Psalms 41
Kumqondisi wokuhlabela. Ihubo likaDavida.
1Ubusisiwe lowo onanza abahluphekayo; uJehova uyamkhulula ngezikhathi zokuhlupheka. 2UJehova uzamvikela alondoloze impilo yakhe; uzambusisa phakathi kwelizwe angamyekeli emandleni ezitha zakhe. 3UJehova uzamqinisa lanxa elele egula njalo amsilise avuke ekuguleni kwakhe. 4Ngathi, “O Jehova ake ungihawukele; ngisilisa, ngoba ngonile kuwe.” 5Izitha zami ziyangigcona zithi, “Uzakufa nini licitshe ibizo lakhe?” 6Nxa omunye wabo efika ezongibona, ukhuluma kuhle angikhohlise, kodwa enhliziyweni yakhe egaya izibozi; athi angaphuma ahambe esekhihliza ebantwini. 7Bonke abangizondayo banyenyezelana ngami; bangicabangela wonke amanyala besithi, 8“Usengenwe ngumkhuhlane omubi; kasoze asile avuke futhi.” 9Lomngane wami osekhwapheni, ebengimthembile, obekade ecupha lami emganwini, usengifulathele. 10Kodwa wena, O Jehova ake ungihawukele; ake ungivuse ukuze ngibakhawulise. 11Ngiyazi ukuthi uyathokoza ngami, ngokuba isitha sami kasingehluli. 12Ubuqotho bami busekelwa nguwe njalo ungimisa phambi kwakho nini lanini. 13Udumo alube kuye uJehova, uNkulunkulu ka-Israyeli, kusukela nininini kuze kube nininini. Ameni njalo Ameni!
Copyright information for
NdeIBE