Isa 36 | NdeIBE | STEP | Ngomnyaka wetshumi lane wokubusa kwenkosi uHezekhiya, uSenakheribi inkosi yase-Asiriya wahlasela wonke amadolobho avikelweyo akoJuda wawathumba.

‏ Isaiah 36

USenakheribi Usongela iJerusalema

1 Ngomnyaka wetshumi lane wokubusa kwenkosi uHezekhiya, uSenakheribi inkosi yase-Asiriya wahlasela wonke amadolobho avikelweyo akoJuda wawathumba.

2 Emva kwalokho inkosi yase-Asiriya yathuma umlawuli wayo lebutho elikhulu lisuka eLakhishi lisiya enkosini u-Hezekhiya eJerusalema. Kwathi umlawuli webutho esemi emgelweni weSiziba Esingaphezulu, emgwaqweni oya eNsimini yoMgezisi, 3 u-Eliyakhimu indodana kaHilikhiya umgcini wesigodlo, loShebhina umabhalane kanye loJowa indodana ka-Asafi umbhali, baya kuye.

4 Umlawuli webutho wathi kubo, “Tshelani uHezekhiya lithi, “ ‘Nanku okutshiwo yinkosi enkulu, inkosi yase-Asiriya ukuthi: Isibindi sakho lesi usithatha ngaphi na? 5 Uthi ulamaqhinga lamandla ebutho – kodwa ukhuluma amazwi ayize. Uthembe bani uze ungihlamukele nje?

6 Khangela, uthembe iGibhithe, umhlanga ovavukileyo wodondolo lowana ohlaba isandla somuntu umlimaze uma eweyamile. Unjalo uFaro inkosi yaseGibhithe kubo bonke abathembe yena. 7 Njalo uma lisithi kimi, “Thina sithembe uJehova uNkulunkulu wethu” – kasuye yini uHezekhiya asusa izindawo zakhe eziphakemeyo lama-alithare akhe, esithi kwabakoJuda leJerusalema, “Kumele likhonzele phambi kwaleli i-alithare”?

8 “ ‘Khathesi-ke wozani lenze isivumewano lenkosi yami, inkosi yase-Asiriya: Ngizalinika amabhiza ayizinkulungwane ezimbili uma bekhona abazawagada! 9 Pho ungayehlula kanjani induna eyodwa yezikhulu ezincane zenkosi yami, lanxa uthembe iGibhithe ekutholeni izinqola zempi labagadi bamabhiza na? 10 Phezu kwalokho, kanti ngizehlasela lokuzochitha ilizwe leli kungatshongo uJehova na? UJehova uqobo nguye othe ngizohlasela ilizwe leli ngilichithe.’ ”

11 Lapho-ke u-Eliyakhimu loShebhina loJowa bathi kumlawuli webutho, “Ake ukhulume ezincekwini zakho ngesi-Aramayikhi ngoba siyasizwa. Ungasikhulumisi ngesiHebheru labantu abasemdulini besizwa.”

12 Kodwa umlawuli webutho wathi kubo, “Inkosi yami ingithume ukuba izinto lezi ngizitsho kuphela enkosini yenu lakini, hatshi ebantwini abahlezi emdulini – okuzakuthi labo, njengani badle ubulongwe babo banathe lomchamo wabo na?”

13 Umlawuli webutho wasukuma wasememeza ngesiHebheru esithi, “Zwanini amazwi enkosi enkulu, inkosi yase-Asiriya!

14 Lokhu yikho okutshiwo yinkosi ukuthi: Lingamvumeli uHezekhiya ukuba alikhohlise. Angeke alikhulule. 15 Lingamvumeli uHezekhiya elincenga ukuba lithembe uJehova esithi ‘Ngempela uJehova uzasikhulula; idolobho leli kaliyikuphiwa inkosi yase-Asiriya.’

16 “Lingamlaleli uHezekhiya. Okutshiwo yinkosi yase-Asiriya yilokhu ukuthi: Yenza isivumelwano sokuthula lami, uphume uze kimi. Lapho-ke wonke owakini uzakudla esivinini sakhe lasemkhiweni wakhe anathe lamanzi emthonjeni wakhe, 17 ngize ngibuye ukuzalithatha ngilisa elizweni elinjengelenu – ilizwe elilamabele lewayini elitsha, ilizwe elilokudla lezivini.

18 “Lingavumi ukuba uHezekhiya alikhohlise esithi, ‘UJehova uzasikhulula.’ Kulonkulunkulu wesinye isizwe osewake wakhulula ilizwe lakhe esandleni senkosi yase-Asiriya na? 19 Bangaphi onkulunkulu baseHamathi le-Aphadi na? Bangaphi onkulunkulu baseSefavayimi na? Bayihlenga iSamariya esandleni sami na?

20 Nguwuphi kubonkulunkulu bonke bamazwe la oke wanelisa ukukhulula ilizwe lakhe kimi na? Pho uJehova angalikhulula njani iJerusalema esandleni sami na?”

21 Kodwa abantu bathula kabaze batsho lutho ngoba inkosi yayibalaye yathi, “Lingamphenduli.”

22 U-Eliyakhimu indodana kaHilikhiya umgcini wesigodlo loShebhina umabhalane loJowa indodana ka-Asafi umbhali, baya kuHezekhiya izigqoko zabo zidatshuliwe bamtshela okwakutshiwo ngumlawuli webutho.