Gen 34 | NdeIBE | STEP | UDina, indodakazi kaLeya ayizalela uJakhobe wasuka wayakwethekelela abafazi balelolizwe.

‏ Genesis 34

UDina lamaShekemu

1 UDina, indodakazi kaLeya ayizalela uJakhobe wasuka wayakwethekelela abafazi balelolizwe. 2 Kwathi uShekemu, indodana kaHamori umHivi, umbusi walowommango, ebona uDina, wamthatha wenza ubudlova kuye. 3 Inhliziyo yakhe yathatheka ngoDina indodakazi kaJakhobe, wayithanda intombi le, wakhuluma layo kamnandi. 4 UShekemu wathi kuyise uHamori, “Ngizuzela intombi le ibe ngumkami.”

5 UJakhobe wathi ekuzwa ukuthi indodakazi yakhe uDina yayingcolisiwe, amadodana akhe ayesegangeni lezifuyo; wathula nje aze abuya ekhaya. 6 Yikho usekaShekemu, uHamori wayakhuluma loJakhobe.

7 Ngalesosikhathi amadodana kaJakhobe ayesebuyile evela egangeni evele esezwile okwasekwenzakele. Babelosizi njalo begcwele ulaka ngoba uShekemu wayenze into elihlazo ko-Israyeli ngokuhlobonga indodakazi kaJakhobe – into okwakungamelanga yenziwe.

8 Kodwa uHamori wathi kubo, “Indodana yami uShekemu uyayithanda indodakazi yakho. Muphe yona ibe ngumkakhe. 9 Kasendiselane; sipheni amadodakazi enu, lani lizithathele amadodakazi ethu. 10 Lingazihlalela phakathi kwethu; ilizwe livulekile kini. Hlalani kulo, thengisani kulo njalo fuyani kulo.”

11 UShekemu wasesithi kuyise kaDina lakubanewabo, “Ngicela ukuthi lingamukele, ngizalinika loba kuyini elikufunayo. 12 Tshonini amalobolo lokangaziwe, mina ngizakuletha ngobunengi bakho njengokufuna kwenu, njalo ngizakubhadala loba ngokunganani elikubizayo. Lina ngiphani intombi kuphela nje ibe ngumkami.”

13 Kwathi ngoba udadewabo uDina wayesengcolisiwe, amadodana kaJakhobe aphendula ngobuqili ekhuluma loShekemu loyise uHamori. 14 Athi kubo, “Singeke siyenze into enjalo; ngeke siphe udadewethu indoda engasokanga. Lokho kungaba lihlazo kithi.

15 Sizavuma kuphela nxa lenze lokhu: ukuthi libe njengathi ngokusoka bonke abesilisa benu.

16 Yikho singalendisela amadodakazi ethu lathi sithathe amadodakazi enu. Sizakwakha phakathi kwenu sibe ngabantu banye lani.

17 Kodwa uma lingavumi ukusokwa sizamthatha udadewethu sihambe.”

18 Icebo labo lakhanya lilihle kuHamori loShekemu. 19 Ijaha leli eliyilo elalihlonitshwa kakhulu emzini kayise, kalisachithanga isikhathi ukukwenza lokho ababekutshilo ngokuba lalitshiseka ngendodakazi kaJakhobe.

20 Yikho uHamori lendodana yakhe uShekemu baya entubeni yedolobho bayabonisana lamadoda akibo awedolobho. 21 Bathi, “Amadoda la alomusa kithi. Kabahlale elizweni lethu bathengiselane labantu; ilizwe leli lilendawo enengi abangahlala kuyo. Singathatha amadodakazi abo labo bangathatha awethu. 22 Kodwa bangavuma ukuhlala phakathi kwethu kuphela nxa abesilisa bethu bengasokwa njengabo. 23 Kambe izifuyo zabo, lempahla yabo kanye layo yonke imfuyo yabo kakukuba ngokwethu na? Yikho kasivumeni, yikhona bezakwakha phakathi kwethu.”

24 Wonke amadoda ayekhona entubeni yedolobho avumelana loHamori lendodana yakhe uShekemu, kwathi bonke abesilisa balelodolobho basokwa.

25 Ngemva kwezinsuku ezintathu, bonke belokhu besebuhlungwini, amadodana kaJakhobe amabili, uSimeyoni lo-Levi, abanewabo bakaDina, bathatha izinkemba zabo balihlasela idolobho belibele, babulala bonke abesilisa. 26 OHamori lendodana yakhe uShekemu babajuqa ngenkemba bamkhupha uDina endlini kaShekemu bahamba.

27 Amadodana kaJakhobe afikela phezu kwezidumbu aliphanga idolobho lapho udadewabo wayengcoliswe khona. 28 Athumba imihlambi yabo yezimvu lezinkomo, labobabhemi lakho konke okwakungokwabo phakathi edolobheni langaphandle egangeni.

29 Bayiqukula yonke inotho yabo kanye labafazi labantwana, bathumba konke okwakusezindlini kwaba yimpango.

30 UJakhobe wasesithi kuSimeyoni lo-Levi, “Selingehlisele uhlupho langenza nganuka kumaKhenani lamaPherizi, abantu abahlala elizweni leli. Thina sibalutshwana, bangahlangana bangihlasele, mina lomuzi wami sizabhujiswa.”

31 Kodwa bona baphendula bathi, “Bekufanele yini ukuthi aphathe udadewethu njengesifebe na?”