Isa 48 | NdeIBE | STEP | “Zwana lokhu, wena ndlu kaJakhobe, lina elibizwa ngebizo lika-Israyeli elingabosendo lukaJuda, lina elifunga ngoJehova, licele usizo kuNkulunkulu ka-Israyeli

‏ Isaiah 48

U-Israyeli Oyisiqholo

1 “Zwana lokhu, wena ndlu kaJakhobe, lina elibizwa ngebizo lika-Israyeli elingabosendo lukaJuda, lina elifunga ngoJehova, licele usizo kuNkulunkulu ka-Israyeli – kodwa kungasingeqiniso loba ngokulunga –

2 lina elibizwa ngokuthi lingabasedolobheni elingcwele, lethembe uNkulunkulu ka-Israyeli – uJehova uSomandla yilo ibizo lakhe:

3 Ngamemezela ngezinto zakuqala endulo, ngazitsho ngomlomo wami, ngazenza zezwakala. Ngazenza ngokuphangisa, zahle zenzakala.

4 Ngoba ngangikwazi ukuthi ulenkani, imisipha yentamo yakho zinsimbi, ibunzi lakho lithusi.

5 Ngakho-ke ngakutsho kudala ngalezizinto ngakwazisa ngazo zingakenzakali ukuze wena ungaze wathi, ‘Izithombe zami yizo ezazenzayo; izifanekiso zami zezigodo lonkulunkulu wensimbi yibo abakumisayo.’

6 Usuzizwile lezizinto; zikhangele zonke. Awuyikuzivuma na? “Kusukela khathesi ngizakutshela ngezinto ezintsha, izinto ezifihlakeleyo wena ongazaziyo.

7 Zidalwe khathesi nje, hatshi endulo; awukaze uzwe ngazo kungakabi lamhla. Ngakho awungeke uthi, ‘Yebo, kade ngizazi.’

8 Kawuzange uzwe kumbe uqedisise; kusukela endulo indlebe yakho ibingavulekanga. Ngikwazi kuhle ukuthi wena uyingozi; kwathiwa ungumhlamuki kusukela ekuzalweni kwakho.

9 Ngenxa yebizo lami, ngiyaluphuzisa ulaka lwami; ngenxa yodumo lwami ngiyalubamba ukuba lungehleli kuwe, ukuze ngingakubhubhisi.

10 Khangela, ngikulungisile lanxa kungenjengesiliva; ngikuhlole emlilweni wokuhlupheka.

11 Ngenxa yami, ngenxa yami, ngenza lokhu. Ngingavuma njani ukuba ibizo lami ligconwe na? Angiyikunika omunye udumo lwami.

U-Israyeli Ukhululwe

12 “Ngilalela wena Jakhobe, Israyeli, engikubizileyo: Mina nginguye; Ngingowokuqala njalo ngingowokucina.

13 Isandla sami sabeka izisekelo zomhlaba, isandla sami sokudla sendlala amazulu; lapho ngikubiza, kuyasukuma konke kanyekanye.

14 “Buthanani ndawonye lonke lilalele: Yisiphi sezithombe esamemezela ngalezizinto ngaphambili na? Umsekeli kaJehova okhethiweyo uzafeza inhloso yakhe yokuhlasela amaBhabhiloni; ingalo yakhe izamelana lamaBhabhiloni.

15 Mina, mina ngokwami, ngikhulumile; yebo ngimbizile. Ngizamletha, njalo uzaphumelela kuyo inhloso yakhe.

16 “Sondelani kimi lizwe lokhu: “Kusukela esimemezelweni sakuqala angikhulumelanga ensitha; lapho kusenzakala, mina ngikhona.” Khathesi uJehova uSomandla ungithumile ngoMoya wakhe.

17 Nanku uJehova akutshoyo, uMhlengi wakho, oNgcwele ka-Israyeli: “Mina nginguJehova, uNkulunkulu wakho, okufundisa lokho okuhle kakhulu kuwe, ekutshengisa indlela okumele uhambe ngayo.

18 Aluba wawulalele imilayo yami nje, ukuthula kwakho kwakuzakuba njengomfula, ukulunga kwakho kunjengamagagasi olwandle.

19 Inzalo yakho yayizakuba ngangetshebetshebe, abantwabakho babe ngangezinhlamvu zalo ezingeke zibalwe; ibizo labo belingayikwesulwa kumbe lidilizwe phambi kwami.”

20 Sukani eBhabhiloni, libalekele amaBhabhiloni! Bikani lokhu lihlaba umkhosi ngentokozo njalo likumemezele, likufikise emikhawulweni yomhlaba. Tshonini lithi, “UJehova uyihlengile inceku yakhe uJakhobe.

21 Kabomanga ekubaholeni kwakhe bedabula ezinkangala; wabenzela amanzi agelezayo ephuma edwaleni, wadabula idwala amanzi ampompoza.

22 UJehova uthi, “Akukho ukuthula kwababi.”