Isa 31 | NdeIBE | STEP | Maye kulabo abaya eGibhithe ukuyafuna usizo, abathemba amabhiza, abathembe ubunengi bezinqola zabo zempi lamandla amakhulu abagadi bamabhiza bakibo, kodwa bengathembeli koNgcwele ka-Israyeli, kumbe bacele usizo kuJehova.

‏ Isaiah 31

Maye Kulabo Abathemba IGibhithe

1 Maye kulabo abaya eGibhithe ukuyafuna usizo, abathemba amabhiza, abathembe ubunengi bezinqola zabo zempi lamandla amakhulu abagadi bamabhiza bakibo, kodwa bengathembeli koNgcwele ka-Israyeli, kumbe bacele usizo kuJehova.

2 Ikanti laye uhlakaniphile njalo angaletha incithakalo; ilizwi lakhe kalibuyeli emuva. Uzavukela abendlu yababi lalabo abasiza abenza okubi.

3 Kodwa amaGibhithe ngabantu kabasuNkulunkulu; amabhiza awo yinyama kawasumoya. Lapho uJehova eselula isandla sakhe, lowo osizayo uzakhubeka, lowo osizwayo uzakuwa, bobabili bazabhubha.

4 Lokhu yikho okutshiwo nguJehova kimi, ukuthi: “Njengesilwane sihwabha; isilwane esikhulu sibhongela esikubambileyo, lanxa ixuku lonke labelusi libizwa ukuba lisihlasele, kasethuswa yikuklabalala kwabo kumbe sithikanyezwe ngumsindo wabo – unjalo-ke uJehova uSomandla uzakwehla ukuba alwe entabeni iZiyoni laseziqongweni zayo.

5 Njengezinyoni zitshaya amaphiko emoyeni phezu kwamakhanda, uJehova uSomandla uzavikela iJerusalema, uzalivikela alikhulule. Uzadlula ngaphezu kwalo alihlenge.”

6 Awu bantu bako-Israyeli, buyelani kulowo elamhlamukela kakubi. 7 Ngoba ngalolosuku lonke lizazilahla izithombe zenu zesiliva lezegolide elizenze ngezandla zenu ezonayo.

8 “I-Asiriya izachithwa ngenkemba engasiyo yabantu, inkemba engasiyo yabantu izababhubhisa. Bazayibalekela inkemba, izinsizwa zabo zizakwenziwa izigqili.

9 Inqaba yabo izadilika ngenxa yokwesaba; ekuboneni uphawu lwempi izinduna zabo zempi zizatshaywa luvalo,” kutsho uJehova omlilo wakhe useZiyoni, osithando sakhe siseJerusalema.