Psalms 39
Kumqondisi wokuhlabela. ElikaJeduthuni. Ihubo likaDavida.
1Ngathi, “Ngizaziqaphela izindlela zami, ngiluthinte ulimi lwami esonweni; ngizawugcika umlomo wami nxa ababi bekhona phambi kwami.” 2Kodwa kwathi lapho ngithule ngithe zwi, ngingatsho lutho loba lungoluhle ubuhlungu benhliziyo yami bakhula. 3Inhliziyo yami yavutha ngaphakathi kwami; kwathi lapho ngizuliswa yimicabango, umlilo wavutha; ngasengikhuluma ngolimi lwami: 4“Ngitshengisa, Jehova, isiphetho sempilo yami lobunengi bezinsuku zami; ngazisa ukuthi impilo yami igijima kanganani. 5Usuwenze izinsuku zami zaba lobubanzi besandla; ububanzi beminyaka yami kabusilutho kuwe. Impilo yalowo lalowo umuntu ingumoya kuphela. 6Umuntu uhambahamba elithongo nje; uyashishinika, kodwa akwenzayo lize lodwa; ubuthelela inotho engazi ukuthi izakuba ngekabani. 7“Kodwa okwamanje, Jehova, ngisafunani kambe? Ithemba lami likuwe. 8Ngisindisa kuzo zonke iziphambeko zami; ungangenzi inhlekisa yezitha. 9Ngathula; ngangingeke ngiwuvule umlomo wami, ngokuba lokhu kwenziwe nguwe. 10Susa uswazi lwakho kimi; sengikhulelwa yisidutshulo sesandla sakho. 11Abantu uyabakhuza ubajezisele isono sabo; ucikiza inotho yabo njengenondo – umuntu ngamunye ungumoya nje. 12“Zwana umthandazo wami, O Jehova, lalela isikhalazo sami ngicela uncedo; ungabi ligcikandlebe nxa ngikhala. Phela ngihlala lawe nginjengesihambi, ngiyisethekeli njengoba okhokho bonke babenjalo. 13Ake ukhangele eceleni nje ukuze ngithokoze njalo, ngingakasuki lapha ngibe ngongasekho.”
Copyright information for
NdeIBE