Psalms 36
Kumqondisi wokuhlabela. ElikaDavida inceku kaJehova.
1Ngilenkinga enhliziyweni yami mayelana lokuxhwala kwesigangi: Kakukho ukwesaba uNkulunkulu engqondweni yaso. 2Phela kweyaso ingqondo siyazikhohlisa size sehluleke ukubona kumbe ukuzonda isono saso. 3Amazwi omlomo waso abolile alenkohliso; kasiselakho ukuhlakanipha lokulunga. 4Kwala loba silele siceba ububi; sizinikela endleleni yobubi njalo kasikulahli okubi. 5Uthando lwakho, Jehova, lufika emazulwini, ukuthembeka kwakho esibhakabhakeni. 6Ukulunga kwakho kunjengezintaba ezesabekayo, ukwahlulela kuhle kwakho njengolwandle olukhulu. O Jehova, uyamlondoloza umuntu kanye lenyamazana. 7Luligugu elinganani uthando lwakho olungaphuthiyo! Bonke abantu abayizikhulu labahluphekayo bazuza isiphephelo emthunzini wamaphiko akho. 8Bayazitika ngokudla okunengi endlini yakho; ubapha okunathwayo okwemfuleni wakho wokuthokoza. 9Ngoba kuwe kulomthombo wokuphila; kokwakho ukukhanya sibona ukukhanya. 10Qhubeka ngothando lwakho kulabo abakwaziyo, ukuhuga kwakho kwabaqotho enhliziyweni. 11Sengathi unyawo lwabazazisayo lungehluleka ukunginyathela, loba ukuthi isandla sababi singangixotshi. 12Bonani-ke ukuthi izigangi sezithe daca – ziwiselwe phansi, kazisavuki futhi!
Copyright information for
NdeIBE