Proverbs 15

1Impendulo ethobekileyo iyaludedisa ulaka,
kodwa ilizwi elilukhuni livusa ulaka.

2Ulimi lomuntu ohlakaniphileyo lukhulisa ulwazi,
kodwa umlomo wesiwula uphihlika ubuphukuphuku.

3Amehlo kaThixo asezindaweni zonke,
alinde ababi labalungileyo.

4Ulimi oluletha ukuphola luyisihlahla sokuphila,
kodwa ulimi olukhohlisayo luyawephula umoya.

5Isiwula siyakulahla ukulaya kukayise,
kodwa owemukela ukuqondiswa uveza ukuhlakanipha.

6Indlu yolungileyo igcwele inotho,
kodwa inzuzo yababi ibehlisela uhlupho.

7Izindlela zabahlakaniphileyo ziyalwandisa ulwazi,
kodwa kazenzi njalo inhliziyo zeziwula.

8 UThixo uyawenyanya umhlatshelo wababi,
kodwa umkhuleko wabaqotho uyamthokozisa.

9 UThixo uyayenyanya indlela yababi,
kodwa uyabathanda labo abalandela ukulunga.

10Ukujeziswa okubuhlungu kumlindele ophambuka endleleni;
ozonda ukuqondiswa uzakufa.

11UKufa lokuBhujiswa kusobala phambi kukaThixo
kangakanani ke inhliziyo zabantu!

12Isideleli siyakuzonda ukuqondiswa;
kasibuzi kwabahlakaniphileyo.

13Inhliziyo ethokozayo yenza ubuso buchelese,
kodwa inhliziyo ebuhlungu yephula umoya.

14Inhliziyo eqedisisayo idinga ulwazi,
kodwa umlomo wesiwula wongiwa ngobuthutha.

15Zonke insuku zabancindezelweyo zilukhuni,
kodwa inhliziyo ethokozileyo ihlezi iminza.

16Kungcono ukuba lokulutshwana umesaba uThixo
kulokuba lenotho enengi ulenhlupho.

17Kungcono ukutsheba ngemibhida lapho okulothando khona,
kulokudla inyama enonileyo okugcwele khona inzondo.

18Ololaka oluvuthayo ubanga ukuxabana,
kodwa umuntu obekezelayo uqeda inkani.

19Indlela yevila igcwele ameva,
kodwa indlela yomuntu olungileyo ikhamisile.

20Indodana ehlakaniphileyo iletha intokozo kuyise,
kodwa indoda eyisiwula yeyisa unina.

21Ubuthutha bujabulisa umuntu ongelangqondo,
kodwa umuntu olokuzwisisa uhamba ngendlela eqondileyo.

22Amaqhinga ayehluleka nxa kungelazeluleko,
kodwa ayaphumelela ngabeluleki abanengi.

23Umuntu uyathokoza ngokupha impendulo eqondileyo
yeka kuhle kangakanani ukuzwa ilizwi elifaneleyo!

24Indlela yempilo iyimpumelelo kohlakaniphileyo
ukuze angalengeli engcwabeni.

25 UThixo uyayibhidliza indlu yomuntu oziphakamisayo,
kodwa indawo yomfelokazi kayiyikuncitshiswa.

26 UThixo uyayizonda imicabango yababi,
kodwa leyo eyabalungileyo iyamthabisa.

27Indoda eyisihwaba iluhlupho kwabendlu yayo,
kodwa lowo ozonda ukufunjathiswa uzaphila.

28Olungileyo uyayihlolisisa impendulo engakaphenduli,
kodwa umlomo womubi ukhihliza okubi.

29 UThixo ukhatshana kwababi,
kodwa uyezwa umkhuleko wabalungileyo.

30Ubuso obubobothekayo buletha intokozo enhliziyweni,
lezindaba ezinhle ziqinisa umzimba.

31Lowo olalela ukukhuzwa okumphilisayo,
uzahlala kuhle labahlakaniphileyo.

32Lowo onganaki ukulaywa uyazeyisa yena ngokwakhe,
kodwa onanza iziqondiso uzuza ukuzwisisa.

33Ukumesaba uThixo kufundisa umuntu ukuhlakanipha,
njalo ukuzithoba kwandulela udumo.