Isa 39 | NdeIBE | STEP | Ngalesosikhathi uMerodakhi-Bhaladani indodana kaBhaladani inkosi yaseBhabhiloni, wathumela izincwadi lesipho kuHezekhiya, ngoba wayezwile ngokugula kwakhe lokusila kwakhe.

‏ Isaiah 39

Izithunywa Ezivela EBhabhiloni

1 Ngalesosikhathi uMerodakhi-Bhaladani indodana kaBhaladani inkosi yaseBhabhiloni, wathumela izincwadi lesipho kuHezekhiya, ngoba wayezwile ngokugula kwakhe lokusila kwakhe.

2 UHezekhiya wazamukela ngokuthaba izithunywa wazitshengisa okwakusendlini yakhe yokugcinela izimpahla eziligugu – isiliva, igolide, iziyoliso, amafutha amahle, indlu yezikhali lakho konke okwakukhona enothweni yakhe. Akulalutho esigodlweni sakhe loba elizweni lakhe lonke ayelibusa uHezekhiya angazitshengisanga lona.

3 Emva kwalokho u-Isaya umphrofethi waya kuHezekhiya inkosi wathi kuye, “Abantu labana batheni, njalo bebevela ngaphi?” UHezekhiya waphendula wathi, “Bavela elizweni elikhatshana. Beze kimi bevela eBhabhiloni.”

4 Umphrofethi wabuza wathi, “Baboneni esigodlweni sakho?” UHezekhiya wathi, “Babone konke okusesigodlweni sami. Akulalutho phakathi kwezimpahla zami eziligugu engingabatshengisanga lona.”

5 UIsaya wasesithi kuHezekhiya, “Zwanake ilizwi likaJehova uSomandla elithi: 6 Isikhathi sizafika sibili lapho konke okusesigodlweni sakho lakho konke oyihlo abakugcinayo kusiyafika lolosuku, kuzathwalelwa eBhabhiloni. Akuyikusala lutho, kutsho uJehova. 7 Njalo abanye benzalo yakho, inyama yakho legazi lakho, abazazalwa nguwe, bazathunjwa babe ngabathenwa esigodlweni senkosi yaseBhabhiloni.”

8 UHezekhiya waphendula wathi, “Ilizwi likaJehova olikhulumileyo lilungile.” Ngoba wayecabange wathi, “Kuzakuba lokuthula lokuvikeleka ekuphileni kwami.”