‏ 2 Samuel 23

Amazwi okucina kaDavida

1La-ke ngamazwi okucina kaDavida. UDavida indodana kaJese wathi ^a, lomuntu ophakanyiselwe phezulu ^b, ogcotshiweyo kaNkulunkulu kaJakobe ^c, lomhlabeleli omnandi wakoIsrayeli, wathi: 2UMoya weNkosi wakhuluma ngami, lelizwi lakhe lisolimini lwami ^d. 3UNkulunkulu kaIsrayeli wathi, iDwala likaIsrayeli lakhuluma kimi lathi ^e: Obusa abantu uzakuba ngolungileyo, ebusa ngokumesaba uNkulunkulu ^f. 4Njalo uzakuba njengokukhanya kwekuseni ekuphumeni kwelanga ^g, ikuseni engelamayezi, njengohlaza emhlabathini ngokukhanya emva kwezulu. 5Lanxa indlu yami ingenjalo kuNkulunkulu, kube kanti wenzile lami isivumelwano esilaphakade, esimiswe kuhle ezintweni zonke, lesigcinekileyo ^h, ngoba lonke usindiso lwami lesiloyiso sikuso, lanxa engasikhulisi ⁱ.

6Kodwa abakaBheliyali bonke banjengameva alahliweyo ^j, ngoba engelakuthathwa ngesandla; 7kodwa umuntu owathintayo uzazihlomisa ngensimbi langoluthi lomkhonto ^k, azatshiswa lokutshiswa ngomlilo kuleyondawo.

Amaqhawe kaDavida

8La ngamabizo amaqhawe uDavida ayelawo ^l: UJoshebi-Bashebeti umTahekemoni, inhloko yezinduna; nguye uAdino umEzini, ngenxa yabangamakhulu ayisificaminwembili ababulawa ngasikhathi sinye ^m. 9Lemva kwakhe kwakuloEleyazare indodana kaDodo indodana kaAhohi, owamaqhawe amathathu ayeloDavida ⁿ, ekudeleleni kwabo amaFilisti ayebuthanele khona impi, lapho amadoda akoIsrayeli esenyukile ^o, 10yena wasukuma watshaya amaFilisti saze sadinwa isandla sakhe, lesandla sakhe sanamathela enkembeni. INkosi yasisenza usindiso olukhulu ngalolosuku; abantu basebebuya emva kwakhe ukuzaphanga kuphela ^p. 11Lemva kwakhe kwakuloShama indodana kaAge umHarari ^q. AmaFilisti ayebuthene aba lixuku, lapho okwakukhona isiqinti sensimu sigcwele amalentili; njalo abantu babaleka ebusweni bamaFilisti, 12kodwa wajama phakathi kwesiqinti, wasivikela, wawatshaya amaFilisti. INkosi yenza-ke usindiso olukhulu ^r.

13Abathathu ezinhlokweni ezingamatshumi amathathu basebesehla, bafika kuDavida ebhalwini lweAdulamu ^s ngesikhathi sokuvuna; lexuku lamaFilisti lalimise inkamba esihotsheni seRefayimi ^t. 14Langalesosikhathi uDavida wayesenqabeni ^u, lebutho lenqaba lamaFilisti laliseBhethelehema ngalesosikhathi ^v. 15UDavida wasenxwanela, wathi: Hawu, kungathi omunye ubenganginathisa amanzi omthombo weBhethelehema ongasesangweni! 16Lawomaqhawe amathathu asefohla adabula enkambeni yamaFilisti, akha amanzi emthonjeni weBhethelehema owawungasesangweni, awathatha awaletha kuDavida. Kube kanti kathandanga ukuwanatha, kodwa wawathululela iNkosi. 17Wasesithi: Kakube khatshana lami, Nkosi, ukuthi ngenze lokho; kakusigazi yini labantu abahambe lempilo yabo engozini? Ngalokho kathandanga ukuwanatha. Lezizinto azenza lamaqhawe amathathu ^w.

18Njalo uAbishayi, umfowabo kaJowabi indodana kaZeruya, wayeyinhloko yabathathu. Yena wasegiyela abangamakhulu amathathu ngomkhonto wakhe, ababuleweyo, wasesiba lebizo phakathi kwabathathu. 19Kahlonitshwanga kakhulu yini kulabathathu? Ngakho waba yinduna yabo; kodwa kafikanga kwabathathu abokuqala ^x. 20UBhenaya-ke, indodana kaJehoyada, indodana yeqhawe ^y, omkhulu ngezenzo, weKabhiseyeli ^z. Yena watshaya ababili abanjengezilwane bakoMowabi ^aa; futhi wehla watshaya isilwane phakathi komgodi mhla weliqhwa elikhithikileyo. 21Yena wasetshaya indoda engumGibhithe, umuntu obukekayo; njalo umGibhithe wayelomkhonto esandleni sakhe; kodwa wehlela kuye elenduku, wawuhluthuna umkhonto esandleni somGibhithe, wambulala ngomkhonto wakhe. 22Lezizinto wazenza uBhenaya indodana kaJehoyada, waba lebizo phakathi kwamaqhawe amathathu. 23Wayehlonipheka kulabangamatshumi amathathu, kodwa kafikanga kwabathathu ^ab. UDavida wasembeka phezu kwabalindi bakhe.

24UAsaheli umfowabo kaJowabi wayephakathi kwabangamatshumi amathathu ^ac, uElihanani indodana kaDodo weBhethelehema, 25uShama umHarodi, uElika umHarodi ^ad, 26uHelezi umPaliti ^ae, uIra indodana kaIkheshi umThekhowa ^af, 27uAbiyezeri umAnethothi ^ag, uMebunayi umHusha ^ah, 28uZalimoni umAhohi ^ai, uMaharayi umNetofa ^aj, 29uHelebi indodana kaBahana umNetofa ^ak, uIthayi indodana kaRibayi weGibeya wabantwana bakoBhenjamini ^al, 30uBhenaya umPirathoni ^am, uHidayi wezifuleni zeGahashi ^an, 31uAbi-Aliboni umAraba ^ao, uAzimavethi umBahurimi ^ap, 32uEliyabha umShahaliboni ^aq, wamadodana kaJasheni, uJonathani, 33uShama umHarari, uAhiyamu indodana kaSharari umHarari ^ar, 34uElifeleti indodana kaAhasibayi indodana yomMahaka ^as, uEliyamu indodana kaAhithofeli umGilo ^at, 35uHezirayi umKharmeli ^au, uPaharayi umArabi, 36uIgali indodana kaNathani weZoba ^av, uBani umGadi, 37uZeleki umAmoni ^aw, uNaharayi umBherothi ^ax, umthwali wezikhali zikaJowabi indodana kaZeruya, 38uIra ^ay umIthiri ^az, uGarebi umIthiri, 39uUriya umHethi ^ba; bebonke babengamatshumi amathathu lesikhombisa.