Psalms 71
1Kuwe, O Jehova, sengicatshe khona; mangingayangiswa lanini. 2Ngihlenga ungikhulule ngokulunga kwakho; phendulela indlebe yakho kimi ungisindise. 3Woba lidwala lami lokuphephela, lapho engingaya khona loba nini; tshono umlayo wokuba ngisindiswe, ngokuba ulidwala lami lenqaba yami. 4Ngikhulula, O Nkulunkulu, esandleni sababi, emandleni abantu ababi abalochuku. 5Ngoba ube ulithemba lami, O Jehova Wobukhosi, engikuthembileyo kwasebutsheni bami. 6Kusukela ekuzalweni kwami ngahle ngeyama kuwe; nguwe owangikhuphayo esiswini sikamama. Ngizakudumisa njalonjalo. 7Senginjengomhlolo kwabanengi, kodwa wena uyisiphephelo sami esiqinileyo. 8Umlomo wami ugcwele udumo lwakho, umemezela inkazimulo yakho ilanga lonke. 9Ungangilahleli kude nxa sengiluphele; ungangifulatheli lapho amandla ami esephelile. 10Ngokuba izitha zami zikhuluma kubi ngami; labo abalindele ukungibulala bahlangana ngami. 11Bathi, “UNkulunkulu usemlahlile; xotshanani laye limbambe, ngokuba kakho ozamlamulela.” 12Ungabi khatshana kwami, O Nkulunkulu; woza masinyane, O Nkulunkulu wami, uzongisiza. 13Sengathi labo abangethesa amacala bangabhubha beyangekile; sengathi labo abafuna ukungilimaza bangabhixwa ngehlazo lokuyangeka. 14Kodwa mina ngizahlala ngithembile; ngizakudumisa kakhulu kakhulu. 15Umlomo wami uzafakaza ngokulunga kwakho, langensindiso yakho ilanga lonke, lokuba ngingasazi isilinganiso sayo. 16Ngizakuza ngifakaze ngemisebenzi yakho emikhulu, O Jehova Wobukhosi; ngizafakaza ngokulunga kwakho, okwakho wedwa. 17Kusukela ebutsheni bami, O Nkulunkulu, wangifundisa, kuze kube lamuhla ngimemezela imisebenzi yakho emangalisayo. 18Lokuba sengiluphele sengiyimpunga ungangideli, O Nkulunkulu, ngize ngifakaze ngamandla akho esizukulwaneni esizayo, amandla akho kubo bonke abalandelayo. 19Ukulunga kwakho kufika emkhathini, O Nkulunkulu, wena osuwenze izinto ezinkulu. Ngubani, O Nkulunkulu, onjengawe? 20Loba usungenze ngabona izinhlupheko ezinengi lezibuhlungu, uzangenyula njalo ekujuleni komhlabathi. 21Uzalwandisa udumo lwami ungiduduze futhi njalo. 22Ngizakudumisa ngechacho ngenxa yokuthembeka kwakho, O Nkulunkulu wami; ngizahlabelela indumiso kuwe ngomqangala, wena oNgcwele ka-Israyeli. 23Izindebe zami zizamemeza ngentokozo lapho ngihlabelela indumiso kuwe mina ongisindisileyo. 24Ulimi lwami luzatshona lukhuluma ngokulunga kwakho ilanga lonke, ngokuba labo abafuna ukungilimaza sebeyangisiwe basanganiswa.
Copyright information for
NdeIBE