1 Samuel 7
1Ngakho abantu baseKhiriyathi Jeyarimi beza balithatha ibhokisi lesivumelwano sikaJehova. Balisa endlini ka-Abhinadabi eqaqeni bangwcelisa u-Eliyazari indodana yakhe ukuba agcine ibhokisi lesivumelwano sikaJehova.USamuyeli unqoba amaFilisti eMizipha
2Kwakuyisikhathi eside, iminyaka engamatshumi amabili isiyonke, ibhokisi lesivumelwano liseKhiriyathi Jeyarimi, njalo bonke abantu bako-Israyeli bakhala befuna uJehova. 3USamuyeli wasesithi kuyo yonke indlu ka-Israyeli, “Uma libuyela kuJehova ngezinhliziyo zenu zonke zehlukaniseni labonkulunkulu bezizweni labo-Ashithorethi lizinikele kuJehova njalo likhonze yena kuphela, uzalikhulula esandleni samaFilisti.” 4Ngakho abako-Israyeli babalahla oBhali babo labo-Ashithorethi, bakhonza uJehova kuphela. 5USamuyeli wasesithi, “Buthanisani u-Israyeli wonke eMizipha mina ngizalikhulumela kuJehova.” 6Kwathi sebebuthene eMizipha, bakha amanzi bawathela phambi kukaJehova. Ngalolosuku bazila njalo bavuma izono zabo khonapho besithi, “Sonile.” Njalo uSamuyeli wahlulela abantu bako-Israyeli eMizipha. 7Kwathi amaFilisti esizwa ukuthi u-Israyeli wayebuthene eMizipha, ababusi bamaFilisti baya khona ukuyabahlasela. Kwathi abako-Israyeli bekuzwa, besaba ngenxa yamaFilisti. 8Bathi kuSamuyeli, “Ungayekeli ukusikhalela kuJehova uNkulunkulu wethu, ukuba asihlenge esandleni samaFilisti.” 9USamuyeli wathatha izinyane lemvu elimunyayo walinikela kuJehova njengomnikelo opheleleyo wokutshiswa. Wamkhulekela kuJehova u-Israyeli, uJehova wamphendula. 10Kwathi uSamuyeli enikela umnikelo wokutshiswa, amaFilisti asondela eduze ukuba alwe lo-Israyeli. Kodwa mhlalokho uJehova waduma ngomdumo omkhulu emelane lamaFilisti wawenza athuthumela kangangoba aze achithwachithwa phambi kwabako-Israyeli. 11Abantu bako-Israyeli bagijima bephuma eMizipha baxotshana lamaFilisti bewabulala endleleni baze bayafika endaweni engaphansi kweBhethi Khari. 12USamuyeli wasethatha ilitshe walimisa phakathi kweMizipha leSheni. Walibiza ngokuthi yi-Ebhenezeri, esithi, “Kuze kube khathesi uJehova usisizile.” 13Ngakho amaFilisti anqotshwa njalo kawazange ahlasele ilizwe lako-Israyeli futhi. Kuyo yonke impilo kaSamuyeli, isandla sikaJehova sasimelane lamaFilisti. 14Amadolobho kusukela e-Ekhroni kusiya eGathi ayethunjwe ngamaFilisti ku-Israyeli abuyiselwa kuye, njalo u-Israyeli wakhulula ilizwe eliseduze emandleni amaFilisti. Njalo kwaba lokuthula phakathi kuka-Israyeli lama-Amori. 15USamuyeli waqhubeka engumahluleli ka-Israyeli kuzo zonke izinsuku zokuphila kwakhe. 16Iminyaka ngeminyaka wayenquma esuka eBhetheli aye eGiligali leMizipha, esahlulela u-Israyeli kuzo zonke lezizindawo. 17Kodwa wayehlezi ebuyela eRama lapho okwakulomuzi wakhe khona, lakhona wahlulela u-Israyeli. Njalo wakhela uJehova i-alithare.
Copyright information for
NdeIBE