Psalms 62
Kumqondisi wokuhlabela. KuJeduthuni. Ihubo likaDavida.
1Umphefumulo wami ufumana ukuphumula kuNkulunkulu kuphela; ukusindiswa kwami kuvela kuye. 2Yena yedwa uyilo idwala lami lensindiso yami; uyinqaba yami, kangisoze ngihlukunyezwe lanini. 3Koze kube nini lilokhu lihlukuluza umuntu na? Lonke lizamlahla phansi na yena ongumduli otshekileyo, oluthango olutebhayo? 4Bazimisele ukumqethula esikhundleni sakhe esiphezulu; bathokoziswa ngamanga. Ngemilomo yabo bayabusisa, kodwa ezinhliziyweni zabo bayaqalekisa. 5Fumana ukuphumula, O mphefumulo wami, kuNkulunkulu kuphela; ithemba lami livela kuye. 6Yena yedwa ulidwala lami lensindiso; uyinqaba yami, kangisoze ngihlukunyezwe. 7Insindiso yami lodumo lwami kweyeme kuNkulunkulu; ulidwala lami eliqinileyo, isiphephelo sami. 8Thembani kuye ngezikhathi zonke, lina bantu; likhuphe konke okusezinhliziyweni zenu kuye, ngokuba uNkulunkulu uyisiphephelo sethu. 9Abantukazana bangumoya nje, izikhulu ziyinkohliso nje; aluba belinganiswa esikalini kabasilutho; bonke ndawonye bangumoya kuphela. 10Lingathembi ukuqilibezela kumbe lizikhukhumeze ngezimpahla zokwebiwa; kungaze kube inotho yenu iyanda, lingabeki izinhliziyo zenu kuyo. 11Yinye into uNkulunkulu ayikhulumileyo, zimbili izinto engizizwileyo: ukuthi wena, O Nkulunkulu, uqinile, 12lokuthi wena, O Jehova, ulothando. ngempela uzamvuza umuntu ngamunye mayelana lalokho akwenzileyo.
Copyright information for
NdeIBE