Isa 38 | NdeIBE | STEP | Ngalezozinsuku uHezekhiya wagula eselengela ekufeni. Umphrofethi u-Isaya, indodana ka-Amozi waya kuye wathi, “UJehova uthi: Lungisa indlu yakho ngoba uzakufa, awusayikusila.”

‏ Isaiah 38

Ukugula KukaHezekhiya

1 Ngalezozinsuku uHezekhiya wagula eselengela ekufeni. Umphrofethi u-Isaya, indodana ka-Amozi waya kuye wathi, “UJehova uthi: Lungisa indlu yakho ngoba uzakufa, awusayikusila.”

2 UHezekhiya waphendula ubuso bakhe wakhangela emdulini wasekhuleka kuJehova esithi, 3 “Khumbula O Jehova, ukuthi ngihambe phambi kwakho ngokuthembeka langokuzinikela ngenhliziyo yami yonke, njalo ngenze okuhle kuwe.” UHezekhiya wakhala kabuhlungu.

4 Emva kwalokho kwafika ilizwi likaJehova ku-Isaya lisithi: 5 “Yana kuHezekhiya uthi kuye, ‘Nanku okutshiwo nguJehova uNkulunkulu kayihlo uDavida, ukuthi: Ngiwuzwile umkhuleko wakho, ngazibona lezinyembezi zakho. Ngizakwengezelela iminyaka elitshumi lanhlanu ekuphileni kwakho. 6 Njalo ngizakukhulula wena, kanye ledolobho leli ezandleni zenkosi yase-Asiriya. Idolobho leli ngizalivikela.

7 “ ‘Lesi yisibonakaliso sikaJehova kuwe sokuthi uJehova uzakwenza njengokuthembisa kwakhe: 8 Ngizakwenza umthunzi obangelwe lilanga ubuyele emuva amanyathelo alitshumi umthunzi owehle ngawo emakhwelelweni ka-Ahazi.’ ” Ngakho ukukhanya kwelanga kwabuyela emuva ngamanyathela alitshumi elaselikhothame ngawo.

9 La ngamazwi alotshwa nguHezekhiya inkosi yakoJuda emva kokuba esesilile ekuguleni kwakhe:

10 Ngathi, “Ebuhleni bokuphila kwami kumele ngedlule emasangweni okufa ngamukwe iminyaka yami esaseleyo na?”

11 Ngathi, “Angiyikumbona futhi uJehova, uJehova, elizweni labaphilayo; angisayikubabona futhi abantu loba ngibe lalabo abahlala kulumhlaba.

12 Njengethente lomalusi indlu yami idiliziwe ngayithathelwa. Njengomaluki impilo yami ngiyigoqile, ungisusile esalukweni; emini lebusuku ungenze ngaphela.

13 Ngalinda ngokubekezela kwaze kwasa, kodwa amathambo ami uwephule wonke njengesilwane; emini lebusuku ungenze ngaphela.

14 Ngakhala njengenkonjane, ngabubula njengejuba elililayo. Amehlo ami afiphele ngokukhangela phezulu. Awu Jehova, ngikhathazekile, woza ungisize!”

15 Kodwa ngingathini na? Ukhulumile kimi, wena ngokwakho ukwenzile lokhu. Ngizahamba ngokuzithoba ekuphileni kwami konke ngenxa yobuhlungu bomoya wami.

16 Jehova, abantu baphila ngezinto ezinje; lomoya wami uthola ukuphila kuzo. Wangibuyisela empilweni wangenza ngaphila.

17 Ngeqiniso kwaba lusizo kimi ukuzwa ubuhlungu obungaka. Ngothando lwakho wangivikela emgodini wokutshabalaliswa; izono zami zonke uzibeke ngemuva kwakho.

18 Ngoba ingcwaba alingeke likubonge lokufa akungeke kukudumise; labo abangena emgodini abangeke bathemba ubuqotho bakho.

19 Abaphilayo, abaphilayo – bayadumisa njengalokhu engikwenzayo lamhla; oyise batshela abantwababo ngobuqotho bakho.

20 UJehova uzangisindisa; njalo sizahlabelela ngamachacho kuzo zonke izinsuku zokuphila kwethu ethempelini likaJehova.

21 U-Isaya wayethe, “Lungisa isigaqa semikhiwa usifake phezu kwethumba, uzasila.”

22 UHezekhiya wayebuzile wathi, “Kuyini okuzakuba yisibonakaliso sokuthi ngizakuya ethempelini likaJehova na?”