho ngezintandane,
lithengise lomngane wenu.

28Kodwa okwamanje wobani lomusa lingizwele.
Ngingaqamba amanga phambi kwenu na?
29Dedani, lingenzi okungaqondanga;
khumbulani kutsha, phela ubuqotho bami busengozini.
30Kukhona okubi na okusezindebeni zami?
Kambe umlomo wami kawukwehlukanisi okubi na?”