Psalms 64
Kumqondisi wokuhlabela. Ihubo likaDavida.
1Ake ungizwe, O Nkulunkulu, nxa ngiletha ukusola kwami; vikela impilo yami ezisongweni zesitha. 2Ngifihla emacebeni abantu ababi, kulokho kuxokozela kwezixhwali. 3Bayazilola izilimi zabo njengezinkemba bakhombele amazwi abo njengemitshoko ebulalayo. 4Batshoka becatheme umuntu ongonanga lutho; bayaphanga ukumciba bengelavalo. 5Bayakhuthazana ngamacebo amabi, bakhulumisana ngokufihla imijibila yabo; bathi, “Sizabonwa ngubani?” 6Bacela ukona besithi, “Sesakhe icebo elihle kakhulu!” Ngempela ingqondo yomuntu lenhliziyo yakhe ilobuqili. 7Kodwa uNkulunkulu uzabaciba ngemitshoko; ngokuphangisa nje bazalahlwa phansi. 8Uzakwenza banyeyane bona bodwa bacine sebedilizana; bonke abababonayo bazanikina amakhanda babahleke. 9Bonke abantu bomhlaba bazakwesaba; bazafakaza imisebenzi kaNkulunkulu banakane ngalokho akwenzileyo. 10Akuthi abalungileyo bathokoze kuJehova baphephele kuye; akuthi bonke abaqotho ngenhliziyo bamdumise.
Copyright information for
NdeIBE