Isa 35 | NdeIBE | STEP | Inkangala lelizwe elomileyo kuzatho-koza; inkangala izajabula iqhakaze. Njengeluba

‏ Isaiah 35

Intokozo Yabahlengiweyo

1 Inkangala lelizwe elomileyo kuzatho-koza; inkangala izajabula iqhakaze. Njengeluba

2 izakhahlela, ithokoze kakhulu, ihlabele isithi: Inkazimulo yaseLebhanoni izanikezwa kuyo ubuhle beKhameli leSharoni, kuzabona inkazimulo kaJehova lobukhosi bukaNkulunkulu wethu.

3 Qinisani izandla ezibuthakathaka, liqinise lamadolo axegayo;

4 tshonini kulabo abalezinhliziyo ezilokwesaba lithi: “Qinani, lingesabi; uNkulunkulu wenu uzakuza, uzakuza ukuba alikhulule.”

5 Lapho-ke amehlo eziphofu azavuleka, lezindlebe zezacuthe zivuleke.

6 Lapho-ke abaqhulayo bazakweqa njengempala, izimungulu zihlabele ngokuthokoza. Amanzi azampompoza ogwaduleni, izifula zigeleze enkangala.

7 Itshebetshebe elitshisayo lizakuba yisiziba, umhlabathi owomileyo ube yimithombo echaphaka amanzi. Ezindaweni amakhanka ake ahlala kuzo, utshani lemihlanga lebhuma kuzakhula khona.

8 Njalo kuzakuba lomgwaqo omkhulu: uzathiwa yiNdlela yobuNgcwele. Abangcolileyo kabayikuhamba kuwo; uzakuba ngowalabo abahamba kuleyoNdlela lezithutha ezonayo kaziyikuhambahamba kuwo.

9 Akuyikuba lesilwane khona. loba esinye isilo esilolaka sivuke kuwo; kaziyikutholwa khona, Kodwa abakhululiweyo yibo kuphela abazahamba lapho,

10 labahlengiweyo bakaJehova bazabuyela. Bazangena eZiyoni behlabela; intokozo engapheliyo izakuba ngumqhele emakhanda abo. Bazakuba lokuthula lenjabulo, usizi lokububula kuzaphela.