Psalms 49
Kumqondisi wokuhlabela. ElamaDodana kaKhora. Ihubo.
1Zwanini lokhu lina bantu lonke; lalelani, lonke elihlala kulo umhlaba, 2abantukazana lezikhulu, abanothileyo labayanga ngokufanayo: 3Umlomo wami uzakhuluma amazwi okuhlakanipha; amazwi aphuma enhliziyweni yami azanika ukuzwisisa. 4Ngizabeka indlebe yami kuso isaga; ngechacho ngizaliqhaqha ilibho: 5Ngingesabelani na nxa kufika izinsuku ezimbi, lapho abakhohlisi ababi bengihanqa – 6labo abathembe inotho yabo abazitshaya isifuba ngenotho yabo enengi? 7Kakho umuntu ongahlenga impilo yomunye kumbe amkhuphele ihlawulo kuNkulunkulu – 8ihlawulo lempilo liyadula, akulambadalo engalanelisa – 9ukuthi aphile okungapheliyo angaboni ukubola. 10Phela bonke bayabona ukuthi izihlakaniphi ziyafa; ngokunjalo iziwula labasangeneyo bayabhubha batshiye inotho yabo kwabanye. 11Amangcwaba abo ayizindlu zabo zanininini, yimizi yabo okwezizukulwane ezingapheliyo, lokuba nje basebeqambe iziqinti ngamabizo abo. 12Kodwa umuntu, lokuba elenotho, kaphili kokuphela; unjengezinyamazana ezibhubhayo. 13Lesi yisiphetho salabo abazithembayo bona, labalandeli babo, abavumelana labakutshoyo. 14Njengezimvu bamiselwe ingcwaba, ukufa kuzazitika kubo. Abaqotho bazabusa phezu kwabo ekuseni; izidumbu zabo zizabola engcwabeni, kude lemizi yabo efana leyamakhosi. 15Kodwa uNkulunkulu uzayihlenga eyami impilo engcwabeni; ngempela uzangithatha angise kuye. 16Ungasuki udangale kakhulu ngokubona omunye enotha; nxa indlu yakhe igcwala ngobunkentshenkentshe; 17phela kazukuhamba lalutho mhla esifa, ubukhazikhazi lobo kayikwehla labo. 18Loba wayesithi esaphila azibone engobusisiweyo – abantu bayakukhonza nxa uphumelela – 19uzakuyahlangana lesizukulwane sabokhokho bakhe, abangasayikuphinde bakubone ukukhanya kwempilo. 20Umuntu olenotho kodwa engaqedisisi unjengezinyamazana ezibhubhayo.
Copyright information for
NdeIBE