Psalms 27
ElikaDavida
1UJehova uyikukhanya kwami lensindiso yami – ngizakwesaba bani na? UJehova uyinqaba yokuphila kwami – ngubani engingamesaba na? 2Nxa ababi bengihlasela bezodlithiza inyama yami, lapho izitha zami labangizondayo bengihlasela, bazakhubeka bawe. 3Loba impi ingivimbezela, inhliziyo yami kayizukwesaba; loba ngivukelwa yimpi, loba kunjalo ngizakuma isibindi. 4Yinye into engiyicelayo kuJehova, yilokhu engikudingayo: ukuba ngihlale endlini kaJehova zonke izinsuku zokuphila kwami, ngibuke ubuhle bukaJehova, lokuthi ngimdinge ethempelini lakhe. 5Phela ngosuku lokuhlupheka uzangilondoloza emuzini wakhe, uzangifihla esiphephelweni sethabanikeli lakhe angimise phezulu esiqongweni sedwala. 6Lapho-ke ikhanda lami lizaphakanyiswa ngaphezu kwezitha ezingihanqileyo; ethabanikeleni lakhe ngizakwenza umhlatshelo ngimemeza ngentokozo; ngizahlabelela ngivume ingoma kuJehova. 7Zwana ilizwi lami lapho ngimemeza O Jehova; woba lomusa kimi ungiphendule. 8Ithi inhliziyo yami ngawe, “Dinga ubuso bakhe!” Ubuso bakho, Jehova ngizabudinga. 9Ungangifihleli ubuso bakho, ungayixotshi inceku yakho ngokuthukuthela; wena ubungumsizi wami. Ungangilahli loba ungidele, O Nkulunkulu, Msindisi wami. 10Loba obaba lomama bengangidela, uJehova uzangemukela. 11Ngifundisa indlela yakho, O Jehova; ngihola endleleni eqondileyo ngenxa yabacindezeli bami. 12Unganginikeli entandweni yabangizondayo, ngoba ofakazi bamanga bayangivukela bevutha ulaka. 13Ngilokhu ngilesibindi ngalokhu: ngizakubona ukulunga kukaJehova emhlabeni wabaphilayo. 14Lindela uJehova; qina ume isibindi ulindele uJehova.
Copyright information for
NdeIBE