Psalms 102
Umkhuleko womuntu okhathazekileyo. Lapho esephela umoya eseqhinqa isililo phambi kukaJehova.
1Zwana umkhuleko wami, O Jehova; ukukhala kwami ngicela uncedo kakufike kuwe. 2Ungangifihleli ubuso bakho nxa ngikhathazekile. Ngipha indlebe yakho; nxa ngibiza ngiphendula masinyane. 3Ngoba izinsuku zami ziyanyamalala njengentuthu; amathambo ami ayavutha njengamalahle abhebhayo. 4Inhliziyo yami yonakele, ibunile njengotshani; ngiyakhohlwa ukudla kwami. 5Ngenxa yokububula kwami okukhulu sengiphelile, isigogo sesinamathela emathanjeni. 6Sengifana lesikhova senkangala, njengesikhova semanxiweni. 7Ngilala ngikhangele; senginjengenyoni ehlezi yodwa ephahleni. 8Ilanga lonke izitha zami ziyangichukuluza; labo abangichothozayo badlala ngebizo lami njengesethuko. 9Ngokuba ngidla umlotha njengokudla kwami, ngixube okunathwayo kwami ngezinyembezi 10ngenxa yokuthukuthela kwakho okukhulu, ngoba ungiqukule wangilahlela eceleni. 11Izinsuku zami zifana lesithunzi sakusihlwa; ngiyabuna njengotshani. 12Kodwa wena, O Jehova, uhlezi ebukhosini lanininini; udumo lwakho lumi ezizukulwaneni zonke. 13Uzaphakama uzwele iZiyoni isihawu, ngoba sekuyisikhathi sokutshengisa umusa kuyo, isikhathi esimisiweyo sesifikile. 14Ngokuba amatshe ayo aligugu ezincekwini zakho; lothuli lwayo nje lubalethela usizi. 15Izizwe zizalesaba ibizo likaJehova, wonke amakhosi omhlaba azahlonipha inkazimulo yakhe. 16Ngoba uJehova uzayakha butsha iZiyoni ivele enkazimulweni yakhe. 17Uzaphendula imithandazo yabahluphekayo; kazukweyisa isicelo sabo. 18Lokhu kakulotshwe phansi kube ngokwesizukulwane sakusasa, ukuze abantu abangakadalwa bamdumise uJehova: 19“UJehova wakhangela phansi ephezulu endlini yakhe engcwele, esezulwini wawuhlola umhlaba, 20ukuze ezwe ukububula kwezibotshwa lokukhulula labo ababegwetshelwe ukufa.” 21Ngalokho-ke ibizo likaJehova lizamenyezelwa eZiyoni lodumo lwakhe eJerusalema, 22lapha izizwe lemibuso sekuhlangana ndawonye ukukhonza uJehova. 23Wawanciphisa amandla ami ngisaphila; waziphungula izinsuku zami. 24yikho ngase ngisithi, “Ungangithathi, O Nkulunkulu wami, ngilokhu ngisephakathi kwezinsuku zami; iminyaka yakho ihlala ikhona ezizukulwaneni zonke. 25Ekuqaleni wabeka izisekelo zomhlaba, lamazulu angumsebenzi wezandla zakho. 26Konke kuzabhubha, kodwa wena uzasala; konke kuzaguga njengesigqoko. Njengesivunulo uzakuguqula kucine sekulahlwa. 27Kodwa wena uhlala unjalo, njalo iminyaka yakho kayisoze iphele lanini. 28Abantwana bezinceku zakho bazahlala besemehlweni akho; izizukulwane zazo zizaqiniswa phambi kwakho.”
Copyright information for
NdeIBE