Isa 49 | NdeIBE | STEP | Ngilalelani lina zihlenge; zwanini lokhu lina zizwe ezikude. UJehova wangibiza ngingakazalwa; kusukela ekuzalweni kwami ubelitsho ibizo lami.

‏ Isaiah 49

Inceku KaJehova

1 Ngilalelani lina zihlenge; zwanini lokhu lina zizwe ezikude. UJehova wangibiza ngingakazalwa; kusukela ekuzalweni kwami ubelitsho ibizo lami.

2 Wenza umlomo wami waba njengenkemba eloliweyo, wangifihla emthunzini wesandla sakhe. Wangenza ngaba ngumtshoko ololiweyo, wangifihla emxhakeni wakhe wemitshoko.

3 Wathi kimi, “Wena Israyeli uyinceku yami engizabonakalisa inkazimulo yami ngayo.”

4 Kodwa mina ngathi, “Mina ngisebenzele ize; amandla ami ngiwachithele ize lobala, ikanti okufanele mina kusesandleni sikaJehova, lomvuzo wami ukuNkulunkulu.”

5 Khathesi uJehova uthi – yena owangibumbayo esiswini ukuba ngibe yinceku yakhe ukuze ngibuyisele uJakhobe kuye lokuqoqela u-Israyeli kuye, ngoba ngiphakanyisiwe emehlweni kaJehova njalo uNkulunkulu wami ubengamandla ami

6 uthi: “Kuyinto encane kakhulu kuwe ukuba yinceku yami ukuze uvuselele izizwe zikaJakhobe ubuyise labako-Israyeli engibalondolozileyo. Njalo ngizakwenza ube yikukhanya kwabeZizwe, ukuze ufikise usindiso lwami emikhawulweni yomhlaba.”

7 Nanku okutshiwo nguJehova – uMhlengi loNgcwele ka-Israyeli – utsho kuye oweyiswa, wenyanywa yisizwe, kuyo inceku yababusi: “Amakhosi azakubona asukume, Amakhosana azakubona akhothame, ngenxa kaJehova othembekileyo, oNgcwele ka-Israyeli okukhethileyo.”

Ukubuyiselwa Kuka-Israyeli

8 Nanku okutshiwo nguJehova: “Ngesikhathi esifaneleyo kimi ngizakuphendula, ngosuku lokukhululwa ngizakusiza. Ngizakulondoloza ngikwenze ube yisivumelwano sabantu, ukubuyisela ilizwe lokwaba kutsha amafa abo achithekayo.

9 uthi kwabathunjiweyo, ‘Phumani!’ kulabo abasemnyameni uthi, ‘Khululekani!’ “Bazadlela emaceleni emigwaqo bathole amadlelo kuwo wonke amaqaqa alugwadule.

10 Kabayikulamba kumbe bome, lokutshisa kwasenkangala kumbe okwelanga kabayikukuzwa. Lowo obazwela isihawu uzabakhokhela abase emithonjeni yamanzi.

11 Izintaba zami zonke ngizazenza zibe yizindlela, imigwaqo yami izaphakamela phezulu.

12 Khangelani, bazakuza bevela khatshana abanye bevela enyakatho, abanye bevela entshonalanga labanye bevela emmangweni wase-Aswani.”

13 Hlabelelani ngentokozo lina mazulu; jabula lawe mhlaba; tshayani ingoma lina zintaba. Ngoba uJehova uyabaduduza abantu bakhe njalo uzakuba lesihawu kwabahluphekayo bakhe.

14 Kodwa iZiyoni yathi, “UJehova ungilahlile, uJehova usengikhohliwe.”

15 “Owesifazana angamkhohlwa umntanakhe omunyayo na, angabi lesihelo emntwaneni amzeleyo na? Lanxa engamkhohlwa, mina angiyikukukhohlwa!

16 Khangela, sengikudwebe ezintendeni zezandla zami; imiduli yakho ihlezi iphambi kwami.

17 Amadodana akho aphanga emuva, lalabo abakuchithayo bayasuka kuwe.

18 Phakamisa amehlo akho ukhangele emaceleni wonke, wonke amadodana akho ayaqoqana eze kuwe. UJehova uthi, “Ngeqiniso elinjengoba ngiphila, bonke uzabagqiza njengezigqizo, ucece ngabo njengomlobokazi.

19 “Lanxa nje wadilizwa waba lunxiwa lelizwe lakho lachithwa, khathesi uzakuba mncane kakhulu ebantwini bakho; lalabo abakuchithayo bazakuba khatshana.

20 Abantwana abazalwa ngesikhathi sokufelwa kwakho bazakutsho lawe usizwa bathi, ‘Indawo le incinyane kakhulu kithi; siphe enye njalo indawo yokuhlala.”

21 Lapho-ke uzakuthi enhliziyweni yakho, ‘Ngubani owangizalela laba na? Ngafelwa njalo ngaba njengongazalanga; ngaxotshwa elizweni, ngalahlwa. Laba bondliwa ngubani? Mina ngangisele ngedwa, kodwa laba-ke – bavele ngaphi?’ ”

22 Nanku okutshiwo nguJehova Wobukhosi: “Khangela, ngizaqhweba abeZizwe. Ngizaphakamisela uphawu lwami ebantwini; bazaletha amadodana akho bewagonile, amadodakazi akho bewathwele ngamahlombe abo.

23 Amakhosi azakuba ngoyihlo bokukukhulisa, amakhosikazi awo abe ngonyoko bokukondla. Bazakhothama phambi kwakho ubuso babo buphansi emhlabathini, bazakhotha uthuli ezinyaweni zakho. Lapho-ke uzakwazi ukuthi mina nginguJehova; labo abangithembayo abayikudaniswa.”

24 Amabutho angemukwa impango na, kumbe abathunjiweyo bahlengwe kwabesabekayo na?

25 Kodwa nanku okutshiwo nguJehova: “Ye, abathunjiweyo bazathathwa emabuthweni lempango izahluthunwa futhi kwabesabekayo, ngoba ngizamelana lalabo abamelana lawe, abantwabakho ngizabahlenga.

26 Ngizakwenza abacindezeli bakho badle inyama yemizimba yabo; bazadakwa ngelabo igazi njengewayini. Lapho-ke izizwe zonke zizakwazi ukuthi mina, uJehova, nginguMsindisi wakho, uMhlengi wakho, uSomandla kaJakhobe.”