Isa 40 | NdeIBE | STEP | Duduzani, duduzani, baduduzeni abantu bami, kutsho uNkulunkulu wenu.

‏ Isaiah 40

Induduzo Ebantwini BakaNkulunkulu

1 Duduzani, duduzani, baduduzeni abantu bami, kutsho uNkulunkulu wenu.

2 Khulumani ngomusa kulo iJerusalema, limemezele kulo ukuthi ukusebenza kwalo nzima sekuphelile, ukuthi isono salo sihlawulwe, ukuthi selamukele okuvela esandleni sikaJehova kuphindwe kabili kuzo zonke izono zalo.

3 Ilizwi lomemezayo lithi: “Lungisani indlela kaJehova enkangala, lenzele uNkulunkulu wethu umgwaqo oqondileyo ehlane.

4 Izigodi zonke zizaphakanyiswa, izintaba zonke lamaqaqa kuzakwehliselwa phansi. umhlabathi ongamakhilikithi uzakwendlaleka, izindawo ezimadundulu zizakuba yisigcawu.

5 Inkazimulo kaJehova izabonakaliswa, abantu bonke bazambona kanyekanye, ngoba umlomo kaJehova usukhulumile.”

6 Ilizwi lithi, “Memeza!” Mina ngathi, “Ngimemeze ngisithini na?” “Abantu bonke banjengotshani, bonke ubukhosi babo bunjengamaluba eganga.

7 Utshani buyabuna amaluba ayakhithika, ngoba umoya kaJehova uyakuphephetha. Ngempela abantu babutshani.

8 Utshani buyabuna, amaluba ayakhithika, kodwa ilizwi likaNkulunkulu limi kuze kube nininini.

9 Wena oletha izindaba ezinhle eZiyoni, khwela entabeni ende. Wena oletha izindaba ezinhle eJerusalema, phakamisa ilizwi lakho ngokuklabalala; liphakamise, ungesabi, yitsho emadolobheni akoJuda uthi: “Nangu uNkulunkulu wenu!”

10 Khangelani, uJehova uNkulunkulu uza elamandla, isandla sakhe sizabusa. Khangelani, umvuzo wakhe ulawo, Lenhlawulo yakhe uhamba elayo.

11 Welusa umhlambi wakhe njengomalusi: ubuthelela amawundlu ezingalweni zakhe awathwale eseduzane lenhliziyo yakhe; awakhokhele kuhle lawo alamazinyane.

12 Ngubani olinganise amanzi entendeni yesandla sakhe, loba walinganisa amazulu ngobubanzi besandla sakhe na? Ngubani owaphatha uthuli lomhlabathi ngesitsha loba walinganisa izintaba ezilinganisweni lamaqaqa esikalini na?

13 Ngubani osewazwisisa imicabango kaJehova, kumbe wamfundisa njengomeluleki wakhe na?

14 Ngubani owake wabuzwa nguJehova ukuba amqondise, njalo ngubani owamfundisa indlela elungileyo na? Ngubani lowo owamfundisa ukwazi, loba owamtshengisa indlela yokuqedisisa na?

15 Ngeqiniso izizwe zinjengethonsi emgqonyeni; zibalwa njengothuli ezilinganisweni uJehova ulinganisa izihlenge angathi ziluthuli olucolekileyo.

16 ILebhanoni kalaneli imililo ye-alithare, lezinyamazana zalo kazaneli iminikelo yokutshiswa.

17 Phambi kwakhe zonke izizwe zinjengeze; yena uzikhangela njengezingasilutho njalo zingaphansi kweze.

18 Pho ngubani elingamfanisa loNkulunkulu na? Yisifanekiso bani elingasilinganisa laye na?

19 Isithombe sibunjwa yingcwethi, umkhandi wegolide asinameke ngegolide asenzele imigaxo yesiliva.

20 Umuntu ongumyanga onganelisiyo ukunikela ngomnikelo onjalo ukhetha isigodo esingaboliyo. Udinga ingcitshi elolwazi ukuba imise isithombe esingayikubhidlika.

21 Kalazi yini? Kalizwanga na? Kalikutshelwanga kwasekuqaleni na? Kalizwisisanga na selokhu umhlaba wadalwayo?

22 UJehova uhlezi ebukhosini ngaphezu kwendingilizi yomhlaba, njalo abantu bakhe banjengezintethe. Welula amazulu njengekhetheni, awendlale njengethente lokuhlala kulo.

23 Udiliza amakhosana, enze ababusi bomhlaba lo babe yize.

24 Banela ukugxunyekwa nje, banele ukuhlanyelwa nje, banele ukugxila impande emhlabathini abe ephephetha phezu kwabo, babune, isivunguzane sibakhukhulele khatshana njengamakhoba.

25 “Ngubani elizangilinganisa laye na? Loba ngubani olingana lami na?” kutsho yena oNgcwele.

26 Phakamisani amehlo enu likhangele phezulu. Ngubani owadala konke lokhu na? Yena okhupha amaxuku ezinkanyezi ngalinye ngalinye, awabize ngalinye ngamabizo awo. Ngenxa yamandla akhe amakhulu lokuqina okulamandla akukho lalinye elingekho.

27 Kungani usithi, we Jakhobe, usole usithi, we Israyeli, “Indlela yami ifihlakele kuJehova; ilungelo lami kalinanzwa nguNkulunkulu wami na?”

28 Kalazi yini? Kalizwanga na? UJehova unguNkulunkulu waphakade, UMdali wemikhawulo yomhlaba. Kayikudinwa kumbe akhathale, ukuqedisisa kwakhe kakho ongakulinganisa.

29 Abakhatheleyo uyabanika amandla, andise amandla ababuthakathaka.

30 Labatsha baphelelwa ngamandla bakhathale, lamajaha ayakhubeka awe,

31 kodwa labo abathemba uJehova bazawavuselela amandla abo. Bazaqonga ngezimpiko njengezinkozi, bazagijima kodwa bangadinwa, bazahamba kodwa bangapheli amandla.