Exo 29:14-18, Lev 4:11-12 | Ndebele | STEP | Kodwa inyama yejongosi lesikhumba salo lomswane walo ukutshise ngomlilo ngaphandle kwenkamba ; kungumnikelo wesono.

Exodus 29:14-18

14 Kodwa inyama yejongosi lesikhumba salo lomswane walo ukutshise ngomlilo ngaphandle kwenkamba ^a; kungumnikelo wesono.

15 Ubusuthatha inqama ibenye ^b; njalo uAroni lamadodana akhe babeke izandla zabo phezu kwenhloko yenqama ^c. 16 Ubusuyihlaba inqama, uthathe igazi layo, ulifafaze elathini uligombolozele. 17 Uyiqume inqama ngeziqa zayo, ugezise imibilini yayo lemilenze yayo, ukubeke phezu kweziqa zayo laphezu kwenhloko yayo, 18 utshise inqama yonke elathini. Kungumnikelo wokutshiswa eNkosini, kuluqhatshi olumnandi, umnikelo owenzelwe iNkosi ngomlilo ^d.

Leviticus 4:11-12

11 Kodwa isikhumba sejongosi ^e, lenyama yalo yonke, lenhloko yalo, lemilenze yalo, lemibilini yalo, lomswane walo, 12 yebo, ijongosi lonke uzalikhuphela ngaphandle kwenkamba, alise endaweni ehlambulukileyo, lapho okuthululelwa khona umlotha, alitshise phezu kwenkuni ngomlilo ^f. Lizatshiselwa lapho okuthululelwa khona umlotha.