Psalms 84
Kumqondisi wokuhlabela. Ngendlela yegithithi. Elabantwana bakaKhora. Ihubo.
1Yeka ubuhle bendlu yakho, O Jehova Somandla! 2Umphefumulo wami uyalangazela, uze ungathi uyaphela, amaguma kaJehova; inhliziyo yami lenyama yami kukhalela uNkulunkulu ophilayo. 3Intaka layo ilizuzile ikhaya, lenkonjane isidleke sayo, lapho ingazalela khona abantwana bayo indawo eduze kwe-alithare lakho, O Jehova Somandla, Nkosi yami loNkulunkulu wami. 4Babusisiwe labo abahlala endlini yakho; bahlala bekudumisa kokuphela. 5Babusisiwe labo abalamandla abo akuwe asebebeke izinhliziyo zabo ekulagiseni kuwe. 6Bathi nxa bedabula esiGodini seBhaka basenze sibe yindawo yemithombo; izulu lekwindla lalo ligcwalise iziziba. 7Ayakhula amandla abo ande, ngulowo lalowo aze aqhamuke kuNkulunkulu eZiyoni. 8Zwana umkhuleko wami, O Jehova Nkulunkulu Somandla; akungilalele, O Nkulunkulu kaJakhobe. 9Khangela isihlangu sethu, O Nkulunkulu; khangela ngomusa kogcotshiweyo wakho. 10Lungcono usuku olulodwa emagumeni akho kulezinsuku eziyinkulungwane engxenye; kungabangcono ngibe ngumlindimasango endlini kaNkulunkulu kulokuhlala emathenteni ababi. 11Ngokuba uJehova ulilanga lesihlangu; uJehova uyapha umusa lodumo; kancitshani langaluphi ulutho oluhle kulabo ozinyathelo zabo zingelansolo. 12O Jehova Somandla, ubusisiwe umuntu owethemba kuwe.
Copyright information for
NdeIBE