Psalms 56
Kumqondisi wokuhlabela. kulandelwa itshuni ethi, “Ijuba phezu kwemikusu ekude.” ElikaDavida. Imikithani. Lapho wayesethunjwe ngamaFilisti eGathi.
1Woba lomusa kimi, O Nkulunkulu, ngokuba abantu baxotshana lami kubi; ilanga lonke bayajujumezela bengihlasela. 2Labo abangigconayo baxotshana lami ilanga lonke; abanengi bangihlasela bekloloda. 3Nxa ngisesaba ngizathemba kuwe. 4KuNkulunkulu, engidumisa ibizo lakhe, ngithemba kuye uNkulunkulu; angiyikwesaba. Umuntu wenyama angenzani kimi? 5Ilanga lonke batshona behlanekela amazwi ami; 6balandele izinyathelo zami betshisekela ukucitsha impilo yami. 7Loba sekutheni ungabayekeli baphunyuke; ngokuthukuthela kwakho, Nkulunkulu, zidilize izizwe. 8Bhala phansi isililo sami; bhala ithonsi ngalinye lezinyembezi zami emqulwini wakho – kazikho yini emibhalweni yakho? 9Lapho-ke izitha zami zizafulathela nxa sengicela uncedo. Ngalokhu ngizakwazi ukuthi uNkulunkulu ulami. 10KuNkulunkulu, engidumisa ibizo lakhe, kuJehova engidumisa ibizo lakhe, 11kuNkulunkulu ngiyathemba; angiyikwesaba. Umuntu angenzani kimi na? 12Ngibanjwe yizifungo kuwe, O Nkulunkulu; ngizakwethula umnikelo wami wokubonga kuwe. 13Ngokuba ungikhulule ekufeni lezinyawo zami lapho ngikhubeka, ukuze ngihambe phambi kukaNkulunkulu ekukhanyeni kwempilo.
Copyright information for
NdeIBE