Jer 43 | NdeIBE | STEP | Kwathi uJeremiya eseqedile ukutshela abantu wonke amazwi kaJehova uNkulunkulu wabo – konke uJehova ayemthume ukuthi abatshele khona

‏ Jeremiah 43

1 Kwathi uJeremiya eseqedile ukutshela abantu wonke amazwi kaJehova uNkulunkulu wabo – konke uJehova ayemthume ukuthi abatshele khona – 2 u-Azariya indodana kaHoshayiya, loJohanani indodana kaKhareya labo bonke abantu abazigqajayo bathi kuJeremiya, “Uqamba amanga! UJehova uNkulunkulu wethu kakuthumanga ukuba uthi, ‘Akumelanga liye eGibhithe ukuyahlala khona.’

3 Kodwa uBharukhi indodana kaNeriya uyakutshotshozela ukuba usinikele kumaKhaledi ukuba asibulale kumbe asise ekuthunjweni eBhabhiloni.”

4 Ngakho uJohanani indodana kaKhareya lazo zonke izikhulu zebutho kanye labantu bonke kabalilalelanga ilizwi likaJehova lokuthi bahlale elizweni lakoJuda. 5 Esikhundleni salokho, uJohanani indodana kaKhareya lezikhulu zonke zebutho bathatha bonke ababesele koJuda ababebuyele koJuda ukuyahlala khona bevela ezizweni zonke ababekade behlakazelwe kuzo. 6 Bathatha lamadoda wonke, labesifazana bonke kanye labantwana bonke, lamadodakazi enkosi lawo uNebhuzaradani umlawuli wabalindi ayewatshiye loGedaliya indodana ka-Ahikhami, indodana kaShafani, loJeremiya umphrofethi kanye loBharukhi indodana kaNeriya. 7 Ngakho bangena eGibhithe bedelela uJehova, bahamba baze bayafika eThahiphanihesi.

8 Ilizwi likaJehova lafika kuJeremiya eThahiphanesi lisithi, 9 “Thatha amatshe amakhulu uwambele enhlabathini endaweni egandelwe ngezitina, abaJuda bekhangele, esangweni lesigodlo sikaFaro eThahiphanesi,

10 uthi kubo, ‘UJehova uSomandla, uNkulunkulu ka-Israyeli uthi: Ngizabiza inceku yami uNebhukhadinezari inkosi yaseBhabhiloni, njalo ngizabeka isihlalo sakhe sobukhosi phezu kwamatshe la engiwambele lapha; uzakwendlala ithente lakhe lobukhosi phezu kwawo. 11 Uzakuza ahlasele iGibhithe, alethe ukufa kulabo abamiselwe ukufa, lokuthunjwa kulabo abamiselwe ukuthunjwa, lenkemba kulabo abamiselwe inkemba. 12 Uzawathungela ngomlilo amathempeli abonkulunkulu bamaGibhithe; uzawatshisa amathempeli abo athumbe onkulunkulu bawo. Njengomalusi ezithandela ngesambatho sakhe, ngokunjalo laye uzazithandela ngeGibhithe asuke khona engalimalanga. 13 Khonale eGibhithe, ethempelini lelanga, uzadiliza izinsika ezikhonzwayo njalo uzatshisa amathempeli abonkulunkulu beGibhithe.’ ”