Psalms 86
Umkhuleko kaDavida
1Zwana, O Jehova, ungiphendule, ngokuba ngingumyanga ngiyaswela. 2Vikela impilo yami, ngokuba ngizinikele kuwe. UnguNkulunkulu wami, sindisa inceku yakho ekuthembayo. 3Woba lesihawu kimi, O Jehova, ngokuba ngitshona ngikubiza ilanga lonke. 4Letha ukuthokoza encekwini yakho, ngokuba kuwe, O Jehova, ngiphakamisela umphefumulo wami. 5Uyathethelela njalo ulungile, O Jehova, ugcwele uthando kulabo abakhuleka kuwe. 6Zwana umkhuleko wami, O Jehova; lalela ukukhala kwami ngicela umusa. 7Mhla ngiphakathi kokuhlupheka ngizakhala kuwe, ngokuba uzangiphendula. 8Phakathi kwabonkulunkulu kakho onjengawe, O Jehova; kakulazenzo ezingalinganiswa lezakho. 9Zonke izizwe owazenzayo zizakuza zikhonze kuwe, O Jehova; zizaletha udumo ebizweni lakho. 10Ngokuba umkhulu njalo wenza imisebenzi emangalisayo; wena wedwa unguNkulunkulu. 11Ngifundisa indlela yakho, O Jehova, ukuze ngihambe eqinisweni lakho; ngipha inhliziyo engaxamalazanga, ukuze ngilesabe ibizo lakho. 12Ngizakudumisa, O Jehova Nkulunkulu wami, ngenhliziyo yami yonke; ngizalidumisa ibizo lakho laphakade. 13Ngokuba lukhulu uthando lwakho kimi; ungenyule ekujuleni kwengcwaba. 14Iziqholo ziyangihlasela, O Jehova; iqembu lamadoda alesihluku lizingela impilo yami – abantu abangakunanziyo wena. 15Kodwa wena, O Jehova, unguNkulunkulu olozwelo, olobubelo, ophuza ukuzonda, owandayo ngothando lokuthembeka. 16Phendukela ngakimi ube lesihawu kimi; phana amandla akho inceku yakho, usindise indodana yencekukazi yakho. 17Ngipha isiboniso sokulunga kwakho, ukuze izitha zami zisibone ziyangeke, ngokuba wena, O Jehova, usungisizile njalo wangiduduza.
Copyright information for
NdeIBE