Job 16
UJobe Uyaphendula
1UJobe wasephendula wathi: 2“Sengezwa izinto ezinengi ezifana lazona lezi; lingabaduduzi ababi lina lonke! 3Zizaphela nini izinkulumo zokubhuda kwenu lokhu? Kuyini okulihluphayo laphikelela nje lidaza inkani? 4Lami bengingakhuluma njengani aluba yini elisesikhundleni sami; ngabe ngikhupha izinkulumo ezimnandi ngilisola ngize nginikine ikhanda lami. 5Kodwa umlomo wami ngabe uyaliqinisa; induduzo yezindebe zami ipholise ubuhlungu. 6“Kodwa nxa ngikhuluma, ubuhlungu obukimi kabudedi; loba ngingaze ngithule, kabusuki. 7Ngeqiniso, hawu Nkulunkulu, usungiqede amandla; usuyitshabalalisile yonke imuli yami. 8Usungibophile sekuyibo ubufakazi balokho; lokucikizeka kwami kuyakhula kungilahla. 9UNkulunkulu uyanginxwanela angidlikize ngolaka lwakhe, angigedlele amazinyo; isitha sami singinyonkoloze ngamehlo ahlabayo. 10Abantu bavula imilomo yabo bengihoza; bangimakala esihlathini bengihlambaza babambane bangihlanganyele. 11UNkulunkulu usenginikele ebantwini ababi wangiphosela ezandleni zezigangi. 12Konke kwakukuhle kimi, kodwa wangibhidliza; wangixhakalaza ngentamo wangichoboza. Usengenze ngaba yinto yakhe yokunenjwa; 13abatshoki bakhe bangihanqile. Ungiciba izinso zami engelazwelo achithele inyongo yami phansi. 14Ungisukela njalo njalo; angidumele njengebutho. 15Sengithungele isambatho sesaka emzimbeni wami ngathukuza ibunzi lami othulini. 16Ubuso bami sebubomvu ngokukhala, amathunzi anzima ahonqolozela amehlo ami; 17kodwa izandla zami kaziluqhelanga udlakela, lomthandazo wami uhlanzekile. 18“Hawu mhlaba, ungaligqibeli igazi lami; sengathi lokukhala kwami kungaze kwacitshwa lanini! 19Lakhathesi ufakazi wami usezulwini; ummeli wami uphezulu khonale. 20Ummeli wami ngumngane wami nxa amehlo ami empompoza izinyembezi kuNkulunkulu; 21uyamncengela umuntu kuNkulunkulu njengomuntu encengela umngane wakhe. 22“Kusasele iminyakana engemingaki anduba ngiye lapho kungabuywa khona.
Copyright information for
NdeIBE