Isa 43 | NdeIBE | STEP | Kodwa khathesi, nanku akutshoyo uJehova uthi – yena owakudalayo, wena Jakhobe, yena owakubumbayo, wena Israyeli: “Ungesabi, ngoba ngikuhlengile; ngikubize ngebizo lakho; ungowami.

‏ Isaiah 43

UMsindisi Yedwa ka-Israyeli

1 Kodwa khathesi, nanku akutshoyo uJehova uthi – yena owakudalayo, wena Jakhobe, yena owakubumbayo, wena Israyeli: “Ungesabi, ngoba ngikuhlengile; ngikubize ngebizo lakho; ungowami.

2 Lapho udabula phakathi kwamanzi ngizakuba lawe; lalapho udabula emifuleni, kayiyikukukhukhula. Lapho uhamba phakathi komlilo, kawuyikutsha; amalangabi kawayikukubhebhisa.

3 Ngoba mina nginguJehova uNkulunkulu wakho, oNgcwele ka-Israyeli, uMsindisi wakho. Ngizanikela iGibhithe njengenhlawulo yakho, iKhushi leSebha ime esikhundleni sakho.

4 Njengoba wena uligugu njalo udumile ebusweni bami, futhi ngenxa yokuthi ngiyakuthanda, ngizanikela abantu esikhundleni sakho, labantu esikhundleni sempilo yakho.

5 Ungesabi, ngoba ngilawe; ngizakulethela inzalo yakho ivela empumalanga ngikubuthe kusukela entshonalanga.

6 Ngizakutsho kuyo inyakatho ngithi, ‘Bakhulule!’ Ngitsho kuyo iningizimu ngithi, ‘Ungabagodli.’ Buyisani amadodana ami akude lamadodakazi ami asemikhawulweni yomhlaba –

7 wonke umuntu obizwa ngebizo lami, engamdalela udumo lwami, engambumbayo, ngamenza.”

8 Phumani lalabo abayiziphofu amehlo belawo, abayizacuthe izindlebe belazo.

9 Izizwe zonke kaziqoqane ndawonye labantu babuthane. Nguwuphi wabo owaphrofetha lokhu wamemezela kithi ngezinto zendulo? Kabalethe ofakazi babo babonakalise ukuthi baqinisile, ukuze abanye bezwe, batsho bathi, “Kuqotho.”

10 “Lina lingofakazi bami,” kutsho uJehova, “lenceku yami engiyikhethileyo, ukuze lazi, likholwe kimi, njalo lizwisise ukuthi mina nginguye. Ngaphambi kwami kakho unkulunkulu owake waba khona, njalo kakho ozakuba khona emva kwami.

11 Mina, mina uqobo, nginguJehova, ngaphandle kwami kakho omunye umsindisi.

12 Ngivezile ngasindisa, ngamemezela mina ngokwami, hatshi unkulunkulu wezizweni ophakathi kwenu. Lingofakazi bami,” kutsho uJehova, “ekuthini mina yimi uNkulunkulu.

13 Ye, kusukela ezinsukwini zasendulo nginguye. Kakho ongakhulula esandleni sami. Lapho ngisenza, ngubani ongakuguqula na?”

Umusa KaNkulunkulu Lokungathembeki kuka-Israyeli

14 UJehova, uMhlengi wenu, oNgcwele ka-Israyeli, uthi, “Ngenxa yenu ngizathumela impi eBhabhiloni ilethe bonke abaseBhabhiloni, njengeziphepheli ngemikhumbi ababezigqaja ngayo.

15 Mina nginguJehova, oNgcwele wenu, uMdali ka-Israyeli, uJehova wenu.”

16 Nanku akutshoyo uJehova – yena owenza indlela olwandle lomkhondo emanzini alamandla,

17 yena owakhupha izinqola zempi lamabhiza, ibutho, lamanye awokuliqinisa endawonye; njalo lalala lapho, kalaze lavuka futhi; licitshe, liqunywe njengentambo yesibane:

18 “Khohlwani izinto zamandulo, linganakani ngosekwedlulayo.

19 Khangelani, ngenza okutsha! Khathesi kuyavela ngokuphangisa; kalikuboni na? Ngenza indlela enkangala lezifula ogwaduleni.

20 Izinyamazana zeganga ziyangidumisa; amakhanka lezikhova, ngoba ngenza kube lamanzi enkangala lezifula ogwaduleni ukuze nginathise abantu abakhethiweyo,

21 abantu engazenzela bona ukuba bangidumise.

22 “Kodwa kawukhalazanga kimi wena Jakhobe, kodwa ukhathele ngami wena Israyeli.

23 Kawungilethelanga izimvu zomnikelo wokutshiswa, kumbe wangidumisa ngemihlatshelo yakho. Angikuhluphanga ngeminikelo yamabele kumbe ngakudinisa ngokufuna impepha.

24 Kawungithengelanga amakha anuka mnandi, kumbe wangisuthisa ngamahwahwa emihlatshelo yakho. Kodwa ungikhathazile ngezono zakho Wangidinisa ngezinengiso zakho.

25 “Mina, mina uqobo, nginguye owesula iziphambeko zakho ngenxa yami, ngingabe ngisazikhumbula futhi izono zakho.

26 Ngikhangelela isikhathi esedlulayo, kasiphikisane ngaleyondaba.

27 Ukhokho wakho wokuqala wona; labakhulumeli bakho bangihlamukela.

28 Ngakho izikhulu zethempelini lakho ngizaziyangisa; nginikele uJakhobe ekubhujisweni lo-Israyeli ekweyisweni.