Act 22 | Ndebele | STEP | Madoda, bazalwane, labobaba, zwanini ukuziphendulela kwami khathesi kini .

1 Madoda, bazalwane, labobaba, zwanini ukuziphendulela kwami khathesi kini ^a. 2 Sebezwile ukuthi ukhuluma labo ngolimi lwamaHebheru, bathula kakhulu ^b, wasesithi: 3 Mina ngiyindoda engumJuda ^c, eyazalelwa eTarsu yeKilikhiya, ngakhuliselwa kulumuzi ^d enyaweni zikaGamaliyeli ^e, ngafundiswa ngokuqinileyo umlayo wabobaba ^f, ngitshisekela uNkulunkulu ^g, njengani lonke lamuhla ^h; 4 eyazingela leyondlela ⁱ kwaze kwaba sekufeni, ngibabopha ngibanikela entolongweni amadoda kanye labafazi ^j, 5 njengoba lompristi omkhulu engifakazela, lomphakathi wonke wabadala ^k; engazuza kubo incwadi eziya kubazalwane ^l, ngaya eDamaseko, ukuthi lababekhona lapho ngibalethe eJerusalema bebotshiwe, ukuze bajeziswe. 6 Kwasekusithi ngisahamba sengisondela eDamaseko, sekungaba yimini enkulu, kwahle kwakhanya ukukhanya okukhulu okuvela ezulwini kungizingelezela. 7 Ngasengiwela phansi, ngasengisizwa ilizwi lisithi kimi: Sawuli, Sawuli, ungizingelelani? 8 Mina ngasengiphendula ngathi: Ungubani, Nkosi? Wasesithi kimi: NginguJesu weNazaretha wena omzingelayo ^m. 9 Lalabo ababelami bakubona ukukhanya, njalo basebesesaba, kodwa kabalizwanga ilizwi elakhuluma lami ⁿ. 10 Ngasengisithi: Ngenzeni, Nkosi? INkosi yasisithi kimi: Sukuma uye eDamaseko; njalo uzatshelwa khona ngazo zonke izinto ozimiselwe ukuthi uzenze. 11 Njengoba ngangingaboni ngenxa yenkazimulo yalokhokukhanya, ngakhokhelwa ngesandla yilabo ababelami, ngafika eDamaseko. 12 Njalo uAnaniya othile ^o, indoda ekhuthele ekukhonzeni ngokomlayo ^p, owayefakazelwa yiwo wonke amaJuda ahlala khona ^q, 13 weza kimi wasesima phansi kwami ^r wathi kimi: Sawuli mzalwane, buya ubone. Njalo mina ngalesosikhathi ngasengimbona. 14 Wasesithi: UNkulunkulu wabobaba bethu ^s ukumisile ngaphambili ^t ukuthi wazi intando yakhe ^u, lokuthi ubone ^v oLungileyo ^w, njalo uzwe ilizwi eliphuma emlonyeni wakhe ^x, 15 ngoba uzakuba ngumfakazi wakhe ^y kubo bonke abantu ^z, walokho okubonileyo lokuzwileyo ^aa. 16 Khathesi-ke, usalindeleni? Sukuma ubhabhathizwe ^ab uhlanjululwe ezonweni zakho ^ac, ubize ibizo leNkosi ^ad. 17 Kwasekusithi kimi sengibuyele eJerusalema ^ae, njalo ngikhuleka ethempelini, ngaba lokuhlehla kwengqondo ^af, 18 ngasengimbona wathi kimi: Phangisa uphume ngesiqubu eJerusalema ^ag; ngoba kabasoze bemukele ubufakazi bakho ngami ^ah. 19 Ngasengisithi: Nkosi, bayazi bona ukuthi mina ngangibafaka entolongweni ^ai ngibatshaya emasinagogeni wonke labo abakholwa kuwe ^aj; 20 njalo mhla kuchithwa igazi likaStefane umfakazi wakho ^ak, mina uqobo ngangimi khona ngivumelana lokufa kwakhe ^al, njalo ngilondoloza izembatho zalabo abambulalayo ^am. 21 Wasesithi kimi: Hamba, ngoba mina ngizakuthuma ^an khatshana kwabezizwe ^ao.

AmaJuda afuna ukubulala uPawuli

22 Bamlalela kwaze kwafika kulelolizwi, baphakamisa ilizwi labo ^ap besithi: Msuseni onje emhlabeni ^aq, ngoba kakufanele ukuthi aphile ^ar! 23 Kwathi besamemeza, baphosa izembatho, baphosa uthuli emoyeni, 24 induna enkulu yalaya ukuthi angeniswe enkambeni yamabutho ^as, yathi kahlolisiswe ngokutshaywa ngesiswepu ^at, ukuze yazi ukuthi kungasizatho bani bememeza ngokunjalo ngaye. 25 Kwathi sebemelulele phambili ngemichilo, uPawuli wathi enduneni yekhulu eyayimi lapho: Kuvunyelwe kini yini ukutshaya ngesiswepu umuntu ongumRoma ^au engalahlwanga licala ^av? 26 Induna yekhulu isizwile yasondela yatshela induna enkulu isithi: Nanzelela osuzakwenza; ngoba lumuntu ungumRoma. 27 Induna enkulu yasifika yathi kuye: Ngitshele, wena ungumRoma yini? Yena wathi: Yebo. 28 Induna enkulu yasiphendula yathi: Mina lelilungelo lokuba yisakhamuzi ngalizuza ngemali enkulu ^aw. UPawuli wasesithi: Kodwa lami ngazalwa lalo. 29 Ngakho labo abasebezamhlola bahle basuka kuye. Lenduna enkulu layo yesaba, isisazi ukuthi ungumRoma, lokuthi ibimbophile ^ax.

30 Kwathi kusisa ifuna ukwazi iqiniso, ukuthi kungani emangalelwa ngamaJuda, yamkhulula kuzibopho ^ay, yalaya ukuthi abapristi abakhulu lomphakathi wabo wonke babuye ^az, yamehlisa uPawuli yammisa phambi kwabo ^ba.