Isa 45 | NdeIBE | STEP | “Nanku akutshoyo uJehova kogcotshiweyo wakhe, uKhurosi, engibamba isandla sakhe sokudla ukuba nginqobe izizwe eziphambi kwakhe, ngithathele amakhosi izihlangu zawo, ngivule iminyango phambi kwakhe ukuze amasango angavaleki:

‏ Isaiah 45

1 “Nanku akutshoyo uJehova kogcotshiweyo wakhe, uKhurosi, engibamba isandla sakhe sokudla ukuba nginqobe izizwe eziphambi kwakhe, ngithathele amakhosi izihlangu zawo, ngivule iminyango phambi kwakhe ukuze amasango angavaleki:

2 Ngizahamba phambi kwakho ngenze izintaba zendlaleke. Ngizadiliza amasango ethusi, ngifohle emigoqweni yensimbi.

3 Ngizakupha inotho yobumnyama, lenotho egcinwe ezindaweni ezifihlakeleyo ukuze wazi ukuthi mina nginguJehova, uNkulunkulu ka-Israyeli, okubiza ngebizo.

4 Ngenxa kaJakhobe inceku yami, lo-Israyeli okhethiweyo wami, ngikubiza ngebizo ngikunike ibizo lokuhlonipha, lanxa wena unganginakanga.

5 Mina nginguJehova, njalo kakho omunye; ngaphandle kwami akulankulunkulu. Ngizakuqinisa, lanxa wena unganginakanga,

6 ukuze kuthi kusukela empumalanga kusiya entshonalanga, abantu bakwazi ukuthi kakho omunye ngaphandle kwami. Mina nginguJehova, njalo kakho omunye.

7 Ngenza ukukhanya njalo ngidale umnyama, ngiletha ukuphumelela njalo ngidale incithakalo; mina, uJehova ngiyazenza zonke lezizinto.

8 “Lina mazulu angaphezulu, nisani ukulunga; amayezi kawakuthululele phansi. Umhlaba kawuvuleke kabanzi kuhlume ukusindiswa, ukulunga akukhule lakho; mina, uJehova, ngikudalile.

9 “Maye kulowo ophikisa uMdali wakhe, kulowo oludengezi nje phakathi kwezindengezi emhlabathini. Ibumba liyatsho na kumbumbi lithi, ‘Kuyini okubumbayo?’ Umsebenzi wakho uyatsho na uthi, ‘Kalazandla?’

10 Maye kulowo othi kuyise. ‘Kuyini owakuzalayo?’ loba athi kunina, ‘Kuyini owakubelethayo?’

11 Nanku okutshiwo nguJehova – oNgcwele ka-Israyeli, loMdali wakhe uthi: Mayelana lezinto ezizayo, uyangibuza ngabatwabami na, loba uyangilawula emsebenzini engiwenzayo na?

12 Yimi engadala umhlaba, ngenza labantu abahlala kuwo. Ezami izandla yizo ezananabula amazulu; ngahlela amaxuku ezinkanyezi zawo.

13 Ngizamvusa uKhurosi ngokulunga kwami, ngenze izindlela zakhe zonke ziqonde. Uzalakha futhi idolobho lami, akhulule abami abaxotshwayo elizweni, kodwa kungekho nhlawulo kumbe umvuzo, kutsho uJehova uSomandla.”

14 Nanku akutshoyo uJehova: “Izithelo zaseGibhithe lempahla ethengiswayo yaseKhushi lamaSebhiyana lawana amade – bazakuza kuwe babe ngabakho, bazakhasabula ngemuva kwakho beze kuwe bebotshwe ngamaketane. Bazakukhothamela bakuncenge besithi, ‘Ngoqotho uNkulunkulu ulawe, kakho omunye, kakho omunye unkulunkulu.’ ”

15 Ngeqiniso unguNkulunkulu ozifihlayo, Awu Nkulunkulu loMsindisi ka-Israyeli.

16 Bonke abenza izithombe bazayangiswa badumazeke; bonke bazahamba beyangekile.

17 Kodwa u-Israyeli uzasindiswa nguJehova ngensindiso engapheliyo; kaliyikuyangiswa kumbe libe lehlazo kuze kube nininini.

18 Ngoba nanku okutshiwo nguJehova yena owadala amazulu, unguNkulunkulu, yena owabumba umhlaba wawenza, wawusekela; kawudalanga ukuba ungabi lalutho, kodwa wawenza ukuba kuhlalwe kuwo, uthi: “Mina nginguJehova, kakho omunye.

19 Angikhulumanga ensitha kwenye indawo elizweni lomnyama; angizange ngithi kuzizukulwane zikaJakhobe, ‘Ngidingani lingangitholi.’ Mina uJehova ngikhuluma iqiniso; ngitsho okuqotho.

20 “Qoqanani ndawonye lize kimi; buthanani lina elabaleka emazweni, labo abahamba bethwele izithombe zezigodo kabazi lutho; labo abakhuleka kubonkulunkulu abangeke babasize.

21 Memezelani okufanele kube yikho, likubike – kabemukele izeluleko ndawonye. Ngubani owabika lokhu endulo, ngubani owamemezela ngakho kudala le? Kwakungayisimi mina uJehova na? Njalo kakho uNkulunkulu ngaphandle kwami, uNkulunkulu olungileyo onguMsindisi; kakho omunye, yimi kuphela.

22 “Phendukelani kimi lisindiswe, lonke lina mikhawulo yomhlaba; Ngoba mina nginguNkulunkulu, njalo kakho omunye.

23 Ngifunge ngami, ngobuqotho bonke umlomo wami ukhulume ilizwi elingayikwesulwa. Amadolo wonke azaguqa phambi kwami; izindimi zonke zizafunga ngami.

24 Zizakutsho ngami zithi, ‘Ukulunga lamandla kukuJehova kuphela.’ ” Bonke abamthukuthelelayo bazakuza kuye bayangiswe.

25 Kodwa kuJehova yonke inzalo ka-Israyeli izafunyanwa ilungile, ithokoze.